Read lumasaaba 1 Yokana 4 Bible Online

1 Yokana 4 - lumasaaba bible

1 Yokana 4

¹Be buulebe bakanwa, mukhafukiilisatsaka buli muundu yeesi uloma ari, ali n'Umwoyo wa Wele ta. Ne ni mutseme Umwoyo uyo khubona nga noola ama isi Wele namwe ta, lwekhuuba baŋoosi be bubeeyi bakali benyukhile aasi, basalaniile mu shiibala.

²Mu shino nimwo mweesi kane mumanyile Umwoyo wa Wele: Umwoyo uyo ubuula ari Yesu Kristo wayiitsila mu mubili, aba ama isi Wele.

³Ne buli muundu uwikaana khubuula aryo khu Yesu, aba s'ali ni Mwoyo uwama isi Wele ta. Umwoyo uyo aba uwa Sitaani, umusiku wa Kristo esi mwawulilakho bari, alikhukhwiitsa, ni na ari ano wayiitsa khaale ali mu shiibala.

⁴Baana baase, inywe muli babaana ba Wele, luundi mwamala khaale khuuwula baŋoosi be bubeeyi, lwekhuuba Umwoyo uli mus'iinywe uwe kamaani khufuura uyo uuli uwe shiibala.

⁵Basiku bano nibo bali be shiibala, nashiryo buli sheesi bakanikha shiba she shiibala busa, ni shiibala shibarekeeresa.

⁶Ifwe khuli ba Wele. Nabuli muundu umanyile Wele akhurekeeresa ifwe. Ne uyo ukhali uwa Wele ta, s'akhurekeeresa ifwe ta. Musaambo yino niyo mweesi khumanyilamo Umwoyo wa ŋali ni mwoyo we bubeeyi.

⁷Bakanwa baase, khakhukanane fwenyene na fwenyene, lwekhuuba khuukana khwaama isi Wele, na buli muundu uli ni khuukana aba wasaalikha ni Wele luundi aba waamanya Wele.

⁸Buli muundu ukhali ni khuukana, aba ashiili khumanya Wele ta, lwekhuuba Wele niye khuukana.

⁹Mu shino nimwo mweesi khuukana khwa Wele khwokesewela isi khuli ndi: Wele aarumana umwaana weewe mutweela yenyene mu shiibala ari nio ifwe khunyale khuuba baalamu khuubirira mu niye.

¹⁰Khuukana ukhwo nikhwo khuno: akhuba ndi ifwe khukhwakana Wele ta, ne ndi Wele niye aakhukana ifwe, waarumana Umwaana weewe khuuba imboselo ye bibyoonako byeefwe.

¹¹Bebuulebe bakanwa, Wele nga n'akhukana ifwe aryo, nafwe khwaakha khukanane fwenyene na fwenyene.

¹²Mbaawo umuundu yeesi uwabonakho khu Wele ta. Ne ni khuukanana fwenyene na fwenyene, Wele aba ali mus'iifwe, ni khuukana khweewe khwoolelela mus'iifwe.

¹³Ifwe khwaamanya khuri, ifwe khuli mu Wele, ni Wele naye amenya mus'iifwe, lwekhuuba wakhuwa ifwe Umwoyo weewe.

¹⁴Ni nafwe khwabona, luundi khwawakho bujulisi isi babaandi khuri, Paapa arumana Umwaana weewe khuuba Umuwonesi we shiibala.

¹⁵N'umuundu yeesi ubuula ari Yesu ali Umwaana wa Wele, Wele aba ali mu muundu uyo, ni naye aba mu Wele.

¹⁶Nafwe khwaamanya luundi khwaayiyikamilila khu khukana khweesi Wele ali nakhwo isi khuli. Wele niye khuukana, na buli muundu yeesi uba mu khukana, aba mu Wele, ni Wele aba ali mu niye.

¹⁷Mu shino nimwo mweesi khuukana khwoolelesewela mus'iifwe, nio khunyale khuuba ni kamaani khu shifukhu she khukhalilakho kumusaango, lwekhuuba buulamu bweefwe mu shiibala muno khubumenya nga Kristo n'aba.

¹⁸Mu khukana khwa ŋali mbaamo khuurya khwoosi ta, ni khuukana khwelala khurusawo khuurya khwoosi, lwekhuuba khuurya khwiitsa lwe shitaambiso. Umuundu uba ni khuurya s'aba olelela mu khukana ta.

¹⁹Ifwe khuli ni khuukana lwekhuuba Wele aanyoowa khuukhukana ifwe.

²⁰Umuundu yeesi n'aloma ari, “Ise ngana Wele,” ne wabiiyila umuundu washe, aba umubeeyi. Lwekhuuba umuundu ukhakana umuundu washe isi abonakho ni tsimoni, s'anyala khuukana Wele isi akhabonakho ni tsimoni ta.

²¹Likaambila lyeesi Kristo akhuwa nilyo lino ndi: “Buli muundu ukana Wele, aakha khuukana n'umuundu washe naye.”