Read lumasaaba Baakayi 15 Bible Online

Baakayi 15 - lumasaaba bible

Baakayi 15

¹Lwanyuma lwe mbuka khuubirawo, khu mbuka iye likyesa lye ŋaano, Samusoni waasuta khaabusi waatsya nga akana khubonakho khu mukhasi weewe. Aatsya nga akana khuukona ni naye, ne paapawe waalekha khumufukiilisa enjileyo ta.

²Shikila alomela Samusoni ari, “Ise nambaasa ndi ilala iwe s'umukana ta, isho shaakila namuwa umusaani uwaba umulooleleli woowo khu mayiiya. Ne bona iliyo wandaaye umukyeekhe, amufuura niye bumiliwu. N'uyile umweene uyo khuuba umukhasi woowo.”

³Kila Samusoni elamo ari, “Khu luno mbaawo umuundu ukane antsikiitse ise, siinga ikhola she busiku khu ba Firisitiya bano ta.”

⁴Shikila Samusoni arura waatsya wawaamba kamashipwe bitoondo bitaru, waakabowaka kabili kabili ni kimishiinga kyako. Lwanyuma waabibowakho tsindaambi akari e kimishiinga ikyo.

⁵Aryo lwanyuma Samusoni wahaambisa tsindaambi tsana itso, waalekhuula kamashipwe tsana ako khuutsya mu mikuunda kye ba Firisitiya, mumwaba iŋaano injese isi baaba baabowaka kimirwe. Aryo woosha ni kumulilo iŋaano yoosi, isi baaba baabowaka, ni kiindi iyaba nga ishiili, waakimalila khwiloba, ni khuutubakho kimikuunda kye kimizabibu ni kimizeyituni.

⁶Ba Firisitiya ni baareeba bari, “Naanu niye ukholile shino?” Aabawo umuundu uwabeelamo ari, “Samusoni niye ushikholile, lwekhuuba paapa weewe umukhwe uwe Timuna aakaba umukhasi weewe khuuyilibwa n'umusaani ukuundi uwaba umulooleleli weewe khu mayiiya.” Baryo babaandu ba Firisitiya bano, baatsya bawaamba umukhasi tsana atweela ni paapawe baaboosha ni kumulilo baafwa.

⁷Kila Samusoni abalomela ari, “Khukhwaama nga ni mukholile shino, ise singene naakamise ta, khukhwoolesa nga naamalile khuubeliyaasila ilala.”

⁸Aryo Samusoni waatsya waabebwakala nga ali ni lirima liikali naabi, waakhoonyaka baakali khu nibo. Lwanyuma waarurawo waatsya khuumenya mu lifuluma lye mu lwaanda lwa Etamu.

⁹Lwanyuma ba Firisitiya nabo beetsa bebuusila mu nkaambi mu Yuda, baasalanilaka mwoosi khukhwoola aambi ni Lehi.

¹⁰Shikila babaandu be mu Yuda bareeba ba Firisitiya bari, “Lwashiina mulikho mukhwibwakala ifwe?” Ba Firisitiya nabo baabeelamo bari, “Ifwe khweetsile khuuwaamba Samusoni, khumuyile nga umubowe. Naluundi khweetsile khukhwiliyaasa isho sheesi aakhukhola ifwe.”

¹¹Baryo basaani baboola bikana bitaru (3,000) khukhwaama mu Yuda, baatsya mwifuluma lye mu lwaanda lwa Etamu, baamuloma bari, “Iwe s'umanya uri ifwe khuli aasi e buwuli bwa ba Firisitiya ta? Ari ukhukholile shiina shino?” Ne Samusoni naye waabeelamo ari, “Ise nase nabeliyaasile busa isho sheesi baakholile ise.”

¹²Ne babaandu be mu Yuda bano baamwiilamo bari, “Ifwe khweetsile ano khuukhubowa kimikosi, khukhuyile, khukhwakaaniseyo isi ba Firisitiya.” Samusoni waabeelamo ari, “Mbaawo buubi ta. Ne khuurusakho ni muntsitsubile muri, inywe mwabeene singene muntsire ta.”

¹³Nabo beelamo bari, “Taawe. Ifwe kane khukhubowe busa kimikosi, khukhuyile, khukhwakaaniseyo busa isi ba Firisitiya. Ifwe singene khukhwiire ta.” Baryo baamubowa nga baraambisa kimikosi kibili kimishaakha, baamurusa khukhwaama mu lifuluma.

¹⁴Ne Samusoni n'aba nga ali aambi khukhwoola i Lehi, ba Firisitiya beetsa nga bakhupa liyoombo nga bambaasa bari ari baawulile. Ne abweene awo Umwoyo w'Omukasya weekha khu Samusoni, waamuwa kamaani kamakali. Kimikosi kyeesi baamubowela kamakhono keewe, kyaakhalikhaka busa nga ingubo ishiile ni kumulilo, kyaakwa aasi.

¹⁵Aryo kila enama aasi waabukula likuumba lye bunyaanyilo lye sikilya, lilyaba lili aasi aambi awo, waaliraambisa khuukhoonya ba Firisitiya, baboola shikana shitweela shibuufu (1,000).

¹⁶Kila Samusoni aloma ari, “Nga inaambisa likuumba lye bunyaanyilo lye sikilya, nababuusakile mu biyuuyi busa; nga inaambisa likuumba lino, nakhoonyile basaani shikana shitweela.”

¹⁷Nga waamalile khuukanikha bino byoosi, waatuuma likuumba lye bunyaanyilo lino aasi, waalaanga shiifwo isho ari Ramati Lehi.[7]

¹⁸Khu mbuka yino, buulesa bwaba bulikho bulya Samusoni luukali, shikila welootsela Umukasya nga aloma ari, “Ari iwe waambeele ise khuuwula liiye lino lyoosi. Ukhaandekha ise naafwa lwe buulesa, shikile ingwe mu bunyala bwe ba Firisitiya basiinde abo ta.”

¹⁹Aryo Wele wekulawo liloba aasi aambi ni Lehi, isebele yaarubula. Samusoni waakanywa, wewulila buulayi, kamaani kaamukobolamo. Shikila alaanga shiifwo isho ari Eni Hakore[8]. Isebele yino ishiiliwo ni shaleelo shino.

²⁰Samusoni aaba umukayi wa Isiraeli khuumala kimiiko kamakhumi kabili, nga ba Firisitiya bashiwula shibala sha Isiraeli.