Read lumasaaba Baakayi 12 Bible Online

Baakayi 12 - lumasaaba bible

Baakayi 12

¹Babaandu ba Efurayimu babuusanisa liiye lyaabwe atweela bakhalisa khuutsya i Zafoni, baatsya balomela Yefusa bari, “Lwashiina ukhakhulaangile ifwe khutsya ni nawe khusoolanisa babaandu ba Amoni? Nashiryo, ifwe khutsya khwoosha intsu yoowo atweela ni nawe mu bweene.”

²Yefusa naye waabeelamo ari, “Ise nabaloomba inywe ndi mwiitse mukhuwekho buyeeti nga khulikho khusoolana ni ba Amoni, ne mwaalekha khukana khwiitsa ta.

³Nase ndyo ni nabona nga simulikho mukhuwa buyeeti taawe, ise newaanayo buulamu bwase naatsya nasoolanisa ba Amoni. Umukasya waakhunyalisisa khuuwula busoolo ubwo. Ari lwashiina mwitsiile khukhuusoolanisa ise shaleelo?”

⁴Baaraangilisi be ba Efurayimu beelamo bari, “Inywe babaandu be mu Gileyadi mbaamo shiindu ta, akhali ndi muli busa nga bawuuyi khukhwaama khu Efurayimu ni khu Manase.” Aryo kila Yefusa alaanga atweela liiye lyeewe, waatsya webwakala babaandu ba Efurayimu, wabawula boosi.

⁵Babaandu ba Yefusa be Gileyadi baatsya bawaambaka biifwo e khukhwaambukhila Luluutsi Yorudaani, nga babiliinda. Isho shaakila buli mbuka abe isi abo babaatitukha khukhwaama mu ba Efurayimu, nga bakana khukhwaambukha, babaandu be Gileyadi abe babareeba bari, “Inywe mwaama mu Efurayimu?” Ne abe nabo nga beelilemo bari, “Taawe,”

⁶nabo baaliindi be Gileyadi abe babeelamo bari, “Kale, shilayi. Ne loma muri Shibolesi.” Ne abe babeelamo ni baloma bari, “Shibolesi,” nga sibanyala bashikanikha buulayi ta, nga ni shaakha ta, baaliindi abe babawaamba babeerirawo abweenewo khu Yorudaani. Basaani ba Efurayimu boosi atweela babeeribwa khu mbuka iyo khu luutsi Yorudaani, boola kimikaanda kine ni bikana bibili (42,000).

⁷Aryo Yefusa waaba umukayi wa Isiraeli khuumala kimiiko kisesaba. Ne lwanyuma n'afwa, baamusiikha mu shitweela khu biriimba bye mu Gileyadi.

⁸Lwanyuma lwa Yefusa khuufwa, Ibuzani abe umenya i Beselehemu, waaba umukayi wa Isiraeli.

⁹Ibuzani yuno aasaala babaana bakhaana kamakhumi kataru ni basooleli nabo kamakhumi kataru. Niye aakhwaalikhisa bakhaana beewe isi basaani khukhwaama ibulafu we shikuuka sheewe, naluundi waakhweela basooleli beewe bakhasi khukhwaama ibulafu we shikuuka sheewe. Ibuzani aaba umukayi wa Isiraeli khuumala kimiiko musaafu

¹⁰Ne lwanyuma n'afwa, baamusiikha i Beselehemu.

¹¹Lwanyuma lwa Ibuzani, Eloni khukhwaama mu shikuuka sha Zebuluni wekyela umukayi wa Isiraeli. Niye aaba umukayi khuumala kimiiko likhumi.

¹²Ne lwanyuma n'afwa, bamusiikha i Ayijaloni, mu shibala sha Zebuluni.

¹³Lwanyuma Eloni khuufwa, Abudoni umwaana wa Hileli khukhwaama i Pirasoni, waaba umukayi wa Isiraeli.

¹⁴Abudoni yuno aaba ni babaana basooleli kamakhumi kane, waafuna babetsukhulu kamakhumi kataru, babaakyeendatsakila khu sikilya tsiwaanga kamakhumi musaafu. Niye aaba umukayi wa Isiraeli khuumala kimiiko shinaane.

¹⁵Ne lwanyuma n'afwa, baamusiikha i Pirasoni, shisiintsa she mu Efurayimu, mu shibala she tsingoongo she ba Amaleki.