Read lumasaaba 1 Petero 2 Bible Online

1 Petero 2 - lumasaaba bible

1 Petero 2

¹Nashiryo, ni mwirusekho bumoyaani bwoosi, bubeeyi, libuba, ni kamakuto koosi.

²Ni mufwaane nga babaana babasaalikhile baŋaalye, mwikoombe kamabeele k'Omwoyo kakaakhalimo shiibi shoosi ta, nio kabatsowese khuboolesa inywe khu buwonesi bweenywe.

³Ilala mwatsemakho mwamanya muri Umukasya umulayi.

⁴Ni mwiitse isi Umukasya, niye libaale lilamu lyeesi babaandu bekaana, ne isi Wele nilyo liirobole, lye liisuno.

⁵Ni nanywe muryo, muli nga kamabaale kamalamu, mulikho mwombekhewa khukhwikyela intsu iye kumwoyo, khuuba busaayi bukhosefu, bubuuwayo tsisaayilo tse kumwoyo tsitsifukiilisibwa isi Wele khulwa Yesu Kristo.

⁶Lwekhuuba bibyaronebwa bikhosefu biloma biri, “Bona, naara libaale mu Sayuuni, libaale lirobole, lye lisuno, lye mu soonda, ni nooyo umufukiililamo, s'aliwaambisibwa tsisoni ta.”

⁷“Nashiryo, isi inywe babafukiilila, libaale lino lili lye lisuno. Ne isi ibo babaakhafukiilila ta, libaale tsana lyeesi babombekhi bekaana nilyo lilyekyela likhulu lye musoonda.”

⁸Ni shisharonebwa shishiindi shiloma shiri, “Libaale lino nilyo lyeesi babaandu betuyakho naluundi nilwo lulwaanda luluukila baakwa.” Betuya baakwa lwekhuuba ikwo nikwo kumutaambo kwaabwe kweesi abe baakha batsyamo.

⁹Ne inywe muli babaandu barobole, basaayi be buyiinga, linaambo likhosefu, babaandu ba Wele babeene, nio munyale khuboola bye kamakaanga bya Wele uwabalaanga khurura mu shilima mwinjile mu buwaanga bweewe bwe kamakana.

¹⁰Yabawo lutweela nga simumanyikha nga babaandu ta, ne ari muli babaandu ba Wele. Khaalekho simwawaambilwa shiisa ta, ne ari mwawaambiwiile shiisa.

¹¹Bebuulebe bakanwa, imbekontselela nga ni muli bakyeni luundi bakyeendaani mu shiibala, mukhewaanayo isi khukhwiwuuma khwe kumubili kukusoolana ni kumwoyo ta.

¹²Tsisaambo tseenywe mu Banaambo tsibatsake tsindayi, nio bari ikhaba nga babawaabila lwe khukhola buubi, banyale khubona buraambi bweenywe bulayi, babuyile Wele khu shifukhu khweesi alikobolelakho.

¹³Ni muwulilatsake buli buwuli bwoosi bubwarebwawo ni babaandu khulw'Omukasya. Namwe isi umuyiinga nga niye umukhulu,

¹⁴namwe isi ba gafana babarumaniwa n'umuyiinga khuuwa shitaambiso abo babaakhola buubi, ni khubuyila ibo babaakhola biilayi.

¹⁵Lwekhuuba khuli khuukana khwa Wele ndi iwe khuukhola buulayi usilisa inganikha iye busilu iye babaandu babaakhamanya ta.

¹⁶Ni mumenye nga babaandu baalekhuule, ne mukharaambisa lukoosi lweenywe khubiimbilila buubi bwoosi ta. Ne ni mumenye nga babakaanisi ba Wele.

¹⁷Ni mwisatsakemo babaandu boosi shiriifwa, mukanaatsake be buulebe baafukiilisi, muryatsake Wele, mwisatsakemo umuyiinga lukoosi.

¹⁸Inywe babakaanisi, ni muwulilatsake bakoosi beenywe, luundi ni mubawatsake lukoosi lwoosi, akhuba isi ibo babaali balayi babenaanayo bonyene ta, ne n'isi barafu.

¹⁹Lwekhuuba shino nisho shishisiimibwa, noola umuundu ekhaliilikha butsiina bubumwiitsila akhali ilomo yoosi ta, ne nga mu mwoyo kweewe waamanyile sheesi Wele akana.

²⁰Lwekhuuba buulayi shiina bweesi unyoola, n'uba nga baakhupile lwe shishoonako sheesi ukholele, ne wekhaliilikha? Ne n'utsiinisibwa lwe khuukhola buulayi, naluundi wekhaliilikha, shino shisiimibwa mu moni tsa Wele.

²¹Shino nisho sheesi mwalaangibwila, lwekhuuba Kristo aatsiinisibwa khulweenywe, aryo waabalekhela she khuubonelakho, ari nanywe mulondelele mu bikyele byeewe.

²²Niye s'akholakho shishoonako shoosi ta, namwe mbaawo uwawulilakho bubeeyi bwoosi khukhwaama mukhanwa mweewe ta.

²³Nga n'akhomewa s'elamo ilomo yoosi ta; nga n'atsiinisibwa s'ariisariisa ta, ne ewaanayo isi uyo ukhala kimisaango bulayi.

²⁴Kristo umweene asuta bibyoonako byeefwe mu mubili kweewe khu musalaba, nio akile ifwe khube bafu isi bibyoonako, ne khube balamu mu bukwalaafu. Lwe kamakoontsyo keewe, inywe mwawonesebwa.

²⁵Lwekhuuba mwaba nga kamasheese kakatiimatiima busa, ne ari mwakoboole isi umwaayi luundi umuliindi we kimyoyo kyeenywe.