Read lumasaaba Baheburania 3 Bible Online

Baheburania 3 - lumasaaba bible

Baheburania 3

¹Ni nashiryo be buulebe bakhosefu babakabananila atweela ni nafwe mu khulaangibwa khwe mwikulu, ni mwomisile bibyambaaso byeenywe khu murume luundi umusaayi ufuura bukhulu uwe khufukiilila khweesi khubuula, nga niye Yesu.

²Niye aba umwiyikinwa isi uyo uwamurobola, nga Musa n'aba umwiyikinwa mu buraambi bwe mu ntsu ya Wele.

³Ne Yesu niye akhila shiriifwa shikali khufuura Musa, nga ni shili ndi, uyo uwombekha intsu ali ni shiriifwa khufuura intsu inyene.

⁴Lwekhuuba buli intsu ibakho n'umwombakhi wayo, ne umwombakhi wa byoosi niye Wele.

⁵Ne Musa aaba umwiyikinwa mu buraambi bwoosi bwe mu ntsu ya Wele nga umwakaanisi wamwo, nga akanikha khu biindu ibyo bibyaba bitsya khulomewakho lwanyuma.

⁶Ne Kristo aaba umwiyikinwa nga Umwaana ulolelela byoosi bye mu ntsu ya Wele. Ni nafwe khuli intsu yeewe, ni khuba nga khuwandalalila mu mwiyikino kweefwe ni kumwikhoyo.

⁷Nashiryo, nga Umwoyo Umukhosefu n'aloma ari, “Shaleelo ni muwulile likono lyeewe.

⁸Mukhahandalasa kimyoyo kyeenywe ta, nga esi mwaminyaalila khu shifukhu she khukhakibwa nga muli mu mubiimbi.

⁹Ibweeneyo esi bakuuka beenywe bakhakilisila ise luundi bantsema, ni mu miiko kamakhumi kane babona buraambi bwase.

¹⁰Nilwa shino nakhalalila kumuboolo ukwo, naloma ndi, ‘busheele baborokha mu ntsambaasa ye kimyoyo kyaabwe, naluundi baakhumanya tsintsila tsase ta.’

¹¹Nga ni netsuba mu lirima lyase ndi, ‘Sibalingila nakhafwiiti khoosi mu shifwo sheesi nandibaweele khuwolelamo ta.’ ”

¹²Bebuulebe, ni mubone muri, mwiliinda mulekhe khubamo na mutweela mus'iinywe uwe kumwoyo kumwonaki kukukhafukiilila ta, lukana kukukila umuundu wakwa waarura khu Wele umulamu.

¹³Nashiryo, ni mwisanemo kamaani mwenyene na mwenyene busheele, niiba nga iliyo shifukhu shishilaangibwa bari, “Shaleelo.” Nio ilekhe khubawo na mutweela khus'inywe uminyaala khulwe bubeeyi ni khulwe bubwoonaki ta.

¹⁴Lwekhuuba ifwe khwakabananila atweela ni Kristo, ni khuba nga khuwandalalila mu bwiyikino bweesi khwanyoowa khuuba nabwo, khukhwoolesa ikhumalilisa.

¹⁵Nga ni shilomewa shiri, “Shaleelo ni muba nga mwawuliile likono lyeewe, mukhahandalasa kimyoyo kyeenywe ta, nga ni mwakhola mu bumiinyi bweenywe.”

¹⁶Ne banaanu nibo babaaminyaala ni baawulila likono lya Wele? Akhuba abo beesi Musa araangilila nga baama i Misiri ta?

¹⁷Banaanu ndi beesi Wele aarunyila khuumala kimiiko kamakhumi kane? Si bali abo baboonaka ta, ni kimilaambo kyaabwe kyasalanisibwila mu mubiimbi ta?

¹⁸Naluundi banaanu ndi beesi Wele etsubila ari sibalinjila na khafwiiti khoosi ta mu shifwo sheesi nandibaweele khuwolelamo, nga akhuba abo babaaminyaala?

¹⁹Ni nashiryo, khubona khuri, nibo sibaanyala khukhwinjila mu shifwo isho ta, lwe khulekha khufukiilila khwawe.