Read lumasaaba 2 Timosewo 4 Bible Online

2 Timosewo 4 - lumasaaba bible

2 Timosewo 4

¹Mu moni tsya Wele ni tsya Kristo Yesu, nga niye ulikhalila babaandu baalamu ni babaafwa kimisaango, naluundi khukhwiitsa khweewe ni buyiinga bweewe, ise ikhuupilisa iwe ni kamaani ndi:

²oba imbuka ili induufu namwe s'ili induufu ta, iwe boolela ilomo sha Wele. Mu khuleekela khwoowo khongelesa, ubiiyise, yisamo babaandi kamaani, naluundi yokesanaatsaka khukhwikhaliilikha khukali.

³Khulwekhuuba imbuka ilikho yiitsa isi babaandu balilobela khurekeeresa indeekela ilimo itsamu, ne kamaru kaabwe kalibakhonjelesa khulondelela bibikhalimo ta, naluundi babeene bakhebusanile baleekeli babaabwe khubwaabwe khubaleekela byeesi bakana khurekeeresa.

⁴Balishuukha khukhwaama mu khurekeeresa bya ŋali batsye khurekeeresa bye tsingano busa.

⁵Ne iwe ukhaba uryo ta, n'ube mwirekefu busheele, yikhaliilika khutaambisibwa, khola kumulimo kwe khuboolela Kamakhuuwa Kamalayi, nga wolelesa buraambi bwoowo bulayi.

⁶Khulwekhuuba ari ise imbuka yase yoolile iye khuwaanibwayo khulwe babaandi; imbuka yase iye khurura mu shiibala muno yoolile.

⁷Ise nakhakilekho khusoolana bulayi nga ni shikanibwa, natimile tsindimo khukhwoola ikhumalilisa, nalondelele bye khufukiilila.

⁸Nashiryo shishiramile, ari ise khufuna lihabi lye bukhosefu, lyeesi Umukasya uli umukayi umwilama, akhaambe ise khu shifukhu shimaliilisi. Ne akhuba ise senyene ta, ne ni n'aabo boosi babaali ni khuukana nga baliindiilila khubonekha khweewe.

⁹Khakakho khukhwiitsa khaangu isi ndi khukhuumbonakho.

¹⁰Lwekhuuba Demasi waayiindekha ise senyene khulwe khuukana bibiindu bye mu shiibala muno, waatsya i Sesalonika. Kelesene waatsya i Galatiya, ni Tito waatsya i Dalumatiya.

¹¹Luka yenyene niye uli ano ni nase. Nga wiitsa yiitsa ni Mako, khulwekhuuba ali umulayi naabi mu khunjeeta ise.

¹²Tikiko ise namusindikha i Efeso.

¹³Nga wiitsa reera shikwaaro sheesi ise nalekhela Kalipo i Turowa. Reera ni buurone ubwo, ni khuminyisila ilala ubwo bweesi baarona khu mahaafu.

¹⁴Alekizanda umubasi uwe bibyuuma wayiikhola ise ilomo imbi naabi; Umukasya niye uli mwilihaasa ibyo byoosi byeesi akhola.

¹⁵Uli ni khumwiliinda naabi, khulwekhuuba niye akhaandisa naabi buurume bweefwe ni kamaani.

¹⁶Mu khwiwotsakho khwase khukhwanyoowa, imbaawo umuundu uwanjeeta ta; boosi bantsantsukha bandekha senyene. Inoomba ndi khali Wele abawaambile shiisa.

¹⁷Ne Wele niye uwaba ni nase, waamba ise kamaani ke khukuukuula buurume mu bwitsufu, ari nio manya Banaambo boosi bawulile. Ni nashiryo shino shambonesa ise khu khukhalila kumusaango kwe khufwa.

¹⁸Namanyile ndi kane Umukasya ambonise ise khukhwaama mu bihangafu byoosi, ambile bwela antsolise ise mu Buyiinga bweewe bwe Mwikulu. Shiriifwa shibe isi Umukasya biilo ni biilo. Amiina.

¹⁹N'usheesele Pulisikila ni Akula, ni be mu ntsu ya Onesiforasi boosi.

²⁰Erasto waarama i Korinso; ne Tuulofimu ise namulekha i Mileto nga ali umutsiina.

²¹Khakakho naabi wiitse nga imbuka iye bunyifu bubiriirifu ishiili khukhwoola ta. Yubulosi, ni Pudeni, ni Linasi, ni Kilawudiya, ni be buulebe boosi bakhusheesele.

²²Umukasya abe ni kumwoyo kwoowo. Bubweela bw'Omukasya bube ni nawe.