Read lumasaaba Baheburania 12 Bible Online

Baheburania 12 - lumasaaba bible

Baheburania 12

¹Ni nashiryo, ifwe khukhwaama nga bukali bwe bajulisi babaali nga namufweeli ni bakhwibotokheleele ifwe, khayo nafwe khure alubeka buli shiindu shoosi shishikhusitowelela, ni shishoonako shishikhwibowelelakho, ne khakhutime nga khwaamaliliile mu mwoyo tsindimo itso tsitsiili iburaangisi weefwe.

²Khakhwoomisile tsimoni tseefwe khu Yesu, umurakikhisi luundi umumalilisi we khuufukiilila khweefwe, niye khulwe kumwikhoyo kukwaba kwaamuliindiliile, aryo ekhaliilikha kumusalaba, waleekelesa tsisoni tsakwo, ne ari wekhaale khu mukhono kumulayi kwe shitsoloŋo sha Wele.

³Ni mumwaambaase khu niye nga n'ekhaliilikha bubiiyile khukhwaama khu boonaki, nio manya nanywe kimyoyo kyeenywe kilekhe khuwamo kamaani ni khukhwiwusa ta.

⁴Inywe mu khusoolana khweenywe ni shishoonako mushiili khurekana khukhwoolesa ni khuutsukha kamafuki ta.

⁵Naluundi mwaayibilila khuukaambila khukhubakanikhakho inywe khuri: “Mwaana wase, ukhalekelesatsaka khuulatsakakho khw'Omukasya ta, namwe ukhawatsakamo kamaani n'aba nga akhwikiitsakho ta.

⁶Lwekhuuba uyo yeesi isi Umukasya akana, amulatsakakho, naluundi awa shitaambiso uyo yeesi isi afukiilila nga umwaana.”

⁷Ni mwikhalilikhe byeesi mutaambisibwa nga khulatsakakho, Wele aba ali khubayila inywe nga babaana. Lwekhuuba mwaana shiina isi paapawe akhalatsakakho?

⁸Inywe ni mulekha khulatsibwakho nga babaana boosi ni baba, muba nga simuli babaana babeene belala, ne muba muli babaana babeetswa.

⁹Naluundi ifwe khuli ni ba paapa beefwe be kumubili babaakhulatsakakho, ne khwabesamo shiriifwa. Ne sishifuurisa naabi ifwe khukhwiwaanayo isi Paapa we kimyoyo kyeefwe nio khube balamu!

¹⁰Lwekhuuba ba paapa beefwe be kumubili bakhulatsakakho mu mbuka ifwiiti nga ni bakana, ne Wele ashikhola lwe bulayi bweefwe, nio khunyale khukabanana khu bukhosefu bweewe.

¹¹Khulatsakakho isi khubeelawo khuba khwe butsiina, ne akhuba khwe kumwikhoyo ta, ne lwanyuma ibo babalatsakiwakho banyoola shishaamo she bukwalaafu ni lukoosi.

¹²Ni nashiryo, ni muwandalase kamakhono keenywe kakatendemeele, ni kamesikamo keenywe kakafiliile nako mukakolole.

¹³Ni mwikholele tsintsila tsingwalaafu tse khukyendelakho, nio akile umuleme alekhe khulemalila ilala ta, ne awonesewe.

¹⁴Ni mukhakekho khuuba mu lukoosi ni babaandu boosi, ni bulamu bwe khukhwiwaanayo, lwekhuuba akhali khukhwiwaanayo mbaawo umuundu namutweela ulibona khu Mukasya ta.

¹⁵Ni mubone muri mbaawo umuundu yeesi urusibwakho bubweela bwa Wele ta, naluundi shisina she bululu shilekhe khusisina khubareerera bikosi ni khukhwonakisa bakali.

¹⁶Naluundi ikhabawo umuundu umuyeyani namwe ukharya Wele nga Esau n'aaba, uwakulisa bukhulu bwe khusaalikhana bweewe bwe khuuba umwaana umukiboole lwe liwuumba lye biilyo ta.

¹⁷Lwekhuuba inywe mwamanya muri lwanyuma lwayo niye n'akana khukhwiila khu busikha bwa paapawe, baamwikaana lwekhuuba s'afuna ikhabi ye khushuusamo ta, ikhaba nga aalila kamasika nga akana ikhabi iyo.

¹⁸Inywe simwayitsa khu lukiingi lulunyala khuuwaambikhakho, naluundi luluburukha ni kumulilo, ni shishilima namukoto, ni ikhuungu, nga babaandu ba Isiraeli ni beetsa ta,

¹⁹khukuula khwe khoombi, namwe isi likono lye bilomo lyeesi bawulila, bekontselela bari balekhe khuliwulila kumuluundi kwe khabili ta,

²⁰lwekhuuba sibanyala khukhwikhalilikha khuulakila khukhwaloma khuri: “Abe ikhaba isolo ni yiitsa yatiilakho khu lukiingi luno, yaakha ikhupiwe kamabaale.”

²¹Ibyo bibyabonekha byaba bye shiriisa naabi, ni khuushilomakho, Musa waaloma ari, “Indi khuunikina naabi lwe khuurya.”

²²Ne mwetsile khu lukiingi Sayuuni, ni mu shiriimba sha Wele umulamu, Yerusalemu she mwikulu, isi bikana ni bikana bye bamalayika mu lubusano lwe kumwikhoyo,

²³ni libusanilo lye babaandu ba Wele baakiboole beesi bawandikhisa kamasiina kaabwe mwikulu isi Wele umweene umukayi wa boosi, n'isi kimyoyo kyaabo babapyeelusibwa,

²⁴n'isi Yesu umutubaasi we Ndakaano imbya, n'isi kamafuki kakahanyiwa, kakanikha bilomo bilayi khufuuriisakho kamafuki ka Abeli.

²⁵Ni nashiryo mwitsililise mubone muri, simwikaana byeesi aloma ta. Lwekhuuba nga ibo ni bakhanyala khukhwilukha shitaambiso shooyo uwabareewula khu shiibala, ne ifwe khulinyala khuryeena khukhwilukha ni khuba nga sikhuwulila khureewula khwooyo khukhwaama mwikulu.

²⁶Khu mbuka iyo, likono lyeewe lyanikinisa shiibala, ne ari waaloma ari: “Ishiramayo kumuluundi kuundi mutweela inikinise shibala, ne akhuba shiibala shonyene ta, ne ni likulu lyeene.”

²⁷Tsilomo tsino tsitsiloma tsiri, “Ishiramayo kumuluundi kuundi mutweela,” tsokesa khuurusawo bibiindu ibyo bibinikinisibwa nga nibyo bibyambuumbibwa nio ibyo bibikhanyala khuunikinisibwa biramewo.

²⁸Ni nashiryo, khukhwaama nga ni khuli khuufuna buyiinga bubukhatengaasibwa ta, khakhube babaandu babaasiima, khuryo khwihaaneyo isi Wele mu khwisaaya khukhukaniwa mu buwolu ni khuurya.

²⁹Lwekhuuba Wele weefwe niye kumulilo kukuliliba kwahesa!