Read lumasaaba Yakobo 3 Bible Online

Yakobo 3 - lumasaaba bible

Yakobo 3

¹Bebuulebe, bakali mwiinywe bakhakhaakhana khuuba baleekeli ta, lwekhuuba mwamanya muri ifwe babaleekela, khulikhalilwa kumusaango kumusiro, khufuura babaandu babaandi.

²Lwekhuuba fweesi khukwa mu byoonako kimiluundi mikali. Ne noola umuundu yeesi s'akholakho shishiindu shiibi shoosi mu byeesi aloma ta, aba umuundu umukhosefu, naluundi aba anyala khuwula kumubili kweewe kwoosi.

³Ni khura biibya mu minwa kye tsiŋwaaŋwa, khushikhola khuri nio tsikhuwulile, ni lwe bibyeene ibyo, khunyala khuyila iŋwaaŋwa oosi isi khukana.

⁴Namwe ni mubonele khu meeri. Ikhaba nga tsili tsimboofu tsirye, luundi tsitimisibwa ni mbewo iye kamaani, ne iyilibwa ni khakaango khafwiiti khari, khakila imeeri yaatsya osi esi ukitimisa akana ari itsye.

⁵Shili shitweela busa ni luulimi. Nilwo khakhaandu khafwiiti khari mu mubili, ne lwiruuya mu biindu biboofu. Yambaasa khu shisaali shiboofu, nga ni shokhewa ni khaalilo khafwiiti busa khari.

⁶Ni luulimi nilwo lulureere bye bubwoonaki mu baandu basheefwe. Nilwo shiibala she kamawuusu mu mibili kyeefwe. Nilwo lulwoonakisa kumubili kwoosi. Nilwo luluwaambisa kumulilo mu bulamu bw'omuundu bwoosi, naluundi lulweene luuwaambisakho kumulilo kukukhasima ta.

⁷Mwamanya muri, umuundu waabaya, naluundi shaamanyikhana shiri, waabaya naluundi waawula bibuumbe bibiramile byoosi; nga bisolo bye mwiiswa, binywiinywi, bisolo bibikhuluulila aasi, ni bisolo bye mu meetsi.

⁸Ne mbaawo umuundu yeesi unyala khuuwula luulimi ta. Nilwo luli lulwoonaki, lwaayitsula butsiba bubwiira, naluundi luyuukayuuka busa.

⁹Luulimi lweene nilwo lweesi khuraambisa nga khuruuya Umukasya weefwe naluundi uli Paapa weefwe; ne ndi ni nalwo khwaluraambisa khutsuba babaandu babaabuumbiwa mu shifwaananyi sha Wele.

¹⁰Mukhanwa mweene mutweela nimwo mumwamamo tsikhabi atweela ni khuutsuba. Bebuulebe, bino sibyaakha byaaba biryo ta.

¹¹Isebele ndweela inyala khuutubukhamo kameetsi kakaŋaaha ni kakakhaŋaaha mu mwanya mutweela?

¹²Bebuulebe, namwe iliwo kusaala ku figi kukunyala kwaamakho kimisabibu, namwe kusaala kumusabibu kwaamakho kamakhuyu? N'isebele naye iryo, irusa kameetsi kakhali kamalayi ta, s'inyala yarusa kameetsi kamalayi ta.

¹³Naanu mus'iinywe uuli ni kamakhula ni khuumanya? Noola alimo, n'okesanise bino nga abirira mu saambo indayi iye buulamu bweewe bukhosefu ni mu buraambi bweewe bulayi bweesi akholela mu buwolu ni kamakhula.

¹⁴Ne mu myoyo kyeenywe ni muba mwetsuule libuba, lirima ni butakha, mukheruuyakho ni khukhwiwombesa nga mukhaandisa bwa ŋali ta.

¹⁵Kamakhula ke saambo nga yino sikaama mwikulu ta, ne njeeba kaama mu shiibala, ke babaandu busa naluundi ka kimimakoombe.

¹⁶Lwekhuuba buli aandu oosi ahaaba libuba, ni butakha, abweene awo niwo ahaaba khuutumbuukha ni bibiindu byoosi bye bumoyaani.

¹⁷Ne kamakhula kakaama mwikulu, khunyoowela ilala, kali ka ŋali nga si kalikho lisaanda ta, luundi ke lukoosi, kamawolu, kalimo khukhwimenielesa, kaayiitsula shiisa, naluundi kaayiitsulamo bibiindu bibiindi bilayi, nga sikalimo khuromboola namwe bubeeyi ta.

¹⁸Babaandu babareera lukoosi nibo babamiitsa mu lukoosi, ni likyesa lyaabwe lili bibyaano bye bukwalaafu.