Read lumasaaba Baheburania 10 Bible Online

Baheburania 10 - lumasaaba bible

Baheburania 10

¹Khukhwaama nga kamakaambila ka Musa ni kali shishiniini busa she bibiindu bibiitsya khwiitsa, akhuba shifwaani shisheene sha ŋali ta, sikanyala kapyeluusa ibo babeetsa khukhwisaaya ni tsisaayilo tsikhashuukhakho tseesi bawaanayo buli busheele, buli mwiiko ta.

²Lwekhuuba kamakaambila kaba kakanyala kasiinga bibyoonako khali bibiwaanibwayo byakhwakamisibwa khuwaanibwayo? Lwekhuuba babesaaya Wele iba nga babaŋoonebwela ilala bibyoonako byaabwe kumuluundi mutweela, khali sibewulila luundi mu myoyo kyaabwe bari bali babonaki ta.

³Ne mu bibiwaanibwayo bino, mulimo bibikhebusa babaandu bibyoonako byaabwe bya buli mwiiko.

⁴Lwekhuuba kamafuki ke tsiwuunwa ni tsimbusi sikanyala khurusawo bibyoonako ta.

⁵Ni lwe lomo yino, Kristo n'etsa mu shiibala, akanikha isi Wele ari, “Biwongebwayo ni biwaanwa s'ubikana ta, ne njeeba kumubili kweesi waŋoonaŋoonela ise.

⁶Shiwikhoyela biwaanwa lwe silikakha namwe bibiwongebwayo lwe bibyoonako ta.”

⁷Nio Kristo tsana waloma luundi ari, “O Wele, ise ndi ano uyusi, netsile khukhola byeesi ukana, nga ni baarona bibimaamba khus'iise mu burone bwe kamakaambila.”

⁸Khunyoowa Kristo aloma ari, “Siwasiima namwe siwekhoyela biwaanwa namwe bibiwongebwayo, ni bibyokhebwa lwe silikakha ta, ni nebyo bibiwaanibwayo lwe khuurusawo bibyoonako ta,” ikhaba nga bino byawaanibwayo nga kamakaambila ni kaloma lwe bibyoonako.

⁹Luundi ndi waaloma ari, “O Wele, ise ndi ano uyusi, neetsile khuukhola byeesi ukana.” Shino Kristo aashiloma lwekhuuba niye aarusawo tsisaayilo tsitsanyoowa, nio arewo isaayilo iyeewe umweene.

¹⁰Ni lwe khuukana ukhwo, ifwe khwayikela bakhosefu lwe khuubirira mu khuwaanibwayo khwe kumubili kwa Yesu Kristo, kumuluundi mutweela kwonyene khulwa boosi.

¹¹Ne buli musaayi emikha buli shifukhu nga akhola kumulimo kweewe kwe bubwakaanisi, nga awaanayo buli busheele bibiwongebwayo bye saambo niyo ndweela bibikhanyala khuurusawo bibyoonako ta.

¹²Ne Kristo niye aawaanayo isaayilo indweela yonyene lwe bibyoonako bya ndaalo tsoosi, lwanyuma wekhala aasi khu mukhono kumulayi kwa Wele,

¹³nga aliinda khukhwoolesa basiku beewe ni balikalusibwa khuuba shitsoloŋo she khuulaambisakho bikyele byeewe.

¹⁴Lwekhuuba lwe isaayilo yeewe indweela yonyene, Kristo waayikesa abo boosi beesi areera isi Wele, khuuba bakhosefu.

¹⁵N'Umwoyo Umukhosefu naye akhuweelakho bujulisi khu lomo yino. Khunyoowa nga aloma ari,

¹⁶“Eyino niyo indakaano yeesi intsya khukhola ni nabo, lwanyuma lwe mbuka iyo. Ise samweene indiira kamakaambila kaase mu myoyo kyaabwe, luundi indikarona mu byambaaso byaabwe.”

¹⁷Luundi aloselakho ari, “Shindishebulila luundi bibyoonako byaabwe, ni biibi byeesi bakhola ta.”

¹⁸Ne awo aba khukhwiyakhila bibyoonako, sishikaniwa luundi she khuwoonga lwe khurusawo bibyoonako ta.

¹⁹Ni nashiryo be buulebe, ifwe khuli ni lukoosi khukhwinjila mu shifwo shifuura bukhosefu, khulwe kamafuki ka Yesu,

²⁰khuubirira mu ntsila imbya ikhuyila mu bulamu. Naluundi intsila yino inamu niyo yeesi Yesu akhwikulilawo mu ngubo inandiitse, niyo kumubili kweewe.

²¹Naluundi khukhwaama nga ni khuli n'umusaayi ufuura bukhulu ulolelela intsu ya Wele,

²²khakhwisyeende aambi ni Wele ni kumwoyo kwa ŋali ni khufukiilila khwa ŋali, ni kimyoyo kyeefwe atweela ni kimibili kyeefwe nga kyamalilile khusiingiwa ni kameetsi kamakwalaafu khurusawo bibyambaaso biibi.

²³Lekha khuwandalalile mu khwiyikina khweefwe khweesi khwafukiilila akhali khuyengaana ta, lwekhuuba Wele uwakhulomela niye ali umwiyikinwa.

²⁴Naluundi khakhwaambaase khubone isaambo yeesi khunyala khwekhupilisamo khukanana ni khukhola bulayi.

²⁵Ifwe khukhakamisa khubuusana atweela nga babaandi ni bakhola ta, ne khakhuwaangasane fwenyene na fwenyene, ni khufuurakho nga ni mubona ndi shifukhu sh'Omukasya shili aambi khukhwoola.

²⁶Ne ni khuŋalilamo khwoneka lwanyuma lwe khumanya bwa ŋali, mbaawo luundi shishiwaanibwayo shishiramileyo she khuwoonga lwe bibyoonako ta.

²⁷Khurusakho khuurya isho shishiramileyo shishiitsya khwiitsa nikwo kumusaango, ni kumulilo kwe kamaani kukulihesa ibo babaakhaandisa Wele.

²⁸Umuundu yeesi uwaminyalila kamakaambila ka Musa eribwa akhali khuwaambilwa shiisa ta, khukhwiimikha khu bajulisi babili namwe bataru.

²⁹Ne shiliiba shiryeena isi muundu ulekelesa Umwaana wa Wele, wamura aasi ebikyele byeewe? Uyo ukhenaanayo khu mafuki ke ndakaano kakaamureerera bukhosefu, naluundi wakhoma Umwoyo we bubweela? Yambaasa khu shitaambiso shishaakhila umuundu uyo.

³⁰Ifwe khwaamanya Wele uyo uwaaloma ari, “Khuusasula khukhwase, ise indiliha.” Naluundi waaloma ari, “Umukasya alikaya babaandu beewe.”

³¹Shili shishiindu shishiriisaka naabi khuukwa mu mikhono kya Wele umulamu.

³²Ni mushebulile bifukhu bibyabira lwanyuma lwe buwaanga khubamulikhila nga ni mwatsiinisibwa ni bibiindu bikali, ne mwekhalilikha.

³³Imbuka ikiindi mwakhomewa luundi mwakubyeengebwa mu lubuula, mu mbuka ikiindi mwemikha atweela ni naabo babataambisibwa.

³⁴Naluundi mwawaambila shiisa ibo babaaba mu bubowe, mwafukiilila ni kumwikhoyo khurusibwakho bibiindu byeenywe lwekhuuba mwabeene mwaba mwaamanyile nga ni muli ni bibiindu bibifuura bulayi luundi bibimenyawo.

³⁵Ni nashiryo mukhatuuma kumwiyikino kweenywe ta, lwekhuuba kuli ni shiwaanwa shikhulu.

³⁶Inywe shibakhila khukhwikhalilikha nio nga mwakholile sheesi Wele akana, mulifuna sheesi abalomela.

³⁷Nga ni shiloma luundi shili, “Lwekhuuba ishiramayo imbuka injeekhe iri, uyo uuli khukhwiitsa abe woolile, singane ekhalayo ta.

³⁸Ne umukwalaafu wase aliiba mulamu lwe khufukiilila, ne nakobolayo inyuma, kumwoyo kwase sikumwikhoyela ta.”

³⁹Ne ifwe sikhuli batweela khuubo babelayo inyuma mu khuhela ta. Ne khuli batweela khuubo babafukiilila, lwe khuwonesa buulamu bweefwe.