Read lumasaaba Yakobo 2 Bible Online

Yakobo 2 - lumasaaba bible

Yakobo 2

¹Bebuulebe, nga ni muli babaafukiilila mu Mukasya weefwe Yesu Kristo uwe shiriifwa, mukhaba ni kirombooli mu baandu ta.

²Lwekhuuba siinga umuundu umuyiinda eetsa muntsu iye khukhwisaayilamo nga wakwaarire bulayi, nga ali ni ntsiyi iye zaabu, ni mu mbuka niyo ndweela, umuundu umutaambi nga wakwaarire tsingubo tsindabukhake naye wenjilamo.

³Ne mweesamo lukoosi umuundu ukwaarire bulayi nga mumuloma muri, “Iwe yiitsa, wikhale akhulayi ano,” ne mwaalomela umutaambi muri, “Iwe, yiima itaayi iyo,” namwe muri, “Yikhala aasi mu bikyele byase ano,”

⁴simubona muri muba mwareerewo ikirombooli akari enywe ta? Luundi muba mwaakhalilewo nga mwiima khu bitsilililwa biibi?

⁵Bebuulebe bakanwa, ni murekeerese, Wele akhurobola babaandu bataambi be mu shiibala muno, khuuba bayindifu mu khufukiilila, ni khuuba basikha be buyiinga bweesi alomela abo babamukana ta?

⁶Ne inywe mwaleekelesa umutaambi. Sibali bayiindifu nibo babaabamiinilisa inywe? Sibali nibo babaabakhurura baabayila mu moni tsaabo babaakhala kimisaango ta?

⁷Sibali nibo babaakhomyaasa lisiina lye shiriifwa lilyakila inywe mwalaangibwa ta?

⁸Shishiindu shilayi sheesi mwandikholile, shandibeele nisho khukhwoolelesa likaambila lye Buyiinga bwa Wele liliili mu byaronebwa bikhosefu liliiloma liri, “Kanaatsaka umuundu washoowo, nga iwe ni wikana wamweene.”

⁹Ne ni muba ni kirombooli mu baandu, muba mwakholile shishonako, luundi kumusaango kubafuura khulwe khufuniaaka likaambila.

¹⁰Lwekhuuba buli umuundu ulondelela kamakaambila koosi, ne wafuniaakakho litweela, aba wafuniaakile kamakaambila koosi.

¹¹Lwekhuuba Wele uwaaloma ari, “Ukhayeyana ta,” niye mutweela mweene uyo uwaaloma ari, “Ukheera ta.” Nashiryo, abe wakhalekha khuyeyana ta, ne weera umuundu, shitweela busa uba uli umwonaki ufuniakile kamakaambila.

¹²Ni nashiryo, ni mukanikhatsake nga babaandu beesi balikhalila kumusaango, khukhwiimikha khu makaambila kakakhukangulula ifwe khukhwaama mu bubowe bwe shishonako nga ni kali.

¹³Lwekhuuba Wele alikhala kumusaango nga s'okesanisa shiisa isi ibo babaakhokesa shiisa isi babaandi ta. Shiisa shiwonesa umuundu abe isi kumusaango kutsya khufuura.

¹⁴Bebuulebe, shiyeeta shiina, umuundu khuloma ari, ali ni khufukiilila, n'enga buraambi bweewe sibwokesanisa shino ta? Khufukiilila ukhwo khunyala khumuwonisa?

¹⁵Ni shinyoolikhana nga iliwo uwe buulebe umusaani namwe umukhasi ukhali ni tsingubo ta, namwe nga s'ali ni she khuulya shishimumala ta,

¹⁶shiyeeta shiina umuundu uyo, nibawo mutweela khusiinywe umulomela ari, “N'utsye mu lukoosi, ukwaare bulayi, luundi ulye bulayi wikure,” ate nga siwamuweele bibikanibwa mu bulamu ta?

¹⁷Ni khufukiilila khweenywe nakhwo khuryo. Nga khuli khwonyene busa akhali buraambi bubwokesanisa, khuba khuufu.

¹⁸Ne umuundu ukuundi anyala khuuloma ari, “Iwe uli ni khuufukiilila, ne ise ndi ni buraambi bwase.” N'untsokese khuufukiilila khwoowo khuukhalikho buraambi, ni nase kane ikhwokese khuufukiilila khwase khuubirira mu buraambi bwase.

¹⁹Mufukiilila muri Wele ali mutweela. Isho shilayi. Ne ni kimisaambwa kimibi nakyo kifukiilila kiryo, naluundi kinikina ni khuurya.

²⁰Iwe umuundu umusilu, ukana wokesanisiwe uri khuufukiilila khuukhalikho buraambi khuba mbaawo sheesi khuyeeta ta?

²¹Umukuuka weefwe Iburayimu s'abaliwa khuuba umukwalaafu khu lweesho sheesi akhola, nga n'awaanayo umwaana weewe Isaaka khu sheeso khumwoosha?

²²Awo ubona uri, khuufukiilila khweewe khubonekhela atweela ni buraambi bweewe. Khuufukiilila khweewe khwiyokesanisila mu buraambi bweewe.

²³Naluundi bibyaronebwa bikhosefu byoolelesebwa bibiloma biri, “Iburayimu aafukiilila mu Wele, ni khulwe khuufukiilila khweewe, Wele aamufukiilila nga umuundu umukwalaafu.” Ni nashiryo, Iburayimu walaangibwa ari, umusaale wa Wele.

²⁴Muryo mubona muri, shaamila khu buraambi bw'omuundu nibwo bubuukila walaangibwa khuuba umukhosefu isi Wele, ne akhuba khulwe khuufukiilila khwonyene ta.

²⁵Nisho shitweela busa ni malaaya Rahabu. Niye s'anyoolekhana khuuba umukhosefu khulwe buraambi bweewe, nga n'akaanila baarume muungo mweewe, lwanyuma lwayo wabayeeta banyololokha busa khuubirira mu ntsila ikiindi?

²⁶Nasho shili shiryo; nga kumubili kukukhalimo kumwoyo ni kuli kumufu, ni khufukiilila khukhalikho buraambi, nakhwo khuba khuufu.