Read lumasaaba Yakobo 5 Bible Online

Yakobo 5 - lumasaaba bible

Yakobo 5

¹Ne ari inywe bayiindifu, ni murekeerese sheesi inoma. Ni mulile, luundi mukhupe kimibala, khulwe kimitaambo kikiinabeetsila.

²Bye buyiindifu byeenywe byaabola, ni bikwaaro byeenywe kimisilili kyaabiliile.

³Izaabu yeenywe ni ifeeza yeenywe yaakhupile ingikhina, ni ingikhina yeenywe kane ibe bajulisi babaabatsuntsumilisa inywe. Naluundi ingikhina yino kane ilye kimibili kyeenywe nga kumulilo. Inywe mwebikhiile buyiindifu bwe bifukhu bimaliilisi.

⁴Inywe simwaweele baraambi babaabakyesela kimikuunda kyeenywe kumukheemba kwaabwe ta. Bona nga balikho balila lwe kumukheemba kweesi mwabalyakhana. Ni khuulila khw'abo babaabakyesela bilimwa byeenywe khwoolile mu maru ka Wele, Umukasya uwe kamaye.

⁵Buulamu bweenywe khu shiibala khuno bwabeele bubwitsuule kumwikhoyo, ni khuulekha khwitsililisa ta. Mwabeene mwayinesa busa kimyoyo kyeenywe nga mwirekekhela shifukhu she khuhelelakho.

⁶Mwaakhalile kimisaango, mwerire umuundu umukhosefu ukhali ni lomo yoosi ta, ate nga s'alikho ni saambo iye khuubasoolanisamo inywe ta.

⁷Nashiryo be buulebe, ni mwikhalilikhe khukhwoolisa Umukasya n'aliitsa. Bonela khu mulimi nga ni ekhalilikha nga n'aliinda bibyaano bye lisuno bibyaama mwiloba. Niye ekhalilikha nga aliinda ifula ingiboole ni n'eyo iyiitsa lwanyuma.

⁸Ni nanywe muryo, nimwikhaliilikhe, mwihandalase kimyoyo kyeenywe, lwekhuuba khukhwiitsa khw'Omukasya khuli aambi.

⁹Bebuulebe, mukheŋuluŋuunya nga mwikiitsa basheenywe ta. Lwekhuuba shibareerera busa khukhaliwila kumusaango ni Wele. Bona umukayi ali aambi khukhwoola.

¹⁰Bebuulebe, ni muyile baŋoosi babakanikha mu lisiina lya Wele nga she khubonelakho mu khutaambisibwa khwaabwe, ne nga bekhalilikha.

¹¹Ibo babekhalilikha khubalaanga khuri bali ni tsikhabi. Mwawulilakho khukhwikhalilikha khwa Yobu, naluundi mwabona shiina shishaba shitsilililwa sh'Omukasya, nga n'okesanisa shiisa ni khuukana.

¹²Ne khufuurisa byoosi be buulebe, mukhetsubatsaka nga iliyo sheesi musuubisa ta. Mukhetsubatsaka khulwe likulu ta, namwe khulwe shiibala ta, namwe khulwe shishiindu shishiindi shoosi ta. Ne ni mulomatsake busa muri, “E e” nga mumanyisa “E e” namwe muri, “Taawe” nga mumanyisa “Taawe.” Nio muryo, Wele alekhe khubakhalila kumusaango ta.

¹³Iliwo umuundu yeesi mus'iinywe utaambisibwa? N'aloombe isi Wele. Iliwo uyo yeesi usangaalile? Ni embe kimyeenya nga aruuya Wele.

¹⁴Iliwo mus'iinywe umuundu utsiinikhana? N'alaange basaayi be mu lisaayilo, kane bamuloombele, naluundi bamuhakhe kamafura mu lisiina ly'Omukasya.

¹⁵Ni khuuloomba khuno nga khwakholibwile ni khuufukiilila, kane khuwonese umuundu umutsiina uyo. N'Umukasya kane amwinyuse, naluundi nga ali ni bibyoonako, kane Umukasya amwiyakhile.

¹⁶Nashiryo, ni mwibiiyise bibyoonako byeenywe, buli mutweela isi uwashe, naluundi buli mutweela aloombele uwashe, nio manya muwonesewe. Khuloomba khw'omuundu umukhosefu khuli ni kamaani khulondekhana ni bibyaamamo.

¹⁷Eliya mu busaalikhana bweewe, aaba umuundu busa nga ifwe ni khuli, ne aaloomba ni khukhwiyikina ari ifula ikhakwa ta, n'ifula yaalekha khukwa khu shiibala ta, khuumala kimiiko kitaru, ni kimyeesi kisesaba.

¹⁸Ne n'aloomba luundi, likulu lyaakangulula ifula, ni shiibala shaana bibyaamo.

¹⁹Bebuulebe, noola mutweela khus'inywe akoraana khukhwaama khu bwa ŋali, ne ukuundi waamukobosa,

²⁰ni mukhebulile shino muri, buli uyo yeesi ukobosa umwoonaki khukhwaama mu khukoraana khwe ntsila yeewe, umuundu uyo aba wawonesile kumwoyo kw'oyo ukoraanile, khuulekha khufwa ta. Naluundi aba wareerewo khukhwiyakhilwa khwe bibyoonako by'omuundu umwoonaki.