Read lumasaaba Baakayi 19 Bible Online

Baakayi 19 - lumasaaba bible

Baakayi 19

¹Mu biifukhu ibyo ba Isiraeli baaba nga sibali n'umuyiinga ta. Aabawo umusaani mutweela khukhwaama mu shikuuka sha Levi, uwaba nga amenya mu shisiintsa she mu shaalo mu shibala she tsingoongo sha Efurayimu. Lutweela waayila umukhasi khukhwaama mu Beselehemu she mu Yuda.

²Ne umukhasi yuno s'aba umwiyikinwa isi ali ta, aryo waamulekha waarekukha weelayo iwaabwe wa paapa weewe mu Beselehemu mu Yuda. Ne nga waamalileyo kimyeesi kine,

³umuseetsa weewe waamuloondakho, nga akhakakho khuubona ari amukhonjelesa akoboleyo ni naye. Aryo waatsya i Beselehemu, nga atsya n'umwakaanisi weewe, ni tsisikilya tsibili. Ne n'olayo, umukhasi uyo waamwakaanila mu ntsu ya paapa weewe. Ni paapa weewe n'abona khu musaani weewe umukhwe, waamwikhoyela ni kumwikhoyo kumukali naabi.

⁴Aryo paapa weewe umukhwe yuno waamwikoontselela ari aramekho ni nabo imbuka injeekhe iri. Shikila umusaani weewe umukhwe yuno waaramayo biifukhu bitaru, nga balya luundi banywa.

⁵Ne khu shifukhu she khaane, baawuuna naabi khukhwinyukha mamilimili, nga umusaani umu Levi erekekha khuuloota iweewe. Ne paapa weewe umukhwe shikila amuloma ari, “N'ubekho ni khakhaandu khe khuulyakho nio lwanyuma utsye.”

⁶Baryo bekhala aasi khuulya ni khuunywa boombi. Lwanyuma kila paapa w'omukhaana aloma ari, “Ngana uramekho ano luundi khuumalakho shiilo shitweela shonyene, khwiloosele ni khuusangaala.”

⁷Umusaani ni enyukha ari akana khuutsya, paapa weewe umukhwe waamwikoontselela ari arame. Aryo indi shiilo isho waakonelayo.

⁸Ndi kumutikhinyi kwe shifukhu she kharaano, umusaani wenyukha waawuuna ari aloote, paapawe umukhwe tsana ndi waamulomela ari, “N'ubekho ni khakhaandu khe khuulyakho. Uliindakekho khukhwoola tsinyaanga tse mwihangilwe.” Baryo boombi bekhala baaba nga balya.

⁹Tsiryo tsinyaanga tse kumuusi ni tsoola, umusaani umu Levi, n'umukhasi weewe atweela n'umwakaanisi weewe, benyukha bari bakana khuutsya, paapa w'omukhaana ndi waaloma ari, “Bona ari antsye bulikho bwilabula. Ari ni murame ano shiilo shino khusangaalile atweela. Ne kumukaamba mwinyukhe muwuunile ilala mamilimili mutsye.”

¹⁰Khu luno umusaani umu Levi yuno aba waamaliliile khuuloota. Aryo waayila tsisikilya tseewe tsoombi, n'umukhasi weewe, baawaamba intsila ilola kwe ba Yebusi (niyo Yerusalemu.)

¹¹Antsye ni bwaba nga bubukabukana, boola aambi ni Yebusi. Shikila umwakaanisi weewe amulomela ari, “Tsinyaanga ari tsaabirire, nashiryo khakhuwolelekho ano mu shiriimba she ba Yebusi, khukonele ano.”

¹²Umukoosi weewe waamwiilamo ari, “Taawe. Sikhunyala khwaarama ano ta, lwekhuuba babaandu bano sibali ba Isiraeli ta. Khayo khwilooseleyo khwoole i Gibeya.

¹³Ibweene iyo manya khunyala khwaanyoolayo shiifwo she khuukonamwo, namwe khutsye i Rama.”

¹⁴Baryo beelooselayo ni lukyeendo, khukhwoolesa ni boola i Gibeya, mu shisiintsa sha Benyamini, nga inyaanga yaamalile khuukwa.

¹⁵Baryo baawukhakho benjila mu shiriimba Gibeya, khuutsya khukona. Baatsya mu shiriimba khukari, ne mbaawo umuundu uwabayila khuutsya khukonelakho iweewe shiilo isho ta.

¹⁶Angoloobe eene awo, aabawo umusakhulu mutweela khukhwaama mu shibala she tsingoongo sha Efurayimu, uwaba nga aama mu nimiro yeewe angoloobe awo. Umusakhulu yuno aaba uwe mu shikuuka sha Benyamini, ne nga aba amenya mu Gibeya.

¹⁷Aryo n'alola waabona babaandu baakyeni nga bekhaale akari e shiriimba, waabareeba ari, “Inywe mulikho mutsya wa?” Naluundi ari, “Mwaama wa?”

¹⁸Umusaani umu Levi naye weelamo ari, “Ifwe khwaama mu Beselehemu she mu Yuda isi kwabeele, khulikho khubirawo khuutsya mu shaalo she mu ngoongo sha Efurayimu, nga khutsya mu shifwo e khukhwisaayila Umukasya. Ne bona mbaawo umuundu ukhulaangilekho ari khutsye khukonelekho iweewe shiilo shino ta.

¹⁹Ifwe khweetsiile ilala ni byeesi khunyala khuuraambisa, nga bunyaasi ni biilyo bye sikilya tseefwe, kimikaati ni viini bibyeefwe khuulya bibikhumala.”

²⁰Kila umusakhulu yuno abalomela ari, “Ise naabenyaayiile iwase. Kane imbawe byoosi byeesi mukana, ne khuurusakho ndi mukhamala shiilo shino ano mu shiriimba ta.”

²¹Aryo umusakhulu uyo waabayila ingo weewe, waaliisa ni sikilya tsaabwe. Nabo babeene ni baamala khuusiinga bikyele byaabwe, baaliilakho she ashilo atweela ni naye.

²²Baryo ni baaba nga balikho balya, nga banywa, batweela khu basaani bamooyaani be mu shiriimba isho, beetsa bebotokhelela intsu. Baakhupa lulwiitsi nga baloma nga barafuyila umusakhulu bari, “N'ukhurusile umusaani uwiitsile ano iwoowo, khumukhole nga umukhasi.”

²³Kila umusakhulu yuno mweene ntsu waarura ibulafu waabalomela ari, “Taawe, bandaayase! Naabekoontseleele, mukhakholakho shishiindu shiibi nga shino khu musaani yuno uwiitsile nga umukyeni muungo mwase ta!

²⁴Bona ise ano indiwo n'umukhaana wase induungubaasi busa, n'umusaani umweene yuno alikho n'umukhasi isi ali naye. Kane imbareere bano boombi ibulafu mubakhole shoosi sheesi mukana. Ne imbekoontselela, mukhakholakho khu musaani yuno shishiindu shiibi ta.”

²⁵Ne basaani bano bekaana khuuwuliilisa byeesi umusakhulu yuno aakanikha isi bali. Shikila umusaani umu Levi arusa umukhasi weewe ibulafu waamusiindikha isi bali, wekalawo lulwiitsi. Basaani be mu shiriimba bano baamukholakho bye buyeyani, nga boosi bamukhola baryo shiilo isho shoosi. Lwanyuma antsye ni bwabuluukha, baamulekha waatsya.

²⁶Antsye ni bwaba nga busha, umukhasi uyo weelayo khu ntsu isi umuseetsa aaba. Aryo waakwa aasi aambi ni ntsu, waaba abweene awo khukhwoolesa inyaanga ni yarura.

²⁷Khu mbuka nyene iyo, umuseetsa wenyukha wekulawo lulwiitsi nga akana khuutsya, waanyoola umukhasi tsana nga waakwiile waakonele aambi ni lulwiitsi. Ne nga wahaambile kumukhono kweewe khu biniinilo bye mulyaango.

²⁸Umusaani kila amuloma ari, “Ari yinyukha khutsye.” Ne nga mbaawo sheesi amwiilamo ta[11] Aryo kila umusaani amusuta waamura khu sikilya yeewe, waatsya ni naye ingo weewe.

²⁹Ne n'ola ingo weewe, waabukula kumubano kweewe, waakhalakamwo kumubili kw'omukhasi yuno bisiintsa likhumi na bibili, waabyakaanisaka mu bisiintsa bibikhali bitweela ta bye mu Isiraeli.

³⁰Buli muundu yeesi uwashibonakho wereeba busa ari, “Abe mwabonatsakakho shishiindu shiibi nga shino, namwe abe shaakhukholikhatsakakho, khukhwaama khu mbuka isi ba Isiraeli baamila mu Misiri? Ni mushambaasekho, mu shimenielese buulayi, mushikanikhekho.”