Read lumasaaba Baheburania 7 Bible Online

Baheburania 7 - lumasaaba bible

Baheburania 7

¹Melikizedeki yuno aaba umuyiinga wa Salemu, luundi umusaayi wa Wele Uuli angaaki lukali. Iburayimu nga n'aba ama mu khusoolana khweesi afuurira bayiinga babaandi mu busoolo nga akobola, Melekizedeki wamwakanana waamuloombela tsikhabi.

²Aryo Iburayimu naye waha Melekizedeki shisiintsa shitweela she liikhumi she bibiindu byeewe byoosi. Khuunyoowa lisiina Melekizedeki limanyisa liri, “Umuyiinga we Bukwalaafu,” ate naluundi niye akanikhibwakho nga uwaba umuyiinga wa Salemu, shimanyisa shiri “Umuyiinga we lukoosi.”

³Bibiindu bibikanikha khu Melikizedeki, sibikanikha khu paapawe namwe maayi weewe, namwe khu bakuuka beewe ta. Niye s'akanikhibwakho nga uli ni burakikhilo bwe bifukhu, namwe intsakamo ye buulamu ta. Shino shimukhola wafwaanana n'Umwaana wa Wele, nga eloosela bwilooseli khuuba umusaayi ufuura bukhulu biilo ni biilo.

⁴Ni mubone nga umuundu yuno n'aba umukhulu! Iburayimu kuuka weefwe umukhulu amuwa niye shisiintsa shitweela she liikhumi she khu biindu byeesi ayaaya mu busoolo.

⁵Ni babetsukhulu ba Levi ari bafuna kumulimo kwe busaayi. Likaambila libafukiilisa khubuusanisa shisiintsa shitweela she liikhumi khukhwaama khu baandu, ikhaba nga babaandu ibo bali be buulebe ni nabo, lwekhuuba nabo bali babetsukhulu ba Iburayimu.

⁶Ne umusaani yuno s'abaliwa khuuba uwama mu shikuuka sha Levi ta, ne shonyene wabuusanisa shitweela she liikhumi khukhwaama khu Iburayimu, wamala wamuwa tsikhabi, ate nga Iburayimu niye uwaba wafuna bisuubiso bya Wele.

⁷Mbaawo khukhwikanakana ta. Umuundu uwe aasi aweebwa tsikhabi ni nooyo umufuurakho bukhulu.

⁸Mulomo yino ikhulu iye busaayi, shisiintsa shitweela she liikhumi shibuusanisibwa khukhwaama khwiibyo byeesi babaandu bafuna. Basaayi boosi bafwa, khurusakho Melekizedeki isi bibyamuronebwakho biloma biri ashiili mulamu.

⁹Ne umuundu ukuundi anyala khuloma ari Levi umweene ubuusanisa shisiintsa shitweela she liikhumi, naye arusibwakho shitweela she liikhumi khuubirira mu Iburayimu.

¹⁰Shino shiba shiryo lwekhuuba Levi naye aba ashiili munda mwa kuukawe Iburayimu nga ni bakanana ni Melekizedeki.

¹¹Ne iba nga bubwitsufu bubweetsila khuubirira mu busaayi bwa Levi, (lwekhuuba khukhwimikha khu nibwo babaandu baweebwa kamakaambila), shiina shishekoombisa umusaayi ukuundi wabalikhila mu munyele kwe busaayi kwa Melekizedeki, ne walekha khubalikhila mu munyele kwa Aroni ta?

¹²Lwekhuuba niibawo khushuukhashuukha khwoosi mu busaayi, aakha khuubawo khushuukhashuukha mu makaambila nako.

¹³Ne uyo isi bibiindu bino bilomakho aaba uwe mu shikuuka shiindi busa, shishikhaamatsakamo umuundu yeesi uwakaanisakho khu sheeso ta.

¹⁴Shamanyikha bulayi shiri Umukasya weefwe ama mu shikuuka sha Yuda, ni Musa s'aboolakho ilomo yoosi khu shikuuka isho iwaamba khu busaayi ta.

¹⁵Sheesi khukanikhilekho shimanyikha bulayi ni khufuurisakho; Umusaayi enyukha ufwaananakho ni Melekizedeki.

¹⁶Uyo ukhekyela umusaayi khukhwimikha khu makaambila kakokesa shikuuka shiina ta, ne uwekyela umusaayi lwe kamakaambila ke buulamu bukhawawo ta.

¹⁷Nga bibyaronebwa ni biloma biri, “Iwe uli umusaayi biilo ni biilo, mu lunyilili lwe busaayi lwa Melekizedeki.”

¹⁸Nashiryo likaambila lilyanyoowa lirusibwawo lwekhuuba shilyaba ni kamaani ta, luundi nga shiliyeeta ta.

¹⁹Lwekhuuba kamakaambila mbaawo sheesi kakhola sholelela ta, ne aluno ari, khusuubila khukhufuurisa bulayi khwareerebwelewo, ni nafwe mu bweene umwo nimwo mweesi khunyala khuubirira khweetsa aambi ni Wele.

²⁰Ne bino sibyabawo akhali khukhwitsuba ta. Ne Balevi nga nibo babanyoowa khuuba basaayi, bayila kumulimo kuno kwe busaayi akhali khukhwitsuba ta.

²¹Ne Yesu niye akalusibwa khuuba Umusaayi ni shishitsubo, nga Wele n'amulomakho ari, “Umukasya wayitsuba, s'alishuusakho luundi ta, iwe uli Umusaayi biilo ni biilo.”

²²Lwe khukhwitsuba khuno, Yesu akalusibwa khuuba umuliindi uwe ndakaano indayi khuminyisakho.

²³Ari basaayi babanyoowa bali bakali, lwekhuuba khuufwa sikhwabanyalisisa khurama mu mulimo khwawe imbuka yoosi ta.

²⁴Ne lwekhuuba Yesu abawo biilo ni biilo, eloosela khukhola nga umusaayi bifukhu byoosi.

²⁵Nashiryo niye anyala khuwonesa ibo babeetsa isi Wele nga babira mu niye, khukhwaama nga niye n'aliwo biilo byoosi khubawotsela khulwawe.

²⁶Nashiryo ifwe shakhwakhila khuuba ni Yesu uli Umusaayi ufuura bukhulu nga niye ukhuyeeta, uli umukhosefu, ukhalikho likoondo lyoosi ta, namwe lisaanda ta. Umweene yuno wayawulibwa khu baandu babonaki, luundi wafumisibwa khufuura bibuumbe byoosi bibiili mwikulu.

²⁷Niye s'afwaana nga basaayi bakhulu babaandi ta, lwekhuuba sishamwakhila khuwaanayo tsisaayilo buli busheele ta, nga anyoowela khu tse bibyoonako byeewe umweene nio lwanyuma lwe bibyoonako bye babaandu babaandi ta. Ne niye isho ashikhola kumuluundi mutweela kwonyene nga n'ewaanayo umweene lwe bibyoonako bye babaandi.

²⁸Kamakaambila karobola babaandu babaali mu butoro bwaabwe khuuba basaayi bakhulu. Ne Ilomo ya Wele iye khukhwitsuba iyeetsa lwanyuma lwe kamakaambila, yarobola Umwaana. Umwaana yuno niye isi Wele aakhola khuuba umusaayi ufuura bukhulu, ukhalikho shishoonako shoosi ta, biilo ni biilo.