Read lumasaaba 2 Petero 3 Bible Online

2 Petero 3 - lumasaaba bible

2 Petero 3

¹Bakanwa baase, ari yino niyo ibaluwa yase ikhola khabili khuubaronela. Ne mu baluwa tsino tsombitsana ikhakakho khuusisimusa bibyambaaso byeenywe bikwalaafu mu myoyo kyeenywe, nga imbashebusa khu biindu bino.

²Ingana ndi mushebulile byeesi baŋoosi bakhosefu baaloma khaale, ni likaambila khukhwaama isi Umukasya, uli umuwonesi weefwe lyeesi baarume baabawa inywe.

³Khuunyoowa imbashebusa indi, mu bifukhu bimaliilisi babaandu babaali ni ikileki baliitsa nga baleekelesa. Intsibirisa iye babaandu bano ilondelela kumuluungo kwaabwe. Balibatsekhelela inywe

⁴nga babareeba bari, “Nga n'aloma ari aliitsa, aliitsa liina? Khulwekhuuba khukhwaama nga bakuuka ni baafwa, bibiindu byoosi bili nga ni byaba khukhwaama shiibala ni shibuumbibwa.”

⁵Baŋalilamo busa khuuloba khufukiilila sha ŋali shishiloma shiri khaale, likulu lyabuumbibwa khulwe lomo iya Wele. Naluundi shiibala shabuumbibwa khukhwaama mu meetsi khulwe kameetsi.

⁶Ni khulwe kameetsi tsana, shiibala sishabawo mu bifukhu ibyo ta. Khusalasala khwe kameetsi khwashimila shoosi.

⁷Likulu ni shiibala bibiiliwo aluno ari, biliindibwa ni Lomo ya Wele iyatsana iyo, nga biliindilila khuubyoosha kumulilo khu shifukhu she khuukhalilakho kimisaango, ni khukhwoonakisa babaandu baboonaki.

⁸Inywe bakanwa baase, ni mushebulile ilomo yino indweela muri, mu moni ts'Omukasya shifukhu shitweela shili nga kimiiko shikana shitweela. Ni kimiiko shikana shitweela kili nga shifukhu shitweela.

⁹Umukasya s'alikho akhola mbola nga babaandi ni bambaasa, khukhwoolelesa sheesi aaloma khuukhola ta. Ne shitsilililwa she khukhwikhaliilikha khweewe isi babaandu boosi shili shiri, s'akana umuundu yeesi khuukoraana ta. Ne akhali akana buli muundu ebiiyise arure mu byoonako byeewe.

¹⁰Shifukhu sh'Omukasya shiliitsa nga umwiifwi. Khu Shifukhu isho mu liyoombo lye angaaki, likulu lilikoraanawo. Bibiindu byoosi bibinyoolikhana mu ngaaki bilyoshebwa ni kumulilo byoonakisibwe. Kumulilo kulyoosha shiibala ni bibiishilimo byoosi.

¹¹Ne khukhwaama bibiindu byoosi ni bilyonakisibwa mu saambo iyo, inywe mwandyakhiile khuuba babaandu babaali mu bulamu bwa saambo shiina? Buulamu bweenywe bwakhiile bube bukhosefu nga bulondelela byeesi Wele akana. Naluundi nga muliindilila ni kameelu khukhwoola khwe khukhwiitsa khwe shiriifwa sha Wele.

¹²Khu shifukhu sheene isho khweesi Wele alikhalilakho kumusaango, likulu ni bibiindu byoosi bibiili mu ngaaki biliyengukhila mu mulilo.

¹³Ne khuulondekhana ni byeesi umweene aakhulomela, ifwe khuliindiilila khukhwiitsa khwe likulu lishaakha, ni shiibala shishaakha, bibiitsuule bukwalaafu.

¹⁴Nashiryo bakanwa baase, khukhwaama nga ni mushiliindiilila ibyo, ni mukhakekho mubone muri Wele s'abanyoola nga mulikho likoondo lyoosi namwe shishoonako shoosi ta. Ne lekha abanyoole nga muli mu lukoosi.

¹⁵Ni mwaambaase khu she khukhwikhalilikha khw'Omukasya weefwe, nga shishiindu shishikhuwa ifwe ikhabi iye khuufuna buuwonesi. Shili busa nga uwe buulebe umukanwa Paulo n'abaronela inywe, nga araambisa kamakyesi keesi Wele aamuwa.

¹⁶Ni tsibaluwa tseewe tsoosi natso aarona khu bilomo bino. Mu baluwa tsa Paulo mulimo bibiindu bitweela byeesi umuundu akhamanya waangu ta. Bibyeene bino nibyo byeesi babaandu babaakhamanya ta, ni babaakhalikho luwaande lutuufu ta, byeesi baraambisa mu khwiyonakisa babeene, naluundi ni khukhwonakisa bibyaronebwa bikhosefu bibiindi.

¹⁷Ne nashiryo bakanwa baase, ni mumanye shino: ni mube nga mwaamala khukhwirengarengekha nio balekhe khubakoraanisila mu byoonako bye babaandu babaali ni tsisaambo tsiimbi ta. Mukharura khu bilayi byeesi mulikho ta.

¹⁸Ni mwiloosele khuutsowa mu bweela bw'Omukasya ni mu khumanya Umukasya weefwe, uuli umuwonesi weefwe, Yesu Kristo. Shiriifwa shibe isi Yesu ari ni biilo byoosi. Amiina.