Read lumasaaba Baheburania 2 Bible Online

Baheburania 2 - lumasaaba bible

Baheburania 2

¹Nashiryo ifwe khwaakha khukhwinaanayo naabi khu biindu bya ŋali byeesi khuwuliile, nio khulekhe khukoraanisibwa ta.

²Lwekhuuba noola shilomo shishalomebwa ni bamalayika shaba ni shisheene, ni khukhwoneka khwoosi ni bumiinyi byanyoola shitaambiso shishibyakhila.

³Nafwe khulinyala khuryeena khutitukha, noola sikhwinaanayo isi buwonesi bukhulu bufwaana buryo ta? Buwonesi makiboole bwanyoowa khulomewakho n'Umukasya, nio bwaŋaŋasibwa is'ifwe ni naabo babamuwulila.

⁴Wele umweene aloselakho bujulisi bweewe khu bye kamakaanga, ni bubonelo, ni bibiyaangisa bibiindi swa busa, ni biwaanwa by'Omwoyo Umukhosefu bibyakabibwa nga khuukana khweewe ni khuli.

⁵Lwekhuuba bamalayika sibali nibo beesi Wele awa khuwula shiibala isho shiitsya khwiitsa, sheesi khulomakho ta.

⁶Ne aliwo isi umuundu mutweela alomela ari, “Umuundu niye shiina, nio iwe khumushebulila. Namwe Umwaana w'Omuundu iwe khumwinaanayo?

⁷Iwe wamubuumba khuutaambakho khakyeekhe khuuba nga bamalayika, wamukwaarisa liyabi lye shiriifwa ni lukoosi.

⁸Waara bibiindu byoosi aasi e bikyele byeewe.” Wele khuura bibiindu byoosi aasi e bikyele byeewe, mbaawo na shitweela sheesi Wele alekha khuura mu bunyala bweewe ta. Ni naari sikhubona nga bibiindu byoosi bili mu bunyala bweewe ta.

⁹Ne khubona Yesu uwakholewa nga ataambakho khakyeekhe khuuba nga bamalayika; ari niye wakwaarisibwa shiriifwa ni lukoosi, lwe khutaambisibwa khwe khuufwa, nio akile lwe bubweela bwa Wele, anyale khutsemakho khuufwa khulwa buli muundu.

¹⁰Lwekhuuba Wele shamwaakhila, nga khulweewe umweene, luundi nga mu niye buli shiindu shoosi shareewawo khufukiilila Yesu, uuli umweene umurakikhisi luundi umukhulu we buwonesi. Aryo aataambisibwa nio akile areere babaana bakali mu shiriifwa.

¹¹Khulwekhuuba Yesu uyo ureera bukhosefu, ni naabo beesi areerera bukhosefu bali ni Wele nga Paapa waabwe. Shino nisho shishikila Yesu walekha khuwaambiwa tsisoni khubalaanga ari babandaaye ta.

¹²Niye aloma ari, “Indirumbula lisiina lyoowo isi babandaayase. Indiimba kimyeenya kye khukhubuyila iwe mu lubusano lwe bafukiilisi.”

¹³Luundi aloma ari, “Indiira bubwiyikinwa bwase mu Wele.” Naluundi ndi ari: “Bona ise ndi ano ni babaana beesi Wele aamba ise.”

¹⁴Lwekhuuba nga babaana ni bali ni kumubili ni kamafuki, ni naye aryo akabananila atweela ni nabo mu khuba umuundu, nio manya khuubirira mu ntsila ye khuufwa, anyale khuhesa kamaani ke khuufwa nga niko Sitaani.

¹⁵Ni mu maani kano anyale khukangulula ibo bababowebwa buulamu bwaabwe bwoosi nga barya khuufwa.

¹⁶Lwekhuuba mwilala sibali bamalayika nibo beesi ayeeta ta, ne njeeba babetsukhulu ba Iburayimu.

¹⁷Ni nashiryo aakha khuuba nga babandaaye beewe ni bali musaambo tsoosi, nio anyale khuuba Umusaayi ufuura bukhulu, uwe shiisa luundi umwiyikinwa mu bwakaanisi bwa Wele, lwe khuusikula babaandu mu byoonako byaabwe.

¹⁸Lwekhuuba niye umweene ataambisibwa mu khukhakibwa khweewe, naye aryo ari anyala khuyeeta ibo babaali mu khukhakibwa.