Read lumasaaba Tito 2 Bible Online

Tito 2 - lumasaaba bible

Tito 2

¹Tito, iwe waakha khuuleekela bibiindu bibiili bituufu byonyene.

²Boolela basakhulu babe nga betsiililisa, babe babaandu babaali baŋali, be kamakhula, naluundi babewula babeene. Babe babaandu batuufu mu khufukiilila, ni khuukana, ni khukhwikhaliilikha.

³Boolela bakyelema bakhulu, nabo baryo babe babebirisa bulayi, nga babaandu babakana Umukasya. Bakhaba babaali ni khulekelesa ta, naluundi bakhaba bameesi ta. Bali ni khuuba babaandu babaleekela bibiindu bilayi,

⁴nio akile bakyelema babaashiili b'ekhaana nabo banyalise khuuba bakyelema baalayi nga babaakana baseetsa baabwe naluundi ba maayi baalayi.

⁵Bakyelema babaashiili b'ekhaana bali ni khuubona bari beliinda bulayi naluundi akhali lisaanda ta, nga be shiisa, babaaliinda ango bulayi, babawulila baseetsa baabwe. Shino kane shibayeete nio alekhe khubawo umuundu na mutweela ukhomyaasa Ilomo ya Wele ta.

⁶Ni musaambo niyo ndweela, iwe n'ukhupilise basaani babaashiili baahele, khukhwiliinda bulayi.

⁷Mu buli shitweela iwe ni wiyokesanise nga she khuubonelakho isi babaaramile boosi. Ni mu khuleekela khwoowo uli ni khukhwokesana uri uli uwa ŋali naluundi urabira.

⁸Mu khuleekela khwoowo, raambisa lulimi lweesi umanya uri mbaawo umuundu namutweela unyala walulekelesa ta. Nga wakholile shino, ni basiku boowo kane kamaŋaanyu kabawambe, balekhe khukhulomakho shishiindu shoosi ta.

⁹Boolela bakulwa uri busheele bali ni khuwulila bakoosi baabwe ni khukhola buli shishiikanibwa, mu buli saambo. Bakulwa bakhakambuusa bakoosi baabwe,

¹⁰namwe bakheeba shishiindu khukhwaama khu bakoosi baabwe ta. Ne akhali ndi ni beyokesanise nga ni bali be tsisaambo tsindayi luundi nga babeyikinwa nio banyale khuweesa shiriifwa ibyo bibileekelwa bibiwaamba khu Wele Umuwonesi weefwe.

¹¹Lwekhuuba bubweela bwa Wele bwayiitsa khulwe khuuwonesa babaandu boosi.

¹²Wele akhuleekela ifwe khuulekha bye bubwoonaki ni khuulekha khukhwikoomba khwe bibiindu bye mu shiibala ta, ari nio khumenye buulamu bulayi bubuuli bwe bukhosefu mu shiibala muno.

¹³Khuli ni khukhwiyikina khukali nga khuliindiilila khubonekha khwe shiriifwa sha Wele weefwe umukhulu naabi, naluundi uli niye Umuwonesi weefwe, Yesu Kristo.

¹⁴Umweene uyo ewaanayo umweene khuukhumusa ifwe khukhwaama khu buli shishiindu she bubwoonaki shoosi, ari nio akaluse kimyoyo kyeefwe kikyele kimikhosefu. Niye akana ifwe khube babaandu babeewe babeene, naluundi ari khube babanyikhila mu khukhola bibiindu bilayi.

¹⁵Leekela bibiindu bino byoosi, khukhwiisamo babaandu kamaani ni khuubakolola mu mikhoosi kyaabwe, nga uraambisa bunyala bwoowo bweesi uli ni nabwo. Khakakho ubone uri mbaawo umuundu yeesi ukhulekelesa ta.