Read lumasaaba 1 Yokana 1 Bible Online

1 Yokana 1 - lumasaaba bible

1 Yokana 1

¹Khubaronela inywe khu biwaamba khu Shilomo shishireera buulamu, shishabawo khukhwaama makiboole. Shilomo shino khwashiwulila, khwashibonakho ni tsimoni tseefwe khwashilolakho, luundi khwashiwaambakho ni kamakhono keefwe. Nisho sheesi khukanikhakho.

²Bulamu ubwo nibwo bubwabonekha, ni nafwe khwabubona, khwabuwakho bujulisi nga khubukanikhakho, naluundi khwababoolela inywe bye buulamu ubwo bubukhawawo ta, bubwabawo ni Paapa, bwakhubonekhela ni nafwe.

³Ifwe byeesi khwabona, luundi khwawulila, nibyo byeesi khubaboolela nanywe, nio mube mu butweela ni nafwe, ni butweela bweefwe ibwo buli ni Paapa, n'Umwaana weewe, Yesu Kristo.

⁴Khubaronela bino nio kumwikhoyo kweefwe kube kumwitsufu.

⁵Buno nibwo buurume bweesi khwawulila khukhwaama isi Umwaana weewe Yesu Kristo, luundi nibwo bweesi khwababoolela inywe; khuri, Wele niye Buwaanga, ni mu niye simulimo shishiilima na khafwiiti khoosi ta.

⁶Ne nikhuloma khuri khuli ni butweela ni Wele, n'enga khukyendela mushiilima, khuba khuli babeeyi, luundi khuba sikhukyendela mu bwa ŋali ta.

⁷Ne ni khuba nga khukyendela mu buwaanga, nga naye n'ali mu buwaanga, khuba khuli mu butweela fwenyene na fwenyene. Ni kamafuki ka Yesu, Umwaana weewe, kakhusiingakho ifwe bibyoonako byoosi.

⁸Ifwe ni khuloma khuri sikhulikho ni shishonako ta, khuba khwiwombesa busa fwabeene, naluundi khuba nga si khulimo bwa ŋali ta mus'iifwe ta.

⁹Ne siinga ifwe khwibiiyisa bibyoonako byeefwe, Wele niye ali umwiyikinwa luundi umukwalaafu. Niye kane akhwiyakhile ifwe bibyoonako byeene, naluundi niye akhupyeluuse ifwe khukhwaama mu bye bubwoonaki bweefwe.

¹⁰Ni khuloma khuri, khushiili khwonakakho ta, khuba khukalusa Wele khuuba umubeeyi, ni shilomo sheewe shiba sishili ni shiifwo mu bulamu bweefwe ta.