Read lumasaaba Baheburania 8 Bible Online

Baheburania 8 - lumasaaba bible

Baheburania 8

¹Shifuura bukhulu mu bilomo bino byoosi byeesi khuloma nisho shino: ndi ifwe khuli n'Umusaayi ufuura bukhulu ufwaana aryo, niye uwikhaale khu mukhono kumulayi kwe shitsoloŋo she bukhulu bwa Wele mwikulu.

²Luundi niye umwakaanisi mu shifwo shifuura bukhosefu, nga niyo iweema iya ŋali iyareewawo n'Umukasya, ne akhuba n'umuundu ta.

³Buli musaayi ufuura bukhulu yeesi areebwawo lwe khuuwaana biwaanwa ni tsisaayilo, shikila shimwaakhila Umusaayi weefwe Umukhulu naye khuubakho ni sheesi ahaana.

⁴Ne niye aba nga uli mu shiibala khali s'ali umusaayi ta, khukhwaama nga n'iliwo khaale basaayi babawaanayo biwaanwa nga kamakaambila ni kaloma.

⁵Nibo besaaya shifwo shishiili busa shifwaananyi, luundi shishiniini she shifwo shikhosefu she mwikulu. Shino shili nga Musa n'areewulibwa nga atsya khukhwombekha i weema. Wele amuloma ari, “Bona uri ukhola bibiindu byoosi musaambo yeesi byakhwokesanisibwamo khu lukiingi.”

⁶Ne ari bubwakaanisi bweesi Kristo aweebwa buli bukhulu khufuurisakho khubwaabwe ubwo bukhale, lwekhuuba niye ali umurume we ndakaano ifuura bukhulu, iyakholebwa nga yimikha khu bisuubiso bifuura bulayi.

⁷Lwekhuuba iba nga indakaano ingiboole iyaba nga indayi, khali siyabawo shishikanisa khuukhola indakaano ikiindi ta.

⁸Ne Umukasya khuunyoowa anyoola she khuubiiyisa isi babaandu beewe nga n'aloma ari, “Umukasya aloma ari, ‘bifukhu biliitsa mweesi indikholelamo indakaano imbya ni babaandu ba Isiraeli atweela ni babaandu ba Yuda.’ ”

⁹Umukasya luundi aloma ari, “Indakaano iyo shiliiba nga indakaano yeesi nakhola ni bakuuka baabwe, khu shifukhu khweesi nabawaambila khu mukhono khubarusa mu shiibala she Misiri ta. Lwekhuuba babeene ibo sibahandalalila khu ndakaano yase ta, nabarurakho nabalekha.

¹⁰Ne yino niyo indakaano yeesi intsya khukhola ni babaandu ba Isiraeli. Nga Umukasya n'aloma ari, ‘indiira kamakaambila kaase mu byambaaso byaabwe, luundi indikarona mu myoyo kyaabwe. Ni nase kane imbaatsake Wele waabwe, ni nabo kane babaatsake babaandu baase.’

¹¹Naluundi s'ilibawo na mutweela ulileekela umwesanwa weewe ta, namwe umuundu ulileekela wandaaye nga aloma ari, ‘N'umanye Umukasya’ ta, lwekhuuba boosi balimanya ise, khukhwaama khu muundu uwe aasi khukhwoola khu mukhulu.

¹²Lwekhuuba ise indibeyakhila nibo bibyoonako byaabwe, naluundi ise sindishebulila bubwoonaki bwaabwe ta.”

¹³Wele n'aloma khu ndakaano imbya, aba wakalusile iyo iyanyoowa khuuba ikhale, ni neesho shishiiba shikhale luundi shishikorere, shiba shili aambi khuwawo.