Read lumasaaba 1 Petero 1 Bible Online

1 Petero 1 - lumasaaba bible

1 Petero 1

¹Ibaluwa yino yaama isiise Petero umurume wa Yesu Kristo. Ingironela baarobole ba Wele babaawuyisibwa baasalanila mu bibala nga Pontusi, Galatiya, Kapadokiya, Asiya, ni Bisiniya.

²Babaandu babarobolewa lwe shitsilililwa sha Wele Paapa, bawaanibwayo buraawa lw'Omwoyo weewe, khuuba babawulila Yesu Kristo, luundi babamiliisibwa lwe kamafuki keewe. Bubweela ni lukoosi bibe mus'iinywe mu bukali bwoosi.

³Khakhusiime Wele luundi Paapa w'Omukasya Yesu Kristo, lwe shiisa sheewe shikali, uwakhuwa ife khusaalikha bushaakha mu bulamu bwe kumwiyikino khulwe khulamusibwa khwa Yesu Kristo khukhwaama mu bafu.

⁴Lwashino, kane ifwe khufune busikha bubukhanyala khuubola, namwe bwonekha, namwe bwabakho lisaanda ta.

⁵Inywe mwaliindibwa bulayi ni kamaani ka Wele khuubirira mu khufukiilila, khukhwoolesa buwonesi bubwirekefu ni bulibonesebwa khu mbuka imalilisi.

⁶Ni mwikhoyele shino naabi, ikhaba nga imbuka iyaari ifwiiti iyi, mwatsiinisibwa mu bye khukhakibwa bikali bibikhali bitweela ta.

⁷Shitsiilililwa shabyo nikhwo khuukhaka khuufukiilila khweenywe noola khuli khwa ŋali. Ikhaba ni zaabu nayo iwawo, ikhakibwa ni kumulilo, ni khufukiilila khweenywe khukhuuli khwe lisuno khukhufuurisa izaabu, khwakha nakhwo khwakhakibwa, nio manya mwikhalilikhe. Ulwo nio lwanyuma munyoole lubuyi, ni shiriifwa ni lukoosi khu shifukhu khweesi Yesu Kristo alibonesebwa.

⁸Inywe ikhaba nga mushiili khumubonakho ta, mumukana. Ikhaba nga simumubonakho ari ta, ne mumufukiilisamo luundi mwitsusibwa ni kumwikhoyo kumukali kwe shiriifwa kukukhanyala khulomewakho mu bilomo ta.

⁹Lwekhuuba mulikho mufuna shitsilililwa she khuufukiilila khweenywe, nikhwo khuuwonesebwa khwe kimyoyo kyeenywe.

¹⁰Yaba khulwe buwonesi buno kila baŋoosi baareebelesa, luundi baawentselesela ilala, luundi bakanikha khu shiwaanwa shino shishaba shitsya khubaweebwa.

¹¹Bakhakakho khumanya imbuka shiina, na saambo shiina isi Umwoyo wa Kristo mu nibo aba okesanisa, nga niye n'aboola nga bushiili khu bye khubonabona khwa Kristo, ni shiriifwa shishaba shitsya khwiitsa.

¹²Shino shabonesebwa isi baŋoosi shiri sibaaba beyakaanisa babeene khu bwaabwe ta, nenjeeba khulwe bulayi bweenywe, nga ni bakanikha khu biindu ibyo ari byeesi muwulila nga bibaboolelwa ni naabo babaababoolela Kamakhuuwa Kamalayi khulw'Omwoyo Umukhosefu uwakaanisibwa khukhwaama Mwikulu. Bibiindu byeenebyo nibyo byeesi bamalayika nabo bakana khuumanya.

¹³Nashiryo ni mwirekekhe kimyoyo kyeenywe, nga mwiliindila ilala. Ni mureere ilala khukhwiyikina khweenywe khu bweela bubuutsya khubaweebwa nga Yesu Kristo atsya khubonesebwa.

¹⁴Ni mube babaana babawulila Wele, mukhayilibwayilibwa ni khukhwiwotooma khweenywe khukhwanyoowa khweesi mwaba nakhwo nga mushiili khumanya bya ŋali ta.

¹⁵Ne nga uwabalaanga n'ali umukhosefu, nanywe ni mube bakhosefu mu byoosi byeesi mukhola.

¹⁶Lwekhuuba bibyaronebwa biloma biri, “Ni mube bakhosefu lwekhuuba ise ndi umukhosefu.”

¹⁷Ni muba nga muloomba, mumulaanga muri Paapa, umweeneyo niye ukhala kimisaango, nga bibikholewa bya buli mutweela ni bili, nga s'aromboora ta. Ni mumenye buulamu bweenywe ano mu shiibala nga mumurya niye.

¹⁸Lwekhuuba mwamanya bulayi muri, simwasikuliwa ni bibiindu bibiwawo nga ifeeza, namwe izaabu, khukhwaama musaambo tseenywe tsiimbi tsitsikhalimo tseesi mwaweebwa khukhwaama khu bakuuka beenywe ta.

¹⁹Ne mwasikuliwa ni kamafuki ke lisuno ka Kristo, uwaba nga khasheese khakhakhaabakho lisaanda namwe likoondo lyoosi ta.

²⁰Niye arobolewa khaale nga shiibala shishiili khubuumbibwa ta, ne abonesebwa khu mbuka imalilisi yino khulwe bulayi bweenywe.

²¹Khulweewe mufukiilila mu Wele, uwamulamusa mu bafu, wamuwa shiriifwa. Ni lweesho khufukiilila khweenywe ni kumwiyikino bili mu Wele.

²²Ne ari nga ni shili ndi inywe mwayipyeluusa kimyoyo kyeenywe nga muwulila bwa ŋali nio mube ni khuukana khwa ŋali khwe be buulebe beenywe. Ni mukanane mwenyene na mwenyene ni kimyoyo kyeenywe kyoosi.

²³Lwekhuuba mwasaalikhile bushaakha, akhuba ni miitso ibola ta, ne ikhabola ta, lwe Lomo ya Wele inamu luundi ikhawawo ta.

²⁴Lwekhuuba bibyaronebwa biloma biri; “Babaandu boosi bafwaana nga bunyaasi, ni shiriifwa shaabwe shoosi shili nga biimuli bye mwirome, bunyaasi buniaala, ni bimuli bikwa.

²⁵Ne Ilomo y'Omukasya ibawo biilo ni biilo.” Ni ilomo yino niko kamakhuuwa kamalayi kakaaboolelwa isi muli.