Read lumasaaba Baheburania 6 Bible Online

Baheburania 6 - lumasaaba bible

Baheburania 6

¹Nashiryo khakhulekhe bye khuuleekela bibinyoowa bibiwaamba khu Kristo, khutsye mu moni khukhwiyika bibifuurakho luundi bye shikhulu mu khufukiilila. Khwaamala khaale khubaleekela bilomo bibiili nga kumusiinji, naluundi sikhwakha khubiilamo ta. Mwamanya nga nashili shikhulu khukhwibiiyisa khukhwaama mu buraambi bweefwe ni bukhulu bubuuli mu khufukiilila mu Wele.

²Ifwe khwabaleekela inywe khaale bibiwaamba khu khupyeluusibwa ni khureewakho kamakhono. Mwamanya bibiwaamba khu khulamukha khwe baafu, ni khukhalilwa kumusaango khukhawawo ta.

³Ni Wele nga wasiimile, kane khukholatsake khuryo.

⁴Lwekhuuba shili shihangafu isi ibo babaamala khubonekhelwa, bakhoombakho shiwaanwa she mwikulu, bakabananila atweela mu Mwoyo Umukhosefu,

⁵naluundi bakhoombakho khu bulayi bwe Lomo ya Wele, ni kamaani ke kumuboolo kukuutsya khwiitsa,

⁶ne lwanyuma nga bakwiile, babaandu babafwaana baryo sishinyalikhana khuubakobosa mu khwibiiyisa luundi ta. Lwekhuuba baba babeene baatsaangilila Umwaana wa Wele khu musalaba kumuluundi kwe khabili, baamuwaambisa tsisoni mu lubuula.

⁷Wele awa tsiikhabi liloba liliinywa ifula ilikwakho, lwaanyuma lyaatsowakho biilyo bibireera kumukaso isi abo beesi babilimila.

⁸Ne liiloba ilyo ni litsowakho kamawa ni bunyaasi busa, liba mbaamo itsamu ta, liba lyaliindiilile khutsubiwa, ni intsakamo yalyo iliiba khukhwokhewa ni kumulilo.

⁹Ne bakanwa baase, ikhaba nga khuloma khuryo, ifwe khubambaasilamo bibiindu bilayi, nibyo bibiindu bibibayila inywe mu mukhoosi kwe buwonesi.

¹⁰Lwekhuuba Wele niye ali umwiyikinwa, niye s'alinyala khukhwibilila buraambi bweenywe ta, ni khuukana khweesi mwokesanisa mu lisiina lyeewe, nga mwakaanisa bakhosefu beewe, luundi nga ni mwiloosela khubakaanisa ari.

¹¹Ifwe khwiwuuma khuri buli mutweela khus'inywe okesane khukana ukhwo khukhwoolesa ikhumalilisa, nio kumwiyikino kweenywe kwolelele.

¹²Ifwe sikhukana inywe khuuba batoro ta, ne mube babeyikila khuubo bababirira mu khufukiilila ni khukhwikhaliilikha, baryo baafuna isho sheesi Wele asuubisa.

¹³Wele n'asuubisa Iburayimu, Wele umweene etsuba mu lisiina lyeewe, lwekhuuba s'aba n'umuundu umufuura bukhulu isi khali etsubila ta.

¹⁴Wele aloma ari, “Ilala indikhuwa tsikhabi, ni lisaaye lyoowo indilibalaayisa.”

¹⁵Ni Iburayimu nga waamalile khukhwikhalilikha nga waliindilila, wafuna sheesi Wele amusuubisa.

¹⁶Lwekhuuba babaandu betsuba nga baloma khuuyo ubafuurakho nibo babeene bukhulu. Ni mukhaando tsoosi, khukhwitsuba nikhwo khukhukhalawo.

¹⁷Nashiryo Wele n'akana khukhwokesa bukakafu isi baasikha be shisuubiso sheesi aloma nga s'anyala khushishuusamo ta, niye aloselakho khukhwitsuba.

¹⁸Shino Wele ashikhola nio khu biindu bibili bibikhashuukha ta, mumuuli ndi Wele s'anyala khuwombeselamo ta, ifwe khukhwanyoola bubwibisilo mu niye khunyale khuuba ni shishikhuwaangasa khwiwaambile ilala khu mwiyikino kukuuli iburaangisi weefwe.

¹⁹Ifwe khuli ni kumwiyikino kuno nga shitsaangi she kamaani naluundi shishikhalimo khukhwikanakana ta, she buulamu bweefwe. Shitsaangi shino shiyikinikha luundi shili shihandalafu shishinjila mukari mu ngubo itiimbibwile,

²⁰mweesi Yesu atsya khulweefwe, nga akhuraangilila ifwe, wekyela Umusaayi ufuura bukhulu, biilo ni biilo, mu munyele kwe busaayi kwa Melekizedeki nga ni kuli.