Read lumasaaba Baheburania 4 Bible Online

Baheburania 4 - lumasaaba bible

Baheburania 4

¹Nashiryo, khukhwaama nga khusuubisa khwa Wele khwe khukhwinjila mu shifwo she khuwolelamo ni khushiliwo, khakhube babaandu babetsililisi, nio ilekhe khubawo na mutweela khus'inywe unyoolekhana khuuba nga waakhaasikhile ta.

²Lwekhuuba nafwe khwawulila kamakhuuwa kamalayi keesi baakhuboolela ifwe, nga nibo nabo ni baawulila. Ne buurume bweesi baawulila sibwabayeeta ta, lwekhuuba ibo babaawulila sibatubaasakho khufukiilila ta.

³Babaandu babaaba ni khufukiilila bonyene nibo babenjila mu khuwola ukhwo, nga Wele umweene n'aloma ari, “Nga ni netsubila mu lirima lyase ndi, ‘Sibalinjila mu shifwo shase she khuwolelamo ta.’ ” Shino Wele ashikanikha ikhaba nga buraambi bweewe bwaba bwaawa khaale khukhwaama khu khubuumbibwa khwe shiibala.

⁴Ni khu shifukhu she kumusaafu iliwo ahaandi mu byaronebwa isi ashilomelakho ari: “Khu shifukhu she kumusaafu, Wele aawola khukhwaama khu buraambi bweewe bweesi aaba akhola.”

⁵Naluundi mu bisiintsa byeene ashiloma ari, “Sibalinjila mu shifwo shase she khuuwolelamo ta.”

⁶Nashiryo, nga ni shishiili busa shiryo, baalala balinjila mu khuwola ukhwo. Ni naabo babaaboolelwa kamakhuuwa kamalayi makiboole sibalinjilamo ta, lwe khuminyaala khwawe.

⁷Ari luundi Wele warawo shifukhu nabulebe shishimanyikhaane nga “Shaleelo,” nga n'alomela khuubirira mu Dawudi lwanyuma lwe bifukhu bikali nga ni sharonebwa makiboole shiri, “Shaleelo ni kane muwulile likono lyeewe, mukhahandalasa kimyoyo kyeenywe ta.”

⁸Lwekhuuba iba nga Yoswa uwabawa shiwolelo shisheene sheesi Wele abalomela, khali Wele lwanyuma s'alomakho bibiwaamba khu shifukhu shishiindi ta.

⁹Nashiryo, ishiramayo shiwolelo isi babaandu ba Wele shishifwaanana nga esi Wele awolela khu shifukhu sha Sabato.

¹⁰Lwekhuuba buli uyo yeesi uwinjila mu khuwola khwa Wele, naye awola khukhwaama khu milimo kyeewe, nga naye Wele umweene n'awola.

¹¹Nashiryo, ifwe khakhukhakekho khukhwinjila mu shifwo she khuuwola isho, nio ilekhe khubawo umuundu yeesi wukwa lwe khulondelela isaambo ye bumiinyi ta.

¹²Lwekhuuba Ilomo ya Wele ili inamu, luundi yolelesa byeesi ilomakho. Yaamema khuufuura lurima lulwamema tsimbeka tsoombi. Ilomo yino iwulusa, yaawukhanisamo kumwoyo ni bulamu, tsinyiingo ni kamafura kakaatsilimo, luundi inyala khuumanya bibyambaaso ni khuukana khwe kumwoyo kw'omuundu.

¹³Mbaawo ni shishiindu na shitweela mu bibuumbe byoosi shishinyala khubisibwa mu moni tsa Wele ta. Bibiindu byoosi bili mu lubuula, luundi bili khwasye busa mu moni tseewe. Nashiryo, isi umweeneyo niyo yeesi buli mutweela akhiile khukhwikanikhakho.

¹⁴Nashiryo, nga ni khuli n'Umusaayi ufuura bukhulu, uwatsya wabira mu likulu lyoosi, niye Yesu, Umwaana wa Wele, ari khakhwihaambile ilala, khwomiise khubuula khwe khufukiilila khweefwe.

¹⁵Ifwe khuli n'Umusaayi ufuura bukhulu utsiinikhila atweela ni nafwe mu butoro bweefwe. Ne Yesu niye akhakibwa musaambo tsoosi nga nafwe ni khuli, ne niye s'akholakho shishonako shoosi ta.

¹⁶Khuryo nafwe ni khukhwinyindaalila, khakhwisyeende aambi ni shitsoloŋo sheewe she bubweela, nio khutuye shiisa luundi khunyoole bubweela bubukane bukhuyeete ifwe nga khuli mu biseela byeesi khubukanilamo.