Read lumasaaba Baakayi 3 Bible Online

Baakayi 3 - lumasaaba bible

Baakayi 3

¹Aryo Umukasya waalekhamwo kamanaambo kakaandi khuukhakilisa babaandu ba Isiraeli, abe babaakhoolatsakakho mu busoolo bubwaba mu Kanani ta.

²Isho Umukasya aashikhola nga sheesi akana nikhwo khuunyalisa ba Isiraeli be kumuboolo ukwo, abe babaakhaasoolanatsakakho mu busoolo ta nabo beeyike.

³Abo babaarama mu shibala shino baaba nibo bano: ba Firisitiya ni bayiinga baabwe baraano, ni khuutubakho ni ba Sidoni, ni ba Kiivi babaaba bamenya mu njiinji tsa Lebanoni, khukhwaamila khu Lukiingi Baali-Herumoni khukhwoola i Lebo-Hamasi.

⁴Kamanaambo kano kaalekhebwamo khuukhakilisa babaandu ba Isiraeli, khuubona nga ilala abe banyala baatsiila khu makaambila keesi Umukasya aawa Musa khuukawa bakuuka baabwe.

⁵Baryo babaandu ba Isiraeli baamenya atweela ni ba Kanani, ni ba Hiiti, ni ba Amori, ni ba Perizi, ni ba Hiivi, atweela ni ba Yebusi.

⁶Baayilana mu bukhwaale; nga ba Isiraeli bayilana ni babaandu be kamanaambo kano, shino shaakila nabo baarakikha khukhwisaaya ba wele be kamanaambo kano.

⁷Babaandu ba Isiraeli ndi baarakikha khuukhola bibiindu bye bumoyaani, beebilila Umukasya Wele waabwe, ndi baarakikha khukhwisaaya ba Bayaali ni ba Ashera.

⁸Shino shaakila lirima lyaniinaniina Umukasya, waalekha babaandu ba Isiraeli khuuwulibwa n'umuyiinga Kushani Rishasayimu uwe shisiintsa sha Siriya she ngaaki. Baawula ba Isiraeli khuumala kimiiko shinaane nga balakila buli mutweela khuusasula kumusolo.

⁹Ne imbuka ni yoola, nibo baalilila Umukasya lwe buyeeti. Aryo Umukasya waabarobolela Osinieli, umwaana wa Kenazi, wandaaye wa Kalebu umukyeekhe, khuubawonesa.

¹⁰Umwoyo w'Omukasya weekha khu Osinieli, wekyela umukayi wa Isiraeli, waabaraangilila khuutsya mu busoolo khuusoolana ni Kushani Rishasayimu umuyiinga wa Siriya. Umukasya waawa Osinieli buunyali, waamusoolanisa, waamuwula.

¹¹Abweene awo ba Isiraeli baafunakho lukoosi mu miiko kamakhumi kane, khukhwoolesa khu khufwa khwa Osinieli umwaana wa Kenazi.

¹²Luundi ndi ba Isiraeli baarakikha khuukhola bye bumoyaani nga bamiinyaalila Umukasya. Ndi khulwa shino, Umukasya waabasiindikhila umuyiinga Egiloni uwa Mowabu, waabasoolanisa waabawula.

¹³Umuyiinga Egiloni yuno aabuusa ba Amori, ni ba Amaleki beetsa betubaasa ni naye, nio lwanyuma waatsya webwakala ba Isiraeli. Nabo baryo atweela baatsya bawaamba shiriimba Yeriko.

¹⁴Aryo umuyiinga Egiloni waawula Isiraeli khuumala kimiiko likhumi na shinaane.

¹⁵Babaandu ba Isiraeli ndi belootsela Umukasya lwe buyeeti. Ndi luundi Umukasya waabarobolela Ehudi, khuuba umuwonesi waabwe. Ehudi yuno aaba umusaani umunyeletsi, umwaana wa Gera, uwe mu shikuuka sha Benyamini. Babaandu ba Isiraeli baarumana Ehudi mweene khuuyila biwaanwa bye kumusolo kukwabuusibwa isi umuyiinga wa Mowabu, Egiloni.

¹⁶Ne nga ashiili khutsya ta, Ehudi wekholelayo lurima lwe bubwooki bubili, waalwisabikha khu liraango lyeewe lye khu mukhono kumulayi, waabiimbakho tsingubo tseewe.

¹⁷Aryo Ehudi waatsya wahaanayo biwaanwa bino isi umuyiinga Egiloni uwa Mowabu, uwaba umusaani umunere naabi.

¹⁸Lwanyuma lwe khuuwaanayo biwaanwa bino, Ehudi waalomela basaani babaamuyeetakho khuururawo batsye.

¹⁹Ne lwanyumakho nga boolile aambi ni kamabaale kamabeetse i Gilugaali, niye umweene waashuukha weelayo isi umuyiinga Egiloni. Waatsya waamulomela ari, “O Umuyiinga, ise ndiyo ni buurume bwoowo bwe mu shimoonyo busa.” Kila umuyiinga aloma ari, “Ukhanyoowa waalomakho ilomo yoosi ta.” Lwanyuma babaakaanisi beewe boosi baarura mu khaseenge kheesi baabamo.

²⁰Kila Ehudi wesyeenda aambi ni naye. Umuyiinga aaba wekhaale iyo yenyene khu shitsoloŋo sheewe, mu shiseenge she angaaki she mu lubili lweewe. Ehudi waamutsyayo waamulomela ari, “Ise ndiyo ni buurume bwoowo khukhwaama isi Wele.” Umuyiinga wenyukha weemikha khu ngaaki.

²¹Lwanyuma Ehudi waasowoolayo lurima lweewe, nga araambisa kumukhono kweewe kumunyeletsi, waawuna lwenjila muunda mwa Egiloni mukari.

²²Lurima lwoosi lwaweelamo lwaakoraanila mukari mu minaawa kyeewe. Ehudi s'alukhweesamo khuururusamo ta.

²³Lwanyuma Ehudi waarura ibulafu, weekalawo kimilyaango kye shiseenge she angaaki, waakhomekhela ilala.

²⁴Ne lwanyuma nga waatsiile, babaakaanisi b'omuyiinga baakobola baanyoola nga kumulyaango kwe shiseenge she angaaki kushiili kumwikale. Nibo baarama nga bambaasa bari, “Manya lukanile umuyiinga ashiili mukari ashiyeeta.”

²⁵Baryo baarama nga beemile awo, khukhwoolesa ni baabona bari baaluwile. Shino shaakila baabukula bifuungo, bekulawo kumulyaango baanyoola nga umuyiinga Egiloni wakwiile aasi, wafwiile.

²⁶Ne khu mbuka iyo, ni baaba nga bashiliinda, Ehudi aarura, waabirira mu mulyaango kwe kamabaale ke bifwaani, waatsya, waatitukhila i Seira.

²⁷Nga n'olayo mu shibala she mu ngoongo sha Efurayimu ari, waafuura ikhoombi khuulaanga basaani ba Isiraeli boosi khukhwiitsa atweela. Nga boosi beetsile is'ali,

²⁸waabalakila ari, “Nimunoondekho! Umukasya kane akhuyeete khusoolanise khuwule baasiku beefwe ba Mowabu bano.” Baryo ba Isiraeli baaloonda khu Ehudi, khukhwikhilila khukhwoola khu litila lya Yorudaani. Baatsya nga bawaambaka biifwo mweesi babaandu bakhalisila luluutsi khuutsya i Mowabu, baalekha khufukiilisakho umuundu yeesi khuukhalisa ta.

²⁹Khu mbuka iyo baatsya nga beeraka babaandu boosi, buusoolo khuutsya khuwakho, baaba nga beerire basaani be kamaani baboola nga kumukaanda mutweela (10,000) kwe baselikhale ba Mowabu. Mbaawo na mutweela uwatitukhakho ta.

³⁰Khu shifukhu isho, ba Isiraeli baawulila ilala ba Mowabu, baayila imbuka indeeyi nga sibeelakho luundi khuuluumba ba Isiraeli ta. Awo ba Isiraeli baabakho ni lukoosi khuumala imbuka ye kimiiko kamakhumi shinaane.

³¹Lwanyuma lwa Ehudi, Shamugari umwaana wa Anati niye uwekyela umukayi uwawonesa Isiraeli. Mu busoolo bwe shifukhu shitweela, aaraambisa likyooki lilyokiya[2], weera ba Firisitiya bitoondo bisesaba (600).