Read lumasaaba 1 Yokana 3 Bible Online

1 Yokana 3 - lumasaaba bible

1 Yokana 3

¹Ni mubone khuukana khwa Paapa nga esi khuli khuukali isi ifwe: ifwe khuulaangiwa bari babaana ba Wele. Ni ilala ifwe khuli khuryo. Shino nisho shishikila shiibala shalekha khukhumanya ifwe ta, lwekhuuba sishaamanya Wele ta.

²Bakanwa baase, ifwe ari khuli babaana ba Wele, ne shishiili khumanyikhana bulayi nyaanga nga ni khuliba ta. Khurusakho khwaamanya khuri nyaanga Kristo n'alibonekha, khuliba nga niye, lwekhuuba khulimubona nga n'ali.

³Na buli muundu yeesi uuli ni khukhwiyikina khuno mu Kristo, epyeluuse umweene alekhe khubakho lisaanda ta, abe nga Kristo n'akhalikho lisaanda ta.

⁴Buli muundu ukhola bye bubwoonaki, aba umufuniaaki we kamakaambila ka Wele, lwekhuuba khukhwooneka nikhwo khufuniaaka kamakaambila.

⁵Ne mwamanya muri, Kristo niye etsa khulwe khurusawo bibyoonako byeefwe, naluundi mu niye mbaamo bubwoonaki bwoosi ta.

⁶Buli muundu yeesi uba mu Kristo s'eloosela ni khukhwonaka ta. Ne uyo yeesi uwiloosela khukhwoneka, aba ashiili khumubona namwe khumumanya ta.

⁷Baananywe, umuundu yeesi alekhe khubawombesa ta. Umuundu ukhola bye bukwalaafu, aba umukwalaafu nga Kristo umweene n'ali umukwalaafu.

⁸Ni n'ooyo ukhola bye bubwoonaki aba uwa Sitaani, lwekhuuba Sitaani wayoneka khukhwaama makiboole keene. Ni lwe lomo yino, Umwaana wa Wele okesanisibwa lubuula, nio anyale khumalawo buraambi bwa Sitaani.

⁹Buli muundu yeesi uli umwaana uwa Wele s'akhola bye bubwoonaki ta, lwekhuuba imiitso ya Wele umweene iba ili mu niye, ni naye s'anyala waba nga oneka ta, lwekhuuba aba wasaalikha ni Wele.

¹⁰Ni mu shino nimwo mweesi babaana ba Wele ni babaana ba Sitaani bamanyikhila: buli muundu yeesi ukhakhola bye bukwalaafu ta, namwe uyo ukhakana umuundu washe ta, s'aba umwaana wa Wele ta.

¹¹Buno nibwo buurume bweesi mwawulila khukhwaama makiboole, nga buloma buri: khwakha khukananatsake fwenyene na fwenyene.

¹²Khulekhe khuuba nga Kayini, uwaba uwa Sitaani, weera wandaaye ta. Ne lwashiina amwiira? Lwekhuuba buraambi bweewe bwaba buubi, ne bwa wandaaye bwaba bulayi.

¹³Bebuulebe, mukheyaanga ta, shiibala ni shibabiiyila.

¹⁴Ifwe khwaamanya khuri khwaarura mu khufwa, khwayingila mu bulamu, lwekhuuba ifwe khukana babaandu basheefwe. Uyo yeesi ukhakana baashe ta, aba warama mu khufwa.

¹⁵Buli muundu yeesi ubiiyila umuundu washe, aba umwiiri. Ni nanywe mwabeene mwamanya muri, mbaawo umwiiri yeesi, uli ni bulamu bukhawawo mu niye ta.

¹⁶Lwashino shikila khwaamanya khuukana nga ni khuli: Kristo aawaanayo bulamu bweewe khulweefwe, ni nafwe khuryo shikhwaakhila khuwaanayo bulamu bweefwe khulwe babaandu basheefwe.

¹⁷Noola umuundu yeesi umuyindifu mu biindu bye mu shibala muno abona umuundu washe ali mu butaambi walekha khumwinaanayo, walekha khumuyeeta ta, khuukana khwa Wele khuba khuryeena mu muundu nga uyo?

¹⁸Baananywe, khuukana khweefwe sikhwaakha khuuba busa mulomo namwe munganikha mwonyene ta, ne khwaakha khuuba khuukana khwa ŋali, khukhuubonekhela mu byeesi khukhola.

¹⁹Lwe khuukana khuno nisho shinakhumanyisa shiri khuli be bwa ŋali, ni kimyoyo kyeefwe nga kyawandalasiwile mu moni tsa Wele.

²⁰Ne noola kimyoyo kyeefwe kikhukhalila ifwe kumusaango kwakhufuura, ifwe khuba khwaamanya khuri, Wele mukhulu khufuura kimyoyo kyeefwe, naluundi khuri wamanya buli shiindu shoosi.

²¹Bakanwa baase, noola kimyoyo kyeefwe sikikhukhalila ifwe kumusaango khukhufuura ta, khuba khuli ni khukhwiyikina mu moni tsa Wele.

²²Na buli shiindu shoosi sheesi khuloomba, khushifuna khukhwaama isi niye, lwekhuuba khuwulila kamakaambila keewe, khwakhola ibyo bibimwikhoyesa.

²³Ni nalino nilyo likaambila lyeewe, ari ifwe khwakha khufukiilila mu Mwaana weewe Yesu Kristo, ni khuukanana fwenyene na fwenyene nga niye umweene n'akhulakila.

²⁴Buli muundu yeesi uwulila kamakaambila keewe aba mu Wele, ni Wele aba ali mu niye. Ni lwashino khumanya khuri Wele aba mus'iifwe, khulw'Omwoyo uyo esi akhuwa ifwe.