Read lumasaaba Filemoni 1 Bible Online

Filemoni 1 - lumasaaba bible

Filemoni 1

¹Buurume buno bwaama isi ise Paulo, nga ndi umubowe, khulwa Kristo Yesu; naluundi bwama isi uwe buulebe, Timosewo. Khukhuronela iwe Filemoni, uli umukanwa weefwe naluundi umuraambi uwasheefwe.

²Naluundi khuburonela bafukiilisi boosi babaabuusana khuloombela mu ntsu yoowo, ni Apofiya umukooko weefwe, ni Alikipo umuraambi uwasheefwe.

³Khuloomba khuri khali Wele Paapa, n'Umukasya weefwe Yesu Kristo babaweele inywe tsikhabi ni lukoosi.

⁴Uwe buulebe Filemoni, busheele ise n'imba nga inoomba, isiima Wele naluundi ise ikhuloombelakho iwe.

⁵Khulwekhuuba ise imbulila naabi khu biindu bibiwaamba khu khufukiilila khweesi uli ni nakhwo mu Yesu Kristo, ni khuukana khweesi uli ni nakhwo isi bakhosefu ba Wele boosi.

⁶Khuloomba khwase khuli ndi butweela bweefwe ni nawe nga babaandu babafukiilila mu Wele, khali khukhureerere ifwe fweesi ikholakana indayi iya buli ikhabi, musaambo yeesi khukananilamo atweela buulamu bweefwe mu Kristo.

⁷Khulwekhuuba uwe buulebe, khuukana khwoowo khweesi uli ni nakhwo, khwandereere ise kumwikhoyo kumukali, naluundi khwantsisilemo ise kamaani. Iwe wekhoyesele kimyoyo kye bakhosefu boosi babafukiilila mu Wele.

⁸Nashiryo khulwe lomo yino, naluundi nga uwe buulebe khulwa Kristo, nandibeele umunyindalifu naabi khukhulakila iwe khukhola shishiindu shishikaniwa.

⁹Ne khulwekhuuba ise ikhukana iwe naabi, indikho ikhwikontselela. Ikhola shino mu lisiina lya Kristo Yesu, akhaba nga ise Paulo, ari ndi umusaakhulu, naluundi ndi umubowe khulwa Kristo.

¹⁰Nashiryo indikho ikhwikontselela khulwa Onesimo, uli umwaana uwase umweene, khulwa Yesu Kristo. Ise nekyela umusaali wa Onesimo mu bye kumwoyo nga ndi mu bubowe.

¹¹Amataayi ako, abe s'ali uwe kumukaso isi iwe ta, ne ari ali uwe kumukaso isi iwe ni nase.

¹²Ni khuukana khwase khwoosi, ari imwakaanisa khukobola isi iwe uli.

¹³Ise nandikoombile khumenya ni naye ino, nga ndi mu bubowe khulwe khulaangilila kamakhuuwa kamalayi, nio aba umwakaanisi wase mu shifwo shoowo.

¹⁴Ne ise shingana nakhuwanyiinya iwe khukhola bubwakaanisi ise ndi ta. Ingana wamweene ushikhole nga shaama khu bulayi bwoowo. Nashiryo ise shingana ikhole shishiindu shoosi sheesi iwe ukhafukiilisile ta.

¹⁵Shinyala shaba shiri Onesimo akhururakho khuumala imbuka ifwiiti, ari nio akile akobole khu menya ni nawe khumala biilo ni biilo.

¹⁶Ne ari s'ali umukulwa busa nga n'aba amataayi ta; ari afuurisakho umukulwa. Khulwekhuuba ari ali uwe buulebe umukanwa mu Kristo. Ise ari andikho kumukaso kumukali naabi. Akhaba khus'iwe, kane akhubekho kumukaso kumukali naabi, khuyilila atweela nga umuundu umukulwa naluundi nga uwe buulebe mu Kristo.

¹⁷Nashiryo, noola iwe untsambaasakho ise khuuba uwashoowo, n'umwakaanile musaambo niyo indweela nga abe niwanditsakaaniile ise.

¹⁸Abe noola Onesimo wakhukholakho iwe shiibi shoosi, namwe iliwo sheesi umubaantsa, ibyo khayo bibe khus'ise.

¹⁹Ise Paulo, urona ni kumukhono kwase kumweene, nga inoma indi ise ikhaakhuliyile. Ne iwe wamweene washimanya uri uliwo khulwase.

²⁰Nashiryo, uwe buulebe, n'umambile ise shiisa khulw'Omukasya. Nga uwe buulebe uwashaase mu Kristo, n'untsisemo ise kamaani.

²¹Ikhaba nga n'indi khurona, naamanyile ndi kane ukhole sheesi ndikho ikhuloomba. Ise naamanyile ndi kane ukhole ni bibiminyisakho byeesi ise ikhuloombile.

²²Mu mbuka niyo indweela, n'unengekhareengekhele shiseenge she khukonamo shitweela. Khulwekhuuba niyikina ndi Wele kane arekeerese khuloomba khwenywe mweesi, anyalise khukhungobosa ise isi muli.

²³Epafura, uli umubowe uwashaase khulwa Kristo Yesu, waabasheesele.

²⁴Ni baraambi bashaase, Mako, Arisitaluko ni Demasi, ni Luka, nabo baabasheesele.

²⁵Khayo bubweela bw'Omukasya weefwe Yesu Kristo, bube ni nanywe mweesi.