Read lumasaaba Yakobo 4 Bible Online

Yakobo 4 - lumasaaba bible

Yakobo 4

¹Busoolo bwoosi ni khuulomana bibiili mus'iinywe, byaama waheena? Sibyaamila mu muluungo kwe khukhwikoomba kukuuli khuusoolanila mus'iinywe?

²Mwikoomba bibiindu n'enga simunyala mwabifuna ta. Nashiryo mwakhalawo mwiire umuundu nio mushifune, ne simunyala mwafuna ta. Isho shikila mwalomana luundi mwasoolana. Inywe simufuna byeesi mukana ta, lwekhuuba simuloomba isi Wele ta.

³Ne nga mwaloombile simufuna byeesi muloombile ta, lwekhuuba bitsilililwa byeenywe bye khuuloomba bili biibi. Muloomba bibiindu bari nio mubiraambise mu muluungo kweenywe.

⁴Inywe babaandu babaakhali baŋali ta, simumanya muri khukhola busaale ni shiibala khuba nikhwo khurawo busiku ni Wele ta? Buli muundu yeesi ukhalawo khukhwikhola umusaale ni shiibala, umweene aba wekholile umusiku wa Wele.

⁵Namwe mwaambaasa muri bibyaronebwa bikhosefu sibili bya ŋali ta, bibiiloma biri: “Umwoyo isi Wele akhuwa akhutseeta ifwe ni libuba lye khuukana khuukali?”

⁶Ne bubweela bweesi Wele ahaana isi babaandu nibwo bubufuura. Nisho shikila bibyaronebwa bikhosefu biloma biri, “Wele akhaandisa babeyiinga, ne bawolu abawa bubweela bweewe.”

⁷Nashiryo, ni mwiwaaneyo mube bawolu isi Wele. Mukhupanise Sitaani, ni Sitaani kane elukhe atsye.

⁸Ni mwisyeende aambi ni Wele, ni Wele naye kane esyeende aambi ni nanywe. Inywe mumuuli baboonaki babambaasila eyi ni neeyi, ni musaabe kamakhono keenywe, mupyeluuse kimyoyo kyeenywe.

⁹Ni mube mu mutaambo, mwilile mwabeene, luundi musole. Khayo khuutsekha khweenywe khwikyele kumutaambo.

¹⁰Ni mube bawolu mu moni ts'Omukasya, ni naye kane abaniinise inywe angaaki.

¹¹Bebuulebe, mukhakanikhatsaka khu baandu basheenywe buubi ta. Uyo yeesi ukanikha buubi khu muundu washe, namwe ukhalila umuundu washe kumusaango, aba wafwotsoolile kamakaambila luundi aba wakakhaliile niko kumusaango. Ne noola ukhalila kamakaambila kumusaango, iwe s'uba ulondelela kamakaambila ta, ne njeeba uba ukakhalila busa kumusaango.

¹²Uwarawo kamakaambila, luundi umukayi wako ali mutweela yenyene, naluundi niye unyala khuwonesa namwe khukhwonakisa umuundu. Ne iwe niye naanu ukhalila umuundu washo kumusaango?

¹³Aso, ni murekeerese inywe babaaloma bari, “Shaleelo namwe kumukaamba, khukhaatsye mu shiriimba nabuulebe, khumaleyo kumwiiko mutweela, nga khukhola bye khukulaana, khulwe kamafuurisa kamakali.”

¹⁴N'enga simumanya buulamu bweenywe ni bukhaabe kumukaamba ta. Bulamu bweenywe nibwo shiina? Muli busa nga namufweeli, ubonekha busa imbuka ifwiiti iri, lwanyuma waatamuukha waawawo.

¹⁵Inywe khali mwaandilomele muri, “Nga Umukasya waakanile, kane khube baalamu, khukhole shino namwe isho.”

¹⁶N'endi inywe she mukhola, mwiyiinga luundi mwekana busa. Ne khukhwiyiinga khwe saambo iyo khuba khwe bubwoonaki.

¹⁷Nashiryo, uyo yeesi umanyile shilayi sheesi akhiile khuukhola, ne waalekha khushikhola ta, aba waakholile shishoonako.