Read lumasaaba Baakayi 5 Bible Online

Baakayi 5 - lumasaaba bible

Baakayi 5

¹Lwanyuma lwe buusoolo khu shifukhu sheene isho, Debora ni Baraka umusooleli wa Abinowamu beemba kumweenya kuno:

²Nga baaraangilisi be mu Isiraeli baraangiile iburaangisi, nga babaandu ba Isiraeli bewaanileyo khubwaabwe khuubaloondelela, khuukhuruuya iwe O Umukasya.

³Rekeeresa inywe bayiinga! Ni muwuliilise inywe baawuli, nga ise ni niimbila Umukasya Wele wa Isiraeli kumweenya.

⁴O Umukasya Wele wa Isiraeli, iwe nga niwaama i Seyiri, nga ni wakhuumba khukhwaama iyo isi babaandu ba Edomu bamenya, shibala shoosi shaanikina, ni likulu lyaatsukha ifula, ilala kamafuumbi kaatsukha kameetsi.

⁵Tsinjiinji tsatengaala lwe khukhwiitsa khw'Omukasya, ni lukiingi lwa Sinaayi nalwo lwanikina mu moni ts'Omukasya, Wele wa Isiraeli.

⁶Mu mbuka ya Shamugari umwaana wa Anasi, ni mu biifukhu bya Yayeeri, babaandu sibaakana khukyeendela khu nguudo ta, ne bakyeendaani baakana naabi tsintsila tse mu byaalo.

⁷Babaandu be mu byaalo baaweelamo ilala, khukhwoolesa Debora ni eetsa khuukhiinga Isiraeli nga maayi nakhiinga babaana beewe.

⁸Ba Isiraeli ni baakhalawo khukhwisaaya ba wele babaandi, buusoolo bwabalukhawo mu bilibwa bye biriimba byaabwe. Ne nibo mu mikaanda kine kye ba Isiraeli, baaba nga sibalikho ni tsingabo namwe kamafumo ke khusoolanisila ta.

⁹Khuusiima khwe mu mwoyo kwase khutsya isi baaraangilisi be ba Isiraeli, ni isi baselikhale babaabaloondelela. Nashiryo ruuya Umukasya.

¹⁰Nimurekeerese, inywe mweesi babaakyeendela khu sikilya tsiwaanga, naluundi babekhala khu biikhalo byakhwo biiŋooneŋoone buulayi, atweela ni naabo babaakyeendela khu bikyele.

¹¹Murekeerese kamakono ke babeembi be kimyeenya babaabusaniile aambi ni kamalowo ke kameetsi. Nibo bebaluusa khu khuwula khw'Omukasya khuukwalaafu, ni khuuwula khwe baselikhale be mu Isiraeli. Baryo nio lwanyuma babaandu b'Omukasya baakhuumba khuutsya khu bilibwa bye biriimba nga beemba.

¹²Yinyukha uraangile, Debora yinyukha uraangile! Yinyukha uraangile, yinyukha khukhuumbe ni kumweenya. Yinyukha nawe Baraka, fwakhila baasiku boowo, O iwe mwaana wa Abinowamu.

¹³Babaandu b'Omukasya babaaramakho beekha nga bakhuumba atweela ni baakhulu baabwe, baatsya basoolanisa baasiku baabwe be kamaani.

¹⁴Balala beetsa nga baama mu Efurayimu, shiifwo abe shishanyoowa khuumenyamwo ba Amaleki. Babaandi baama mu Benyamini nabo beetsa boongakho. Baakhulu babaandi baraangilila baama mu Makiri ni naabo babaasuta kumusyeendo kwe buukhulu baama mu Zebuluni.

¹⁵Baawuli ba Isakaari beetsa nga bali ni Debora. Ilala babaandu ba Isakaari baaloondakho khu Baraka bekhilila khukhwoola mwitila. Ne mu shikuuka sha Rewubeni baaba nga bali ni khukhwikanakana khuukali mu myoyo kyaabwe.

¹⁶Inywe be mu shikuuka sha Rewubeni, lwashiina mwekhala ingo mwaarama nga muli mu mataala ke kamakheese, mwarama busa nga muwuliilisa busa khuumalaala khwako? Mu shikuuka sha Rewubeni mwabeelamo ilala khukhwikanakana khwe mu myoyo.

¹⁷Babaandu be mu Gileyadi baarama shanjelekha wa Yorudaani. Ne shikuuka sha Dani, lwashiina baarama nga bali khu meeri tsaabwe? Ni shikuuka sha Asheri baarama nga sibenaanileyo ta, baarama busa khu ndulo khwe nyaantsa isi tsimeeri tsiwolela.

¹⁸Ne babaandu ba Zebuluni bewaanilayo ilala buulamu bwaabwe aambi bafwe, ni babaandu ba Nafutaali nabo baryo baatsya bebwakala baasiku mwisoolanilo.

¹⁹Bayiinga be babaandu ba Kanani beetsa baakhusoolanisa ifwe khu luutsi lwa Taanaki aambi ni tsisebele tsa Megido, ne sibaanyalisa khuukhunuulakho bye buyiindifu byeefwe ta.

²⁰Tsinieniesi mu ngaaki natso tsasoolana. Tsinieniesi nga tsiibotokhelela mu nguudo tsatso tsasoolana ni Sisera.

²¹Luluutsi Kishoni lwabeeyawo lwaabayila, luluutsi ulwo lwe khaale Kishoni, kumwoyo kwase khuumba nga wiloosela ni kamaani koosi.

²²Awo lwanyuma bibatasi bye tsiŋwaaŋwa byasiindakilisa aasi ni kamaani, byasiindakilisa aasi ni kamaani ke bye buusoolo bwa Sisera.

²³Malayika w'Omukasya waaloma ari, “Khayo babaandu be mu shiriimba Merozi batsubibwe! Khayo nibo batsubibwile ilala lwekhuuba nibo sibeetsa khuuyeetakho Umukasya ta, khuuyeeta Umukasya khusoolanisa baasiku beewe ta.”

²⁴Ne Yayeeri niye aweebwe naabi tsikhabi, niye umukyelama wa Heberi uwe mu shikuuka sha Keni. Ni mumuwe niye tsikhabi khuufuurisa bakhasi babaaramile boosi babaamenya mu bisari. Niye aweebwe tsikhabi khufuurisa bakhasi babaandi boosi.

²⁵Sisera aamuloomba kameetsi, Yayeeri waamuwa niye kamabeele. Waamuwa luboonda mu shiseesi shishaakhila baayiinga.

²⁶Aryo waatsanuusa kumukhono kweewe mu lisari waabukula shitsaangi, waaraambisa kumukhono kweewe kumulayi, waabukula inyoondo. Aryo waashisimikha mu murwe kwa Sisera, waaraakaka shishoongo sheewe. Waakhwiikha shitsaangi ni nyoondo, shaasalanisaka kumurwe kweewe.

²⁷Aryo Sisera waawetsekhelela busa, waakwa aasi khu meesikamo keewe, waakwa nga waafwiile aasi e bikyele bya Yayeeri.

²⁸Maayi wa Sisera waalolela mwitilisa. Nga alolela mwitilisa waaba nga waaliindiliile khuukobola khweewe, nga aloma ari, “Shiina kila shikaali sheewe shikhali khukhwiitsa? Lwashiina kila ifwe khukhali khuuwulila khusiindikhana khwe bikaali nga biitsa?”

²⁹Niye ni bakhasi beewe be kamakyesi baawa she khukhwiilamo nisho shitweela, nga ni naye umweene elaanganamwo bilomo bino:

³⁰“Ali balikho bakabanana bye buyiindifu byeesi bayaayile, khukhwiyilila umukhasi mutweela namwe babili isi buli musaani. Bikwaaro bibifuura khuubonekha buulayi khulwa Sisera, bikwaaro byeesi baaronaka buulayi mu raangi ifuura buulayi khulwase.”

³¹Umukasya, khali baasiku boowo boosi bafwiile nga Sisera n'afwa. Ne khayo abo boosi babaakhukana iwe baburukhe nga inyaanga niyoosha ni buurafu bubufuura. Awo lwanyuma abawo lukoosi mu shibala she ba Isiraeli khuumala kimiiko kamakhumi kane.