Read lumasaaba Tito 3 Bible Online

Tito 3 - lumasaaba bible

Tito 3

¹N'ushebusaatsake babaandu boowo nio babaatsake babaawulila bawuli ni khuuwulila abo boosi babaali ni bunyala. Khayo babe beerekefu khuukhola kimilimo kimilayi kyeesi bawuli baba baabalomele khuukhola.

²Bakhakanikha buubi khu bashaabwe ta, balekhe khukhwiwaambila mu bye khuulomana. Khayo babe bawolu nga bokesanisa intsibirisa indayi isi babaandu boosi.

³Lwekhuuba nafwe fwabeene khaale khwaba baasilu, nga sikhuwulila ta; khwaba khwawombesebwa, nga khwakoraanisibwa ni khukhwikoomba khwe bibiindu khwa buli saambo, khulwe kimikhoyo kikikhalimo ta. Abe khwonakisila imbuka yeefwe mu likoko ni mu libuba, nga babaandu baakhubiyila ifwe, ni nafwe nga khwababiiyila.

⁴Ne shiisa ni khuukana khuukali bya Wele umuwonesi weefwe ni byabonekha,

⁵Wele wakhuwonesa ifwe. Wele akhuwonesa ifwe akhuba khulwe buraambi bukhosefu bweesi khwakhola ta, ne khulwe shiisa sheewe, nga abirira mu khukhusiinga ifwe khwasaalikha bushaakha, naluundi wakhwisa ifwe bushaakha mu Mwoyo Umukhosefu.

⁶Wele akhutsukhakho ifwe Umwoyo Umukhosefu mu bukali khulwa Yesu Kristo, uli umuwonesi weefwe.

⁷Wele akhola shino ari nio manya khusiingibwekho bibyoonako byeefwe khulwe shiisa sheewe, nio khuryo khwikyele basikha babaali ni khukhwiyikina mu bulamu bubukhawawo ta.

⁸Buurume buno ilala buli bwa ŋali. Ise ingana ndi bibiindu bino ubireerekho ilala kamaani, nio manya abo babaafukiilila mu Wele betsiililise mu bulamu bwaabwe, nga busheele bakhola bibiindu bilayi. Bibiindu bino bilayi naabi, naluundi biyeeta babaandu boosi.

⁹Ne ukhehambatsakila mu khaando tsye busilu tsitsiwaamba khu bakuuka beefwe, namwe tsikhaando ni khulomana bibiwaamba khu makaambila ka Musa ta. Bibiindu nga ibyo sibiyeeta ta, naluundi sibilimo itsamu ta.

¹⁰Ne abo babareera tsintsawukhana, n'ubareewula ifuunda indweela namwe tsibili, lwanyuma nga balobile khukhurekeeresa iwe, wakame khu kholakana ni nabo.

¹¹Lwekhuuba wamanya uri umuundu uli aryo aba wayonekha, naluundi umweene aba ekhalila kumusaango.

¹²Nga neetsile khurumana Aletema namwe Tikiko is'uli, khakakho naabi wiitse i Nikopoli isi ise ikhaabe. Lwekhuuba nakhalilewo khuuba ibweene iyo mu biseela bye kumunaane.

¹³Khakakho naabi khuuyeeta Zena umunamakaambila ni Apolo, mu lukyeendo lwaabwe, nga ubawa buli shitweela shishikanibwa.

¹⁴Boolela babaandu beefwe bamanye khuraambisa imbuka yaabwe bulayi, nga bakhola bibiindu bibyombekha, naluundi bibiyeeta babaandu boosi.

¹⁵Abo boosi babaali ni nase baakhusheesele iwe. Nawe n'ukhukheesele abo babaali bafukiilili basheefwe. Tsikhabi tsa Wele tsibe ni nanywe mweesi.