Read lumasaaba 1 Petero 3 Bible Online

1 Petero 3 - lumasaaba bible

1 Petero 3

¹Inywe bakhasi musaambo niyo ndweela, ni muwulilatsake baseetsa beenywe, nio balala khu nibo ikhaba nga sibafukiilila Ilomo ya Wele ta, bakalusibwe lwe tsisaambo tseenywe tsindayi.

²Lwekhuuba kane babone bari simulikho lisaanda ta, naluundi muli babetsiililisa mu bulamu bweenywe.

³Buumiliwu bweenywe bulekhe khuba bwe khu ngaaki busa ta; nga khuubowa litsuune, namwe khuukwaara bubuuma bwe zaabu, namwe lwe bikwaaro byonyene ta.

⁴Ne buumiliwu bweenywe bwaakha khuuba bwe bwa ŋali bubuuli mu myooyo kyeenywe. Nga buli she lisuno shishikhoonekha ta, shishokesanisa kumwoyo kwe buwolu, kukwitsililiisa. Ikwo nikwo kumwoyo kwe lisuno mu moni tsa Wele.

⁵Lwekhuuba eyino niyo isaambo isi bakhasi bakhosefu be khaale babaara khukhwiyikina khwawe mu Wele ni bakhakatsakakho khukhwimiliisa, nga bawulila baseetsa bawe.

⁶Umukhasi Sara naye aba aryo nga awulilatsaka Iburayimu umuseetsa weewe nga amulaanga ari, “Umukoosi.” Inywe muryo muli bakhaana ba Sara, ni muba nga mukhola bibiili biilayi, nga mbaawo shishiindu shoosi shishibariisa ta.

⁷Ni nanywe baseetsa musaambo niyo ndweela mube babaamanya nga ni mumenya ni bakhasi beenywe, nga mubeesamo lukoosi, nga mumanya muri nibo bali shibuumbe shitoro. Ni naluundi nga mumanya muri nabo balisikhila atweela ni nanywe shiwaanwa sha Wele she buulamu bukhawawo ta, nio ilekhe khubawo shishiindu shishishinjilila khuuloomba khweenywe ta.

⁸Shishakamayo be buulebe, inywe mweesi ni mumenyatsake mu butweela buli muundu n'uwashe. Mukanane nga be buulebe, mube be kumwoyo kumulayi luundi bawolu.

⁹Mukhasasulatsaka buubi lwe buubi ta, khuukhoma lwe khuukhoma ta. Ne muloombatsake tsikhabi lwekhuuba isho nisho shishabalaangisa nio musikhile tsikhabi.

¹⁰Lwekhuuba shisharonebwa shiloma shiri, “Uyo ukana khuuba ni buulamu bulayi ni khuubona bifukhu bilayi, aakha aliinde lulimi lweewe isi buubi bwoosi, ni kumunwa kweewe kulekhe khukanikha bye bubeeyi ta.

¹¹Umuundu aakha arure mu khukhola buubi akhole bulayi, aakha aweentse lukoosi luundi alulondelele.

¹²Lwekhuuba tsimoni ts'Omukasya tsili khu bakwalaafu, ni kamaru keewe kamekule isi khuuloomba khwaabwe, ne mu moni mweewe mukhaandisa abo babaakhola buubi.”

¹³Naanu unabakhola buubi ni muba nga mwiwuuma khuukhola buulayi?

¹⁴Ne ikhaba nga mutsiinisibwa lwe khuukhola bye bukwalaafu muli ni khabi. Mukharya ta, naluundi mukheyembelela ta.

¹⁵Ne mu myoyo kyeenywe, ni mwiisemo Kristo lukoosi nga mumanya muri ali Umukasya umukhosefu. Buli ndaalo ni mube berekefu khukhwiilamo buli umuundu yeesi ubareeba lwashiina muli ni kumwiyikino kuno. Ne shino mushikholatsake ni buwolu ni khukhwisamo lukoosi.

¹⁶Kimyoyo kyeenywe mukari kilekhe khubakho ni she khukhwikiitsibwa ta, nio akile abo babaabakhoma ni babaabawaambila libuba lwe tsisaambo tseenywe tsindayi mu Kristo, bawaambibwe tsisoni lw'ebyo byeesi baloma.

¹⁷Lwekhuuba shilayi khuutaambisibwa lwe khuukhola buulayi, noola shino nikhwo khuukana khwa Wele, khufuurisa khuukhola buubi.

¹⁸Lwekhuuba Kristo aafwa lwe bibyoonako kumuluundi mutweela kwonyene lwa boosi, nga umwiyikinwa aafwa khulwe babaakhali babeyikinwa ta, nio abareere inywe isi Wele. Niye aafwa mu mubili ne mu mwoyo wekyela umulamu.

¹⁹Ni mu mwoyo mweeneyo waatsya waaboolela kimyoyo kikyaba mu bubowe.

²⁰Khaalekho kimyoyo kino kyaba kikikhawulila Wele ta, ne niye wekhaliilikha nga waliindile mu bifukhu bya Nowa byeesi ombekhelamo likhoŋolo. Ni mu likhoŋolo mweenemwo babaandu bafwiiti bari, baboola nga shinaane bonyene, nibo babaawona khuufwa kameetsi.

²¹Ni kameetsi kano kaba shifwaani shishokesana khuubatisibwa khukhuubawonesa nanywe ari, akhuba ndi kameetsi mu khubatisibwa khuno kakhusiinga buumali bwe kumubili ta, ne shili sheesi inywe mwasuubisa Wele khulwe buulayi bwe byambaaso byeenywe. Shino shibareera inywe buwonesi khuubirira mu khulamukha khwa Yesu Kristo.

²²Yesu oyu niye uwenjila likulu, luundi nga ari wekhaale khu mukhono kumulayi kwa Wele. Ibweeneyo bamalayika, ni be bunyala, ni be kamaani boosi bamufukhamilila.