Read lumasaaba Baakayi 4 Bible Online

Baakayi 4 - lumasaaba bible

Baakayi 4

¹Lwanyuma lwe khuufwa khwa Ehudi, ba Isiraeli ndi luundi beelooselela ilala khuukhola bye bubwoonaki mu moni ts'Omukasya.

²Isho shaakila Umukasya waabawaanayo mu bunyala bw'omuyiinga Jabini, umuyiinga we Hazori, shitweela khu bisiintsa bye mu Kanani. Umukhulu we liiye lyeewe abe bari Sisera, abe uumenya i Harosheesi-Hagoyimu.

³Liiye lya Jabini lyaba lili ni kamakaali ke bibyuuma bitoondo syeenda (900), baryo baabonabonisa ba Isiraeli luukali khuumala kimiiko kamakhumi kabili kamabuufu. Lwanyuma ba Isiraeli baalilila Umukasya khuubayeeta.

⁴Aabawo umuŋoosi umukhasi abe isi balaanga bari Debora, umukyelama wa Lapidosi, nga abe Debora yuno niye uwula Isiraeli khu mbuka iyo.

⁵Abe niye atela khukhwikhala aasi e kuusaala Kusheendu kwa Debora, kukwaba akari a Rama ni Beseli, mu shibala she tsingoongo sha Efurayimu. Abweenewo abe ba Isiraeli beetsa isi niye n'abayeeta khuukhala kimisaango kyaabwe.

⁶Shifukhu shitweela Debora waarumanisa isi Baraka umwaana wa Abinowamu, abe uumenya i Kedeshi mu shikuuka sha Nafutaali. Aamurumanisa nga aloma ari, “Umukasya Wele wa Isiraeli akhulakila iwe ari utsye nga uli atweela ni basaani kumukaanda mutweela (10,000) khukhwaama mu bikuuka bya Nafutaali ni Zebuluni, ubaraangilile khukhwoola khu lukiingi Tabori.

⁷Ibweeneyo Umukasya kane akhonjelese Sisera eetse nga waaraangiliile liiye lya Jabini nga busheele, khuukhusoolanisila aambi ni luluutsi Kishoni. Ne Umukasya kane amuwaaneyo mu makhono koowo.”

⁸Baraka weelamo Debora ari, “Khuutsya kane intsye, ne khuurusakho nga iwe uli khuutsya ni nase. Ne nga siwaafukiilisile khuutsya ni nase, nase singene intsye ta.”

⁹Debora naye weelamo ari, “Mbaawo buubi ta, kane khutsye. Ne ndi khuukhureewula ndi Umukasya atsya khunyalisisa umukhasi khuuba nga niye unawula Sisera. Nashiryo mbaawo umuundu unakhwiisamo iwe lukoosi bari lwekhuuba waawulile mu busoolo ta.” Baryo Debora ni Baraka benyukha baatsya i Kedeshi.

¹⁰Nga bali i Kedeshi iyo, Baraka walaanga atweela shikuuka sha Zebuluni ni sha Nafutaali, ni khuutubakho baselikhale kumukaanda mutweela (10,000). Boosi atweela baakhuumba baatsya nga baloondelela Baraka, nga Debora naye ali atweela ni nabo.

¹¹Khu mbuka yino, Heberi uwaba uwe mu shikuuka sha Keni aaba nga waawuuya khuurura mu balebe beewe, aba amenya aambi ni kuusaala kwe kamaani i Zananimu shishaba aambi ni Kedeshi. Babaandu ba Keni bano baaba babetsukhulu ba Hobabu, uwaba paapa umukhwe uwa Musa[3].

¹²Ne Sisera n'awulila bari Baraka umwaana wa Abinowamu weetsile ali khu lukiingi Tabori,

¹³walaanga atweela liiye lyeewe lyoosi, waarekekha ni kamakaali ke bibyuuma bitoondo syeenda (900). Aryo waaraangilila baselikhale beewe bano, baakhuumba khukhwaama i Harosheesi-Hagoyimu, baatsya khu luutsi Kishoni.

¹⁴Lwanyuma Debora waalomela Baraka ari, “Ari yirekekha, iyi niyo imbuka iye khukhwibwakala Sisera. Lwekhuuba shaleelo shino, Umukasya waamukhuweele mu makhono koowo khuumuwula. Ilala Umukasya waaraangiile khaale khuutsya khuukhusoolanila iwe busoolo buno.” Aryo Baraka waraangilila kumukaanda mutweela kye liiye lyeewe, beekha khukhwaama khu lukiingi Tabori khuutsya mu busoolo.

¹⁵Baraka n'abebwakala, Umukasya waabungaasa Sisera ni naabo babaafuka kamakaali keewe, atweela ni baselikhale beewe boosi. Buli mutweela waaba waariire naabi shaakila Sisera umweene waasuna khukhwaama khu shikaari sheewe, waakhakakho khuutitukha nga atima busa.

¹⁶Ne Baraka waatimisa baasiku beewe bano atweela ni kamakaali kaabwe, khuutsya khwoolela ilala i Harosheesi-Hagoyimu. Mbaawo n'umuselikhale na mutweela khu liye lya Sisera uwaramakho ta.

¹⁷Khuurusakho Sisera umweene niye yenyene uwatima waatsya woola mu lisari lya Yayeeri, umukyelama wa Heberi, uwe mu shikuuka sha Keni. Lwekhuuba abe ba Keni bano baaba bali basaale ni Jabini, umuyiinga wa Hazori.

¹⁸Yayeeri waarura ibulafu khuumwakaanila nga amuloma ari, “Musakhulu, niwinjile mu lisari lyase. Naakhwikoontseleele, nuwinjile. Ukhabakho ni she khuurya shoosi ta.” Aryo Sisera wenjila mu lisari, Yayeeri waamubiimbakho libulaangiti.

¹⁹Sisera tsana waalomela Yayeeri ari, “Buulesa bwantsira. Ikhuloomba ndi n'umbekho kameetsi.” Aryo Yayeeri waafuunula isutilo yeewe, waamuwakho kamabeele, weelayo waamubiimbakho luundi.

²⁰Sisera waalomela Yayeeri ari, “Yiimikha imulyaango. Nikane ubone umuundu yeesi uwiitsa nga areebelesa khuumanya naanu uuli mukari muno, umwiilamo uri mbaawo ta.”

²¹Ne Sisera lwe buuluwe buukali waarakikha khuufuura liilo, naye Yayeeri waasoota mbola nga ali ni nyoondo ni shitsaangi she lisari mu mukhono, waatsya waashisimikhila mu murwe kweewe, shaabiramo sheekha mwiloba, Sisera waafwa na khufwa.

²²Khu mbuka iyo Baraka weetsa nga aweentsa Sisera. Yayeeri waarura ibulafu khuumwakaanila. Waalomela Baraka ari, “Yiitsa mukari ano, ni nase kane ikhwookese umuundu isi abe uli khuweentsa.” Aryo Baraka waamuloondakho khuutsya mu lisari, waanyoola nga Sisera walaambiile awo umufu khaale, nga ni shitsaangi shishiili mu murwe kweewe.

²³Khu shifukhu isho, Wele waawula umuyiinga Jabini uwe mu Kanani, khulwe ba Isiraeli boosi.

²⁴Ni khukhwaamila khu shifukhu sheene isho, ba Isiraeli beekyela be kamaani naabi, beloosela khuweetsekhelesa umuyiinga Jabini, khukhwoolesa ni baamumalilawo ilala.