Read lumasaaba Baheburania 5 Bible Online

Baheburania 5 - lumasaaba bible

Baheburania 5

¹Buli musaayi ufuura bukhulu yeesi arobolewa khukhwaama mu baandu, aryo wareebwawo khulwe babaandu mu biindu bya Wele, khuwaanayo tsisaayilo ni khuwoonga lwe bibyoonako byaabwe.

²Umusaayi umukhulu yuno naye umweene ali ni butoro bweewe. Shino shamunyalisisa khuwaambila shiisa ibo babaakhamanya ta, ni naabo babakoraana.

³Ni lwe lomo yino, umweene awoonga lwe bibyoonako byeewe umweene nilwe bibyoonako bye babaandu babaandi.

⁴Ne mbaawo umuundu uwiha lukoosi luno umweene ta, khurusakho nga Wele umweene wamulaangile, nga Aroni n'alaangibwa.

⁵Ni musaambo yino niyo ndweela, Kristo umweene s'ewa lukoosi lwe khukhwikyela Umusaayi ufuura bukhulu ta, ne areebwawo ni Wele uwamuloma ari, “Iwe uli Umwaana wase, khu shifukhu shino ise nekyelile Paapa woowo.”

⁶Ni ahandi aloma ari, “Iwe uli umusaayi biilo ni biilo, khusintsiila khu munyele kwe busaayi bwa Melekizedeki.”

⁷Mu bifukhu bye buulamu bweewe bwe khuuba umuundu mu shiibala, Yesu awanatsakayo khuloomba ni khukhwikontselela khweewe nga alilila angaaki ni likono likali, ni kamasika, isi Wele uyo abe unyala khumuwonesa khukhwaama mu khufwa. Ne Wele amuwulila lwekhuuba Yesu aba umuwolu luundi aryatsaka Wele.

⁸Ikhaba nga Yesu aba umwaana wa Wele, ne eyika khuuba uwuulila khukhwaama khwiibyo byeesi atsiinisibwa.

⁹Ne n'amala khukhwoolelesebwa mu bwitsufu, aryo ekyela burakikhilo bwe buwonesi bukhawawo ta isi ibo babamuwulila.

¹⁰Naluundi Wele amuruumbula khuuba Umusaayi ufuura bukhulu mu munyele kwe busaayi kwa Melekizedeki.

¹¹Khulomo yino, ifwe khulikho na bikali bye khuloma, ne shili shihangafu khubisontsoola lwekhuuba mwatsiile nga muwetsekhelela mu khukhurekeeresa khweenywe.

¹²Ikhaba nga ari abe mwakha khuuba baleekeli, mukanayo umuundu khubaleekela luundi bibiindu bibinyoowa bibiwaamba khu lomo ya Wele. Mukana busa kamabeele ne akhuba biilyo bibyeene ta.

¹³Umuundu yeesi uba nga ashinyweesebwa kamabeele, aba ashiili umwaana umukyeekhe, aba s'anyala khuleekewela ilomo ye bukwalaafu ta.

¹⁴Ne biilyo bibyeene bili bye babaandu babatsoyile, ibo babaaba ni kamakyesi keesi baraambisa khukhwawulawo shilayi ni shiibi.