Read lumasaaba Baheburania 13 Bible Online

Baheburania 13 - lumasaaba bible

Baheburania 13

¹Ni mwiloosele khuukanana nga be buulebe.

²Mukhebililatsaka khukhwikhoyela bakyeni ta, lwekhuuba mu khukhola khuryo, babaandu balala bekhoyela bamalayika nga sibashimanyile ta.

³Ni mushebulile babaali mu bubowe, mufwanikhe nga nanywe bababowebwa atweela ni nabo, ni naabo bababirisibwa buubi; mufwanikhe nga nanywe babaali mu khubonabona.

⁴Bukhwaale bwaakha bureebwemo lukoosi ni babaandu boosi, ni bulili bwe bakhwaalikhe bwaakha khuuba nga sibulikho lisaanda lyoosi ta, lwekhuuba Wele alikhalila kumusaango be lukhobe ni bayeyani.

⁵Ni mube babaandu babaali ni bulamu bubukhalimo bulyaanga mu mapeesa ta, ne byeesi muli nabyo bibamalatsake, lwekhuuba Wele aloma ari: “S'indibalekha namwe s'indibaantsukha ta.”

⁶Nashiryo, khuloma akhali khukhwikanakana khuri, “Umukasya niye umuyeeti wase, s'indiiryakho shishiindu shoosi ta. N'umuundu anyala khukhukholakho ise shiina?”

⁷Ni mushebulilatsake baraangilisi beenywe, babaakanikha Ilomo ya Wele isi muli. Ni mwaambaase ibyo bibyaama musaambo indayi iye buulamu bwaabwe, ni nanywe mulondelele khuufukiilila khwaabwe.

⁸Yesu Kristo arama shitweela busa, ingoloobe, shaleelo, ni biilo ni biilo.

⁹Mukhayilibwayilibwa ni khuuleekela khukhuubonekha nga khuukyeni isi muli ta. Shiba shilayi kimyoyo kyeefwe khuuwaangasibwa ni bubweela, ne akhuba lwe khuuwaamba kamakaambila kakawaamba khu biilyo ta, lwekhuuba abo babawaamba kamakaambila kano sibayeetebwa ni nako ta.

¹⁰Ifwe khuli ni shisheeso khweesi abo babesaaya mu weema bakhafukiilisibwa khuulya khubyakhwo ta.

¹¹Umusaayi ufuura bukhulu areera kamafuki ke bisolo mu shifwo shifuura bukhosefu lwe khurusawo bibyoonako, ne kimilaambo kyatso kyokhebwela ibulafu we tsiweema.

¹²Nashiryo Yesu naye aryo, atsiinisiwila ibulafu we kumulyaango kwe shiriimba nio areerere babaandu bukhosefu lwe kamafuki keewe.

¹³Aso, khakhutsye ibulafu we tsiweema is'ali, nga khwetyuukhile kumutaambo kweesi aba nakwo.

¹⁴Lwekhuuba ano sikhuli ni shiriimba shishimenyelawo ilala ta, ne khuweentsa shiriimba shishiitsya khubawo mu bulamu bubwiitsa.

¹⁵Nashiryo, khuubirira mu Yesu, khakhuwaaneyo busheele isi Wele khusaaya khwe khubuyila, nibyo bibyaano bye kiminwa kyeefwe, kikiruumbula lisiina lyeewe.

¹⁶Ne mukhebilila khukholatsaka bulayi, ni khukabanana ni basheenywe bye muli nabyo ta, lwekhuuba bino bili nibyo biwaanwa bibikhoyesa Wele.

¹⁷Ni muwulilatsake baraangilisi beenywe, mukholatsake byeesi babaloma. Nibo bababoolela inywe nga babaandu babaakhaabe ni she khukhwilomakho. Ni mubawulilatsake nio banyale khukhwoolelesa kumulimo ni kumwikhoyo, ne akhuba khubasitowelela ta, lwekhuuba shino mbaawo sheesi shibayeetakho ta.

¹⁸Ni mukhuloombelekho. Ifwe khwiyikina khuri, khuli ni bibyambaaso bikwalaafu, luundi khukana khwibirise ni lukoosi mu buli saambo yoosi.

¹⁹Ni musaambo ya buraawa, imbekontselela muloombe, nio inyale khukobosebwa isi muli khaangu.

²⁰Ari inoomba Wele uwe lukoosi, uwabakobosa khukhwaama mu bafu khuubirira mu mafuki ke ndakaano ikhawawo, niye Umukasya Yesu, luundi, niye Umwaayi Umukhulu we kamasheese,

²¹abawe byoosi bibiili bilayi lwe khukhola byeesi akana. Luundi khali akholile mus'iinywe ibyo bibimwikhoyesa khulwa Yesu Kristo. Shiriifwa shibe isi niye, biilo ni biilo. Amiina.

²²Bebuulebe, imbaloomba mwikhalilikhe buurume bwase buno bububawandalasa, lwekhuuba naabaroneele mu biimbi.

²³Ingana khubaboolela ndi yaaya weefwe Timosewo bamukangulula. N'aliba nga wolile, indiitsa ni naye khubabona.

²⁴Ni mukhusheesele baraangilisi beenywe boosi, ni bakhosefu ba Wele boosi. Bebuulebe khukhwaama mu Itali babasheesa.

²⁵Bubweela bube ni nanywe mweesi.