Read lumasaaba 1 Petero 5 Bible Online

1 Petero 5 - lumasaaba bible

1 Petero 5

¹Imbakhoonyakilila inywe basakhulu babaali mu baandu ba Wele, ise samweene umusaakhulu washeenywe, luundi umujulisi we khuutsiinisibwa khwa Kristo, naluundi nga uuli khuukabananila atweela mu shiriifwa isho shishiitsya khubonekha.

²Ni mube babaayi baalayi be kamasheese keesi Wele aabawaambisa. Mukaloleele bulayi, akhuba ndi mwaakha bwaakhi ta, ne ni khuukana nga Wele n'abakana ari inywe mube muryo. Akhuba lwe khukhwiwuuma kamafuurisa ta, ne ni kumwoyo kukuukana khukhwakaanisa.

³Mukhabirisaka buubi abo beesi muwaambisiwile khuulolelela ta. Ne ni mube she khuubonelakho isi kamasheese.

⁴N'umwaayi Umukhulu n'alibonekha, mulinyoola liyabi lye shiriifwa likhafumbuukha ta.

⁵Ni nanywe basaani basooleli, musaambo niyo ndweela, ni muwulilatsake abo babaabafuura bukhulu. Ni mukwaare shikwaaro she buwolu, mwakaanisane mwenyene na mwenyene, lwekhuuba bibyaronebwa bikhosefu biloma biri, “Wele akhaandisa ibo babeyiinga, ne bawolu abawa bubweela.”

⁶Nashiryo ni mube bawolu, nga muli aasi e kumukhono kwa Wele kwe kamaani, nio anyale khubenyusa angaaki mu mbuka ikhali iye aleeyi ta.

⁷Ni mulekhele Wele bye khukhwiwuuma khweenywe byoosi, lwekhuuba niye abenaanayo naabi.

⁸Ni mube meeso, mube beerekefu. Lwekhuuba umusiku weenywe Sitaani akyeendakyeenda, nga ali nga italanyi ibuutsa, nga iweentsa isi kane alye.

⁹Umweeneyo ni mumushinjilile, nga muli bahangafu mu khufukiilila khweenywe. Lwekhuuba ni mumanye muri, khuutsiinisibwa khweene ukhwo nikhwo khweesi be buulebe boosi mu shiibala bakaanana.

¹⁰Ne ni muliba nga mwaamalile khutsiinisibwakho khafwiiti, Wele uwe bubweela bwoosi, uwabalaanga khukhwinjila mu shiriifwa sheewe shikhawawo mu Kristo, umweene aliboolesa, abawangase, abawe kamaani.

¹¹Bunyala bube bubweewe biilo ni biilo. AMIINA.

¹²Imbaronela ibaluwa yino inyiimbi nga injeetebwakho ni Silwano, isi nambaasa khuuba uwe buulebe umwiyikinwa, nga mbakhoonyakilila luundi nga imbaboolela ndi; ibwo nibwo bubweela bwa ŋali bwa Wele. Ni mubuwaangalilemo.

¹³Baafukiilisi basheenywe mu Kristo be Babulooni, nabo babaarobolewa ni Wele atweela ni nanywe, baabasheesa. N'umwaana wase Mako naye waabasheesa.

¹⁴Ni musheesane mwenyene na mwenyene, nga mukwana mu bifuba ni khuukana. Lukoosi lube khusiinywe mweesi babaali mu Kristo.