Read lumasaaba Baakayi 17 Bible Online

Baakayi 17 - lumasaaba bible

Baakayi 17

¹Abawo umusaani isi balaanga bari Mika, abe umenya mu shibala she mu ngoongo sha Efurayimu.

²Shifukhu shitweela waalomela maayi weewe ari, “Ushebulila bisiintsa bye feetsa shikana shitweela ni shitoondo shitweela (1,100), byeesi umuundu akhwiibakho nio lwanyuma iwe utsube umuundu mweene uwabikhwibakho? Bona bisiintsa bye feetsa ibyo bili ni nase, ise niye uwabiyila.” Lwanyuma maayi weewe waaloma ari, “Umukasya khali akhuweele iwe ikhabi lwe khuufukiilila uryo.”

³Aryo waakobosela maayi weewe ifeetsa iyo, kila maayi weewe mweene aloma ari, “Ari ise imbaanayo ifeetsa yino isi Umukasya. Khulw'omwaana wase, intsya khutsikholamo shifwaani she shishuuma.”

⁴Aryo kila maayi weewe uyo ayilila umuundu umubasi we feetsa, naye uwakikholamo shifwaani, ni ba wele. Lwanyuma baabisuta baabiyila mu ntsu wa Mika.

⁵Mika yuno aaba ali ni lisaayilo lyeewe mweesi esaayila Wele, ne nga mu nilyo waaramo bifwaani, ni bibiraambisibwa bye busaayi. Mu lisaayilo lyeewe lino nga waaramo umusooleli weewe khuuba nga umusaayi.

⁶Mu mbuka iyo mu Isiraeli sibaaba n'umuyiinga ta; nashiryo buli muundu yeesi aakholatsaka nga ni shamwaakhila khuukhola.

⁷Shifukhu shitweela, aabawo umuwele uwe mu shikuuka sha Levi khukhwaama i Beselehemu shishiili mu Yuda, wakyeenda waatsyayo.

⁸Aryo woola mu Efurayimu, nga aweentsa shiifwo mwe khuumenya. Ne n'aba nga akyeenda, woola aango a Mika, waaba nga uwiimikhakho.

⁹Kila Mika amureeba ari, “Iwe waama waheena?” Naye umuwele yuno waamwiilamo ari, “Ise ndi uwe mu shikuuka sha Levi, naama mu Beselehemu shishiili mu Yuda, naluundi ise ndi khuweentsa shiifwo she khuumenyamwo.”

¹⁰Kila Mika naye waamwiilamo ari, “N'umenye ano ni nase, uryo wikyele nga paapa luundi umusaayi wase. Ni nase kane ikhuwe bisiintsa likhumi bye feetsa, ni bikwaaro byoosi byeesi ukana buli mwiiko, naluundi kane ikhuwatsake biilyo byoosi byeesi unakana.”

¹¹Umu Levi yuno waafukiilila bino byoosi byeesi Mika aamulomela. Aryo umuwele yuno wekyela nga mutweela khu basooleli beewe.

¹²Mika wekhasa umu Levi yuno khuuba nga umusaayi weewe, aryo wamenyatsaka mu ntsu yeewe.

¹³Lwanyuma Mika waaloma ari, “Ari namanyile ndi Umukasya kane aambe ise tsikhabi, lwekhuuba ari indiyo n'umu Levi uwikyelile umusaayi wase.”