Read lumasaaba Baheburania 1 Bible Online

Baheburania 1 - lumasaaba bible

Baheburania 1

¹Mu bifukhu bye khaale, Wele aakanikhatsaka isi bakuuka beefwe kimiluundi mikali musaambo tsingali, nga abirira mu baŋoosi.

²Ne mu bifukhu byalwanyuma bino, Wele akanikha ni nafwe nga abirira mu Mwaana weewe isi aarobola khuuba umusikha wa byoosi. Luundi khuubirira mu niye aabuumba shiibala shoosi.

³Mu mwaana nimwo mumuuli khuumelamela khwe shiriifwa sha Wele, luundi niye shifwaananyi sheewe shisheene. Naluundi Umwaana mweene niye uwaambiliile shiibala shoosi ni shilomo sheewe she kamaani. Ne n'amala khukhola kumulimo kwe khusiinga bibyoonako, aryo ekhala khu mukhono kumulayi kwa Wele umukhulu we mwikulu.

⁴Umwaana ekyela umukhulu khufuura bamalayika, nga ni lisiina lyeewe lyeesi aweebwa ni lili likhulu naabi khufuura lilyaabwe.

⁵Lwekhuuba mbaawo na mutweela khu bamalayika esi Wele alomakho ari, “Iwe uli umwaana wase, shaleelo nekyelile Paapawo ta.” Namwe luundi mbaawo malayika isi Wele alomakho ari, “Ise kane imbe paapawe, ni naye kane abe Umwaana wase ta.”

⁶Ne Wele nga akaanisa Umwaana weewe umukiboole mu shiibala aloma, ari, “Lekha bamalayika ba Wele boosi bamwisaaye.”

⁷Ne isi bamalayika beewe Wele aloma ari, “Niye akhola bamalayika beewe imbewo, ni babakaanisi beewe nga khukhwimemula khwe kumulilo.”

⁸Ne khu mwaana aloma ari, “O Wele, shitsoloŋo shoowo kane shibatsakewo biilo ni biilo, ni khuwula khwoowo khulayi nikhwo khuwula khwe buyiinga bwoowo.

⁹Iwe wakana bukwalaafu, wabiyila bubwoonaki. Isho nisho shishakila Wele, Wele woowo akhwawulakho, wakhuwa shiriifwa khufuura bashoowo, nga akhutsukhakho kamafura ni kumwikhoyo.”

¹⁰Naluundi aloma ari, “Iwe Umukasya, makiboole warawo shiibala, ni likulu nalyo nilyo kumulimo kwe kamakhono koowo.

¹¹Nibyo byoosi biliwawo, ne iwe kane uramewo. Ibyo byoosi bilikora nga shikwaaro.

¹²Ulibifuumba nga shikwaaro, naluundi nabyo nga shikwaaro bilishuusibwa. Ne iwe kane ubatsakewo nga sushuukhakho ta, ni kimiiko kyoowo sikyakama ta.”

¹³Ne malayika shiina yeesi Wele alomakho ari, “Yikhala khu mukhono kwase kumulayi, khukhwoolesa ni ndikalusa basiku boowo khuuba kharebe kheesi ulaambisakho bikyele byoowo?”

¹⁴Bamalayika boosi sibali nikyo kimyoyo kikyakaanisa, kikyarumaniwa khukhwakaanisa, lwabo babaatsya khusikhila buwonesi?