Read lumasaaba 2 Timosewo 3 Bible Online

2 Timosewo 3 - lumasaaba bible

2 Timosewo 3

¹Ne iwe wakhiile umanye uri bihangafu bilibawo mu bifukhu bimaliilisi.

²Khulwekhuuba babaandu baliba nga bali batakha, babeyiinga, nga bafwotsola, bakhomyaasa, baminyaalila basaali baabwe, si basiima ta, si barya Wele ta.

³Baliba bababirisa bashaabwe buubi, babaakheyakhila ta, babetsuule khulekelesa, be bisaayumba, barafu, naluundi babaakhakana bibiindu bilayi ta.

⁴Baliba be tsimbomelo, babaakhetsiililisa ta, babetsuule khukhwiyiinga; nga bakana bibiindu bye khaseela busa mu shifwo she khukana Wele.

⁵Bekholisa busa nga babesaaya Wele, ne ilala mu ŋali si bamufukiililamo ta. Ukhabakho ni khukholakana ni babaandu babafwaana nga bano bari ta.

⁶Khulwekhuuba mubeene abo mulimo batweela babaatsya beyingisa mu ntsu tsye babaandu babaandi, bakwaana bakhasi be tsimoni tsindeeyi, babetsuule bibyoonako naluundi babaakhonjelesebwa ni bibiindu bikhali bitweela ta.

⁷Bakhasi bano busheele bakhakakho khukhwiyika, ne si banyala boola khu bya ŋali ta.

⁸Shili busa nga Yane ni Yambelesi ni baakhaandisa Musa, musaambo niyo indweela babaandu bano bakhaandisa bya ŋali. Babaandu bano bali ni intsambaasa imbi, naluundi khufukiilila khwaabwe si khulimo itsamu ta.

⁹Ne bikholwa byaabwe bino imbaawo isi binabayila ta, khulwekhuuba buli mutweela akhaabone busilu bwaabwe, nga ni shakholikha khu basaani babili abo.

¹⁰Ne iwe ari walondelela khuleekela khwase. Naluundi wamanya intsibirisa yase ni shitsiilililwa shase mu bulamu. Iwe wamanya khufukiilila khwase, khukhwinyindaalila khwase, khuukana khwase, ni khukhwikhaliilikha khwase.

¹¹Iwe waamanya khukubyeengebwa khwase, ni khutaambisibwa khwase, ni bibyantsolakho nga ise ndi i Antiyoki, ni Ikoniyo, ni Lisitura. Waamanya khukhuungubyeenga khweesi ise nekhalilikha; ne shitweela busa Umukasya aambonisa bibiindu bino byoosi.

¹²Ilala, abo boosi babekoomba khuumenya buulamu bukhosefu nga bali atweela ni Kristo Yesu, babaandu babaandi balibakubyeenga.

¹³Ne baboonaki ni naabo babekholisa busa, baliilosela bwilooseli busa khukhwoonekha babe baabi babeene, nga bawombesa babaandi naluundi nga nabo babeene bewombesa.

¹⁴Ne iwe ukhaba nga nibo ta, iwe yiloosela khuumenya mu bya ŋali byeesi weyika naluundi byeesi ufukiililamo. Iwe waamanya abo babaaba baleekeli boowo.

¹⁵Naluundi shebulila uri khukhwaama mu bwaana bwoowo, iwe abe wasiima Bibyaronebwa Bikhosefu, bibikhuleekela iwe khufukiilila nio unyoole buwonesi bubwiitsa khuubirira mu Kristo Yesu.

¹⁶Bibyaronebwa bikhosefu byoosi byabiitibwakho ni Wele naluundi nibyo bili bye itsamu khubiraambisa mu khuleekela, khukhwikiitsa, khukwalaasa ni khukaambila bibiwaamba khu bulamu bulayi.

¹⁷Bino biyeeta umuundu uli umwakaanisi uwa Wele khuuba nga wamanya buli shitweela, naluundi nga ali na buli sheesi ekoomba mu khukhola buli buraambi bulayi bwoosi.