Read lumasaaba Baakayi 7 Bible Online

Baakayi 7 - lumasaaba bible

Baakayi 7

¹Antsye ni bwasha khu shifukhu shisheelakho, Jerubayaali (Oyuno nga niye Gidiyoni) atweela ni liiye lyeewe benyukha nga bushiili mamilimili, baatsya baabuusanila a busebele Harodi. Ne ba Midiyani nibo baaba baabusaniile khu luwaande lwe ngaaki mu litila liliili aambi ni khakiingi More.

²Umukasya waalomela Gidiyoni ari, “Iwe uli ni liiye lye baselikhale liikali naabi. Ise kasita imbanyalisisa inywe khuusoolanisa ni khuuwula ba Midiyani bano, ba Isiraeli banyala baarakikha khukhwibuyila bari nibo babeene babaawulile baasiku bano ni kamaani kaabwe.

³Ni nashiryo laanga baselikhale boowo atweela ubaboolele uri niibawo uriire mu mwoyo kweewe, akhiile khukhwaamukha atsye arure khu lukiingi Gileyadi, atsye ingo weewe.” Shiryo khu nibo kimikaanda kibili ni bikana bibili (22,000), beelayo ingo waabwe, baalekha Gidiyoni ni baselikhale shikana shitweela.

⁴Ne ndi Umukasya waalomela Gidiyoni ari, “Ushiili ni baselikhale baakali naabi! Ari ingana ureere babaandu bano boosi khu luutsi lwe kameetsi. Ibweene iyo ise kane ikhwawulilewo naanu uli ni khuutsya ni nawe, ni naanu ukhakane atsye ta.”

⁵Aryo Gidiyoni waaraangilila baselikhale beewe waabayila khu luutsi lwe kameetsi. Nga bali ibweene iyo, Wele ndi waalomela Gidiyoni ari, “Lolelela ubone isaambo isi buli mutweela anywamo kameetsi. Abo babaakane batahe kameetsi mu makhono kaabwe bakanywe nga imbwa nikhola, ni naabo babaakane bafukhamile aasi khuunywa.”

⁶Abo babaataha kameetsi mu makhono kaabwe baakayila imunwa waabwe baaba bitoondo bitaru byonyene (300). Ne babaaramile boosi baafukhamila aasi khuunywa.

⁷Umukasya waalomela Gidiyoni ari, “Iwe ni baselikhale bano bitoondo bitaru babaatayile kameetsi ni kamakhono kaabwe, ise kane ikhunyalisise iwe khuuwula ba Midiyani bano boosi. Ari khayo babaandu babaaramile bano boosi beeleyo buli mutweela ingo weewe.”

⁸Kila Gidiyoni waalekha ba Isiraeli babaaramile boosi beelayo ingo waabwe, ne niye waarama busa ni bitoondo bitaru byonyene. Bitoondo bitaru bino baarama ni biilyo ni tsikhoombi tsaabo babeelayo ingo. Liiye lya Gidiyoni lyaaba nga lyeemikhile khu lukiingi lulwaba lwaalolelaniile ni litila mweesi ba Midiyani baaba.

⁹Mu shilo isho, Umukasya waalomela Gidiyoni ari, “Yinyukha ari wiikhe mu litila isi ba Midiyani babuusaniile. Indi khuutsya khukhuunyalisisa khuubawula boosi.

¹⁰Ne n'uba nga waariire khuubebwakala, ari n'uwiikheyo isi babusaniile iwe n'umwakaanisi woowo Pura.

¹¹Utsye urekeerese byeesi nibo ari bali khuukanikha. Nga waabiwuliilisile buulayi, iwe kane wiilemo kamaani ubebwakale.” Aryo Gidiyoni n'umwakaanisi weewe Pura baatsya mu litila isi baasiku baabuusanila.

¹²Liiye lye ba Midiyani, ni ba Amaleki, ni babaandu boosi be bwaamaanyaanga, nga baabuusaniile mu litila, nga sibabalikha ta, bafwaanile busa nga tsiisike mu bukali. Ni tsiŋamila tsaabwe tsaba busa nga kumuyekhe kwe khu ndulo khwe nyaantsa mu bukali nga sitsibalikha ta!

¹³Gidiyoni wekhweesa mbola woolayo khu mbuka isi umuundu mutweela aba nga alikho aboolela uwashe ari, “Ise naroorire kamarooro. Mu marooro kano, ise naboone kumukaati kwa seyiri kumuboofu nga kwiitsa kupiringikha kwoola mu nkaambi yeefwe, kwakhupa lisari ni kamaani kamakali kameene, khukhwoolesa nilyakwiile aasi lyoosi!”

¹⁴Kila uwasheewe naye waamwiilamo ari, “Kamarooro koowo sikanyala kamanyisa shiindu shiindi ta, akhali Gidiyoni, umwaana wa Yowasi, umukayi wa Isiraeli. Shino shookesanisa shiri Wele anamunyalisisa khuuwula liiye lye ba Midiyani lyoosi, na buli mutweela uuli nkaambi yeefwe.”

¹⁵Aryo Gidiyoni n'amala khuuwulila kamarooro ni sheesi kaamanyisa, waafukhama aasi wesaaya Wele. Lwanyuma weelayo mu nkaambi ye ba Isiraeli kila akuukuula ari, “Ni mwinyukhe khutsye! Bona Umukasya waakhuweele khuuwula ba Midiyani.”

¹⁶Gidiyoni waawukhanisamo baselikhale bitoondo bitaru ibyo mu bipuri bitaru, waawa buli muselikhale ikhoombi ni nyuungu nga ilimo itaala mukari.

¹⁷Lwanyuma waabalomela ari, “Muli ni khukhuunoondelela ise buulayi. Nga khwoolele khu ndulo khwe nkaambi ye baasiku, mukhola sheesi ise imba nga indi khuukhola.

¹⁸Siinga mumbulila ise ni shipuri shase nga khufuura tsikhoombi tseefwe, nanywe muryo mu bipuri byeenywe mufuure tsitsyeenywe, nga mulaangilila muri, ‘Khulw'Omukasya ni khulwa Gidiyoni.’ ”

¹⁹Aryo Gidiyoni ni baselikhale beewe shitoondo shitweela boola khu ndulo khwe nkaambi ye baasiku, nga nio antsye alimaliyile, khu mbuka isi bashuusilakho baaliindi babaandi, bafuura tsikhoombi tsaabwe, baaraakaka tsinyuungu tsitsaba mu makhono kaabwe.

²⁰Ni bipuri bye baselikhale nabyo bibiramile byafuura tsikhoombi tsaabwe, baaraakaka tsinyuungu tsaabwe. Benyusa tsitaala tsaabwe mu ngaaki mu mukhono kumunyeletsi, ni kumukhono kumulayi bawaamba tsikhoombi. Awo nio buli mutweela walaangilila ari, “Lurima khulw'Omukasya, ni khulwa Gidiyoni.”

²¹Buli mutweela khu baselikhale babaaba ni Gidiyoni waarama nga weemile mu shifwo sheewe, nga bebotokheleele inkaambi ye baasiku. Ba Midiyani baatima baatitukha, nga baantsuwa.

²²Nga baselikhale bitoondo bitaru ni baafuura tsikhoombi tsaabwe luundi, Umukasya waakila baasiku mu nkaambi yaabwe basoolana bonyene na bonyene, nga bawunana tsiindima tsaabwe babeene. Abo babaakheeribwa ta, baatitukha baatsya boola mu bifwo bye aleeyi, nga Besi Shita aambi ni Zerera, khuutsya khukhwoola khu lwaakha ni Abeli Mehola, aambi ni Tabasi.

²³Aryo Gidiyoni walaanga baselikhale khukhwaama mu shikuuka sha Nafutaali, ni sha Asheri, ni sha Manase, khukhwitubaasa atweela mu khuwoona baasiku ba Midiyani.

²⁴Aryo ndi waarumanisa buurume khuutsya khulaanga basaani boosi babaamenya mu shibala she mu ngoongo sha Efurayimu, nga aloma ari, “Ni mwiitse mukhuyeete khuusoolanisa ba Midiyani bano, nio khunyale khukhwoola khu ntsitsi tse kameetsi ka Yorudaani khuukakhiinga, khuutsya khwoolela ilala i Besi Bara, nga ba Midiyani bano bashiili khukoolakho ta.” Baryo baselikhale bano khukhwaama mu Efurayimu baakhola nga Gidiyoni n'abalakila.

²⁵Baabatimisa khukhwoolesa ni baawaamba baaraangilisi ba Midiyani Orebu ni Zeebu. Orebu baamwiirira aambi ni lulwaanda lwa Orebu, ni Zeebu naye baamwiirira aambi ni lisuuriro lye viini lya Zeebu. Baryo beloosela ni khuutimisa ba Midiyani. Lwanyuma baareera kimirwe kya Orebu ni Zeebu isi Gidiyoni, uwaba waaliindiile aambi ni Yorudaani.