Read lumasaaba Baakayi 16 Bible Online

Baakayi 16 - lumasaaba bible

Baakayi 16

¹Shifukhu shitweela aaba nga ali mu shiriimba she ba Firisitiya she Gaza, waabonayo umukhasi malaaya. Aryo waatsya mu ntsu ya malaaya uyo, waakona ni naye shiilo isho.

²Babaandu be Gaza baashiwulilakho bari Samusoni ali ibweene iyo, baatsya bebotokhelela shiifwo isho, nga bamulimiisa shiilo shoosi bari bamwiire nga antsye busha. Baryo baaba nga bamuliindila khu shilibwa she shirimba. Sibaabakho ni shiindu shoosi she khuukhola shiilo isho shoosi ta, nga beelomela bari, “Antsye nga bubuluukha, kane khumwiire.”

³Ne Samusoni waakonakho khakyeekhe wenyukha shiilo khukari, waatsya waakhuula shiilibwa she shiriimba na milyaango kyasho kibiili kyeene khukhwaamila aasi. Aryo waabisuta khu mabeka keewe, waatsya ni nabyo paka khuutsya khwoola khu ngaaki khwe lukiingi lululolelaniile ni Heburoni.

⁴Ndi lwanyumakho nga imbuka yaabirirewo, Samusoni waakwaana n'umukhasi isi baalaanga bari Delila, abe umenya mu litila lya Soreki.

⁵Baaraangilisi be ba Firisitiya beetsa isi Delila baamulomela bari, “Iwe mukhukhonjelesile akhuboolele eena isi kamaani keewe ako kaama, naluundi akhuboolele saambo shiina isi umuundu anyala waamufuuramo, waamubowa kimikosi. Nio nga waakhubooleele, nafwe khwiitse khumuwaambe, khumubowe. Kane buli mutweela khwiifwe khukhuwe iwe bisiintsa bye feetsa shikana shitweela ni shitoondo shitweela (1,100).”

⁶Lwanyuma kila Delila alomela Samusoni ari, “Naakhwikoontseleele, ingana iwe umboolele shiina shishikhukhola iwe waaba ni kamaani kamakali karyo, na shiina sheesi umuundu anyala waakhola khuubona ari akhubowa kimikosi waakhunyweesela ilala.”

⁷Samusoni waamwiilamo ari, “Siinga umuundu ambowa ise nga araambisa kimikosi musaafu, kyeesi bashiili khwoomisa ta, kane imbe umutoro busa nga umuundu ukuundi yeesi.”

⁸Baryo bayiinga be ba Firisitiya baareerera Delila kimikosi musaafu kikishiili khukhwooma ta, waabowa Samusoni nga akiraambisa.

⁹Delila aaba nga waabisile basaani mu biseenge bye mu ntsu yeewe. Kila alomela Samusoni ari, “Samusoni! Bona ba Firisitiya beetsa khuukhuwaamba.” Ne Samusoni waakhalakaka kimikosi ikyo busa nga luwuutsi lulwoshebwile ni kumulilo. Shiryo shimoonyo she kamaani keewe shaalekha khumanyikhana ta.

¹⁰Khu mbuka ikiindi ndi Delila waalomela Samusoni ari, “Iwe waamombesile ise nafwaana busa nga umuundu umusilu. Khu muluundi kuno naakhwikoontseleele, ingana umboolele isaambo isi unyala waaboyibwamo buulayi bubweene.”

¹¹“Siinga umuundu ambowa ise buulayi bubweene ni kimikosi kimishaakha, kyeesi bakharaambisatsakakho ta, ise nikyela mutoro nafwaana nga umuundu ukuundi yeesi.”

¹²Delila waareera kimikosi kimishaakha waakibowesa Samusoni. Khu luno ndi aaba walaangile basaani tsana waababisile mu shiseenge sheewe she mukari. Kila alomela Samusoni ari, “Samusoni! Bona ba Firisitiya beetsa khuukhuwaamba.” Ne Samusoni waakhalakaka kimikosi kyafwaana busa nga buwuutsi.

¹³Lwanyuma kila Delila alomela Samusoni ari, “Kimiluundi kino kyoosi waabeele nga umoombesa ise busa, waantsikyelisa ise khuuba busa nga umuundu umusilu. Ari n'umboolele isaambo isi banyala baakhubowamo.” Samusoni waamwiilamo ari, “Siinga ulukha biyuuyi musaafu bye litsuune lyase bino, nga uraambisa ingubo, waabibowa waabinyweesela ilala, kane mbe umutoro nga umuundu ukuundi yeesi.” Aryo Samusoni n'aba nga waakonele liilo, Delila waalukha biyuuyi musaafu bye litsuune lya Samusoni, waabibowa ni ngubo buulayi,

¹⁴waabinyweesela ilala ni naanga. Kila lwanyuma alomela Samusoni ari, “Samusoni! Bona ba Firisitiya beetsa khuukhuwaamba!” Samusoni wenyukha lutweela busa, waasanyuluulaka litsuune lyeewe lilyaba lyaabowebwele ni naanga khu shitsaangi, wenyukha.

¹⁵Lwanyuma Delila waamuloma ari, “Iwe unyala uryeena waaloma uri ungana ise, ate nga s'unyala waamboolelakho shimoonyo shoowo ta? Kuno kuli kumushiimba kwe khataru nga umoombesa, waalekha khumboolelakho shimoonyo she kamaani koowo ta.”

¹⁶Aryo buli shifukhu Delila waaba nga amuŋuunya, khukhwoolesa Samusoni shaaba nga shaamuluwisile.

¹⁷Lwanyuma lwa byoosi, Samusoni waamuboolela shimoonyo sheewe, nga aloma ari, “Khabuweembo khaakhubekatsakakho khu murwe kwase kuno ta. Lwekhuuba ise naweebwayo isi Umukasya nga umu Nazarene, khukhwaama khu khusaalikha khwase. Nashiryo siinga umuundu abekakho litsuune lyase lino, kamaani kaase kambwamo, ni nase imba mutoro nafwaana nga umuundu kuundi yeesi.”

¹⁸Khu luno Delila n'abona ari Samusoni waamubooleele bwaŋali, waarumanisa buurume isi baaraangilisi be ba Firisitiya, nga aloma ari, “Ni mukobole kumuluundi kuno kwonyene kukwakamayo; lwekhuuba ari wambooleele byoosi.” Baryo baaraangilisi be ba Firisitiya baatsya wa Delila nga baasutile ifeetsa isi baasuubisa.

¹⁹Aryo Delila waawolelesa Samusoni waakonesa kumurwe kweewe khu maraango keewe, lwanyuma walaanga umuundu weetsa waamubekakho biyuuyi musaafu bye litsuune khukhwaama khu murwe kweewe. Isi baatsya khumalila khuubeka nga Samusoni kamaani kaamuweelemo, baamubowa kimikosi.

²⁰Kila lwanyuma amulaanga ari, “Samusoni, bona ba Firisitiya beetsa khuukhuwaamba!” Aryo Samusoni waasisimukha nga ambaasa ari, “Kane ninyukhe nga busheele, intsye imberusekho.” Ne khu mbuka yino Samusoni aaba nga ashiili khushimanyakho ari Umukasya waamururirekho taawe.

²¹Baryo ba Firisitiya baamukulukhila, baamukhuulamo tsimoni tseewe. Baamuyila i Gaza nga ali umubowe mu minyololo kya buroonzi[9], baamura mwipuusu isi baamuraambisila khuusya buufu khu lusisi lwamwo.

²²Ne mu mbuka ikhali iye aleeyi ta, litsuune lyeewe lyaarakikha khuutsowa luundi.

²³Baaraangilisi be ba Firisitiya baakhola kamayiiya kamaboofu kameene, baawaanayo tsisaayilo tsingali naabi isi wele waabwe Dagoni. Shiikila baawuli bano baloma bari, “Samusoni abeele umusiku weefwe umukhulu, ne ari wele weefwe waakhuwonisile khukhwaama mu bunyala bweewe!”

²⁴Ni babaandu boosi ni baamubonakho, baaruuya naabi wele waabwe nga baloma bari, “Samusoni abeele umusiku weefwe uwakhakakho khuuhesa linaambo lyeefwe, nga eera babaandu baakali naabi. Ne ari wele weefwe waakhuyeetile ifwe khuumuwaamba.”

²⁵Khu mbuka yino baaba nga betsuule kumwikhoyo mukali naabi kila balomela angaaki bari, “Ni mukhureere Samusoni akhusangaasemo ari.” Baryo baamisa Samusoni khukhwaama mu mapuusu, baamureera, baamwiimisa akari e lisaayilo lyaabwe likhulu isi tsintseko tsalyo tsibili tsikhulu tsili.

²⁶Samusoni waalomela umusooleli uwaba amuwaamba kumukhono nga amuraangilila ari, “N'umbile ashifwo isi inyala newaambila khu ntseko tse lisaayilo likhulu lino, nio manya neyikamililakho.”

²⁷Lwe kumwikhoyo kuno, lisaayilo lino lyaba nga lyetsuulemo babaandu baakali naabi. Baawuli baraano be ba Firisitiya boosi baaba baliwo, ni babaandu baboola nga bikana bitaru baaba bali khu ntsu khu ngaaki, nga bakana balolelele Samusoni nga abasangaasa.

²⁸Aluno Samusoni waaloomba isi Umukasya ari, “O Umukasya umukhulu, n'ushebulile ise. O Wele, ikhwikoontselela untsisemo kamaani mu muluundi kuno mutweela kwonyene, unyalisise inyale khukhwiiliyaasa ba Firisitiya bano lwe khukhuundusamo tsimoni tsase.”

²⁹Lwanyuma Samusoni wabaaba kamakhono keewe, wawaamba khu ntseko tse lisaayilo tsibili tsikhulu, nga araambisa kumukhono kumulayi ni kumunyeletsi. Waarakikha khuutsisiindikha ni kamaani keene.

³⁰Nga aloma ari, “Lekha ise ifwe ni ba Firisitiya bano!” Aryo waatsisiindikha ni kamaani keewe koosi. Lisaayilo lyoosi lyaafuumukha aasi, lyaakonela baawuli be ba Firisitiya ni babaandu babaabamo boosi atweela. Aryo khu shifukhu she khuufwa khweewe, Samusoni aahesa babaandu baakali naabi khuufuurisakho abo beesi aahesa nga shiili mulamu.

³¹Lwanyuma babandaaye ni be muungo mweewe boosi baatsya baasuta kumulaambo kweewe. Baakureera ingo, baakusiikha akari a Zora ni Eshitawolu, isi baasiikha paapawe Manowa. Samusoni aaba umukayi wa Isiraeli khuumala kimiiko kamakhumi kabili.