Read lumasaaba Baakayi 9 Bible Online

Baakayi 9 - lumasaaba bible

Baakayi 9

¹Abimeleki umwaana wa Jerubayaali waatsya i Shekemu isi babandaaye ba maayi weewe, waabalomela nibo atweela ni shikuuka shoosi ari,

²“Ni mundebeere babekhali ba ano i Shekemu khumanye oba nga bakana khuwulibwa ni basooleli ba Gidiyoni kamakhumi musaafu boosi, namwe bakana khuwulibwa n'umuundu mutweela. Ne ni mushebulile muri ise ndi mutweela khu baana beenywe luundi ndi uwe mu mafuki keenywe kameene.”

³Baryo bakhootsa ba Abimeleki baatsya baakanikha bilomo bino byoosi isi babaandu be Shekemu khulweewe. Baryo ni baamala khurekeeresa buulayi, bakhalawo khuuloondelela Abimeleki lwekhuuba aba ali umulebe waabwe.

⁴Baryo baawa Abimeleki bisiintsa kamakhumi musaafu ke feeza, nga babyaamisa mu lisaayilo lya Bayaali-Berisi. Abimeleki waraambisa tsinusu tsino khuukulilila babaandu babaakhalimo ta, bafukiilile khukhwikyela baloondeleli beewe.

⁵Aryo lwanyuma wamawo waatsya muungo mwa paapawe mu shiriimba sha Ofura, weeraka babandaaye be ba maayi beewe babaandi, kamakhumi musaafu, khu libaale litweela. Ne khurusakho Yosamu umwaana wa Gidiyoni ufuura bukyeekhe yenyene niye uwebisa luundi waatitukha.

⁶Lwanyuma babaandu be Shekemu ni Besi Milo baabuusana atweela aambi ni kuusaala kuboofu kukuuli aambi ni Shekemu khukhwikhasa Abimeleki nga umuyiinga waabwe.

⁷Ne Yosamu n'awulila khu shino, waatsya wemikha khu ngaaki khwe lukiingi Gerizimu, waalomela angaaki nga aloma ari, “Inywe babaandu mweesi be Shekemu, nimumbuliilise nio Wele naye anyale khuubawuliilisa inywe.

⁸Aabawo shifukhu shitweela bisaala byakhalawo khuutsya khwiroborera umuyiinga wabyo. Shishanyoowa bisaala bino byaalomela kuusaala ku olivu biri ‘Iwe n'ube umuyiinga weefwe.’

⁹Ne kuusaala ku olivu kwekaana nga kuloma kuri, ‘Mukana ise indekhe khukhwaamamo kamafura kakaweesa babaandu ni ba wele shiriifwa, niile busa khukhwiwuuba khulwe bisaala bibiindi?’

¹⁰“Bisaala tsana ndi byaatsya khuulomela kuusaala kufigi biri, ‘Iwe n'ube umuyiinga weefwe.’

¹¹Kusaala kuno kufigi nakwo kwekaana nga kwiilamo kuri, ‘Mukana ise indekhe khukhwaamakho kamatuunda kamatokota, niile busa khukhwiwuuba khulwe bisaala bibiindi?’

¹²“Bisaala tsana ndi byaatsya khuulomela kuusaala kusabibu biri, ‘Iwe n'ube umuyiinga weefwe.’

¹³Ne kuusaala kusabibu nakwo kwekaana nga kwiilamo kuri, ‘Mukana ise indekhe khukhwaamamwo iviini isangaasa ba wele ni babaandu, niile busa khukhwiwuuba khulwe bisaala bibiindi?’

¹⁴“Lwanyuma lwayo, bisaala byaakhalawo khuutsya khuukanikha isi kuusaala kwe kamawa biri, ‘Iwe yiitsa ube umuyiinga weefwe.’

¹⁵Kuusaala kwe kamawa kuno kweelamo kuri, ‘Inywe ni muba nga mungana ise khuuba umuyiinga weenywe, nimwiitse mwiibise mu shiniini shase ni nase kane imbakhiinge. Ne ni muba nga mulikho mumoombesa busa, kane kumulilo kwaame musiise, kwooshe kumalewo bisaala byoosi bya Lebanoni!’

¹⁶“Ni nashiryo, inywe ni muba nga mwakhola buulayi, luundi mu mwoyo kumulayi khukhwikyelisa Abimeleki khuuba umuyiinga weenywe, naluundi ni muba nga mwakhola buulayi Gidiyoni ni be muungo mweewe, naluundi ni muba nga mwamukhola buulayi nga abe ni shaakha khuumukholikhakho;

¹⁷lwekhuuba ilala paapa wase aabasoolanila inywe, wewaanayo buulamu bweewe, khuubona ari abawonesa inywe khukhwaama isi ba Midiyani.

¹⁸Ne ari bona shaleelo mwenyukhiile paapa wase ni be muungo mweewe, mweera ni babaana beewe khu libaale litweela. Muryo mwakyelawo mwekyelisa Abimeleki, umwaana w'omukhasi umukulwa khuuba umuyiinga weenywe, lwekhuuba ali umulebe weenywe.

¹⁹Nashiryo inywe babaandu mweesi be Shekemu, ni muba nga mwakholile buulayi nga ni shaakha khuuba isi Gidiyoni ni be muungo mweewe, khayo nambaase ndi inywe ni Abimeleki kane mwikhoyesanatsake.

²⁰Ne ni muba nga mwakhubirisa buulayi Gidiyoni ni be muungo mweewe nga ni shaakha khuuba ta, inoomba ndi khali Abimeleki abahesile inywe, babaandu be Shekemu ni be Besi Milo, mweesi ni kumulilo, naluundi khali nanywe mukholile Abimeleki shishiindu nisho shitweela sheene.”

²¹Lwanyuma lwe bilomo ibyo, Yosamu waatitukha waatsya khuumenya mu shiriimba sha Beeri, lwekhuuba aarya burafu bwa yaayawe Abimeleki.

²²Abimeleki aawula Isiraeli khuumala kimiiko kitaru.

²³Ne lwanyuma Wele waarumana kumwoyo kumubi akari a Abimeleki ni babaandu be Shekemu. Baryo babaandu be Shekemu bano beetsamo shishituluungu isi Abimeleki.

²⁴Mu bino byoosi bibyeelakho, Wele waawa Abimeleki shitaambiso atweela ni babaandu boosi be Shekemu babaamuyeetakho, khulwe khuhesa babandaaye babaana ba Gidiyoni kamakhumi musaafu.

²⁵Baryo babaandu be Shekemu baatsya nga beereka khu ngoongo khu ngaaki khuuliimisa Abimeleki ni baselikhale beewe, baaba nga barumanaka babaandu babaandi khuutsya khunuula babaandu babaabira khu nguudo bibiindu byaabwe. Ne yabawo umuundu uwatsya waaboolela Abimeleki khu luwomelo luno.

²⁶Shifukhu shitweela, Gali umwaana wa Ebedi, waatsya khuumenya mu Shekemu atweela ni babandaaye. Baryo babaandu be Shekemu baamuramo bubwiyikinwa.

²⁷Imbuka niyoola iye likyesa lye kimisabibu, babaandu be Shekemu baatsya mu mikuunda kyaabwe, baabuta kimisabibu, baasuuramwo iviini. Lwanyuma baatsya mwisaayilo lya wele waabwe, baaba ni kamayiiya. Ne ni baaba nga balya luundi nga banywa, baakhomyaasaka naabi Abimeleki.

²⁸Kila Gaali umwaana wa Ebedi aloma ari, “Wuutsi Abimeleki niye naanu? Ni nafwe babaandu be Shekemu nibo banaanu khuuba nga ifwe khuwulibwa ni naye? Niye s'ali busa umwaana wa Jerubayaali, ni Zebuli niye umuro weewe? Ari inywe ni mwaakaanise basaani ba Hamori, lwekhuuba nibo bali babetsukhulu ba Shekemu babeene. Lwashiina ifwe khwakaanisa Abimeleki?

²⁹Ilala ise imba nga niye uuli umuwuli wa Shekemu, khali naarusawo Abimeleki uyo! Khali naamulomela ndi, ‘Yifunilayo baselikhale babaandi, mwiitse ifwe khubasoolanise khubawule.’”

³⁰Ne Zebuli, umukhulu we shiriimba n'awulila bilomo byeesi Gaali umwaana wa Ebedi aloma, lirima lyaamuniina.

³¹Shikila arumanisa buurume isi Abimeleki uwaba nga ali i Aruma, nga amuboolela ari, “Bona Gaali umwaana wa Ebedi, weetsile i Shekemu atweela ni babandaaye, ali khuukhonjelesa shiriimba shoosi shikhurure khwiiwe.

³²Ari ise nambaasa ndi iwe atweela ni baselikhale boowo, mwinyukhe mu shilo, mwiitse mwibuulile mu mikuunda.

³³Kumutikhinyi antsye nga busha, nga inyaanga irura, inywe mwitsukhe khu shiriimba. Ari uri Gaali ni baselikhale beewe beetsa khuubasoolanisa inywe, iwe ukhole shoosi sheesi unyala khuubawula nibo.”

³⁴Aryo Abimeleki ni baselikhale beewe boosi benyukha baatsya i Shekemu mu shilo. Waawukhanisamo baselikhale beewe mu matuuli kane, baatsya bebuulila aambi ni shiriimba.

³⁵Gaali umwaana wa Ebedi waatsya weemikha khu shilibwa she shiriimba. Abimeleki ni baselikhale beewe basookhakayo isi beebisaka.

³⁶Ne Gaali n'ababona, waalomela Zebuli ari, “Bonakho! Iliwo babaandu babaali khukhwaamaka khu lukiingi nga beekha!” Naye Zebuli waamwiilamo ari, “Iwe uli khubona bibiniini bye tsingoongo waambaasa uri babaandu.”

³⁷Ne Gaali waaloma luundi ari, “Taawe. Iliwo babaandu babaali khukhwikhaka khukhwaama khu lukiingi. Naluundi waliwo lituuli liliindi liliili khukhwaamila khu lubeka lwe kuusaala isi babaandu bakanikhila ni kimyoyo kye baafu.”

³⁸Awo nio lwanyuma Zebuli waamwiilamo ari, “Ari khukhwibuyila khwoowo khuli eena? Siyabeele iwe niye uwebuyiile nga uloma uri, ‘Abimeleki niye naanu unyala khuuba umuwuli weefwe i Shekemu?’ Ari babaandu beesi iwe walekelesile beetsile bali ibulafu we shiriimba. Ari rura utsye ubasoolanise khubone.”

³⁹Aryo Gaali waaraangilila baselikhale beewe be Shekemu, baatsya khusoolanisa Abimeleki.

⁴⁰Ne Abimeleki waasoolanisa Gaali waamuwula, aryo waatitukha. Bakali khu baselikhale ba Gaali nabo baatitukha, ne baakali khu nibo beeribwa. Ni kimilaambo kyaabwe kyaakwa nga kyaasalaniile busa khuutsya khwoolela ilala khu shilibwa she shiriimba.

⁴¹Abimeleki niye waarama i Aruma, ne Zebuli waatsya nga atimisa Gaali ni babaandaaye waabarusa mu Shekemu.

⁴²Khu shifukhu shisheelakho, babaandu be mu Shekemu baarura baatsya mu mikuunda khuuraamba nga busheele, ne yaabawo umuundu uwatsya waaboolela Abimeleki.

⁴³Aryo Abimeleki waatsya ni baselikhale beewe, waabawukhanisamo kamatuuli kataru, baatsya bebuulila mu mikuunda. Nga n'abona babaandu barura mu shiriimba, niye ni baselikhale beewe baabebwakala.

⁴⁴Abimeleki ni baselikhale beewe baatima khaangu baatsya baaliindila khu shilibwa she shiriimba. Nga bano bakhola baryo, baselikhale beewe babaaramile baatsya baakwiilikhilisa babaandu iyo mu mikuunda, baabeeraka boosi.

⁴⁵Buusoolo bweloosela khu shifukhu isho shoosi khukhwoolesa Abimeleki ni baselikhale beewe ni baawaamba shiriimba, beeraka ni babaandu babaashibamo boosi. Lwanyuma baafuniaakaka bibyoombakhe bibyaba mu shiriimba byoosi, baasalanisaka ni kumuunyu buli aandu oosi[4].

⁴⁶Babaandu be Shekemu ni baawulila shino, baatimaka baatsya beebisa mu lisaayilo lya Eli-Berisi.[5]

⁴⁷Ne yabawo umuundu uwatsya waaboolela Abimeleki ari babaandu bano baabusaane iyo,

⁴⁸aryo waaraangilila liiye lyeewe, khuutsya khu Lukiingi Zalumoni. Nga batsya ibweene iyo, waasuta iyaywa, waarema lusakya lwe kuusaala, waalusutila khwibeka khweewe. Lwanyuma waalakila baselikhale beewe ari, “Yinyukhilamo! Khola khaangu sheesi muboone nga ise ikhola.”

⁴⁹Baryo buli mutweela khu nibo waarema lusakya, baatsisuta, baaloonda khu Abimeleki. Baatsya baatsipaanga khu matikiiyi ke lisaayilo, baaliwaambisakho kumulilo. Baryo babaandu boosi, basaani ni bakhasi, babaaba beebisilemo, baboola nga shikana shitweela (1,000), baafwiilamo.

⁵⁰Nga waamalile khuuhesa Shekemu, Abimeleki waatsya ndi webwakala shiriimba Sebesi, waashiwaamba.

⁵¹Ne mukari mu shiriimba isho, mwabamo kumunaala kumuwaangafu, mweesi babaandu boosi be mu shiriimba isho baatimila khuutsya khwibisa. Baryo baakhomekhela mukari mu shiriimba, baaniina khu munaala khu ngaaki.

⁵²Abimeleki ni liiye lyeewe baatsya benjila nga bakana khukhwibwaakala kumunaala ukwo. Ne n'aba nga alikho erekekha khuwaambisa shilibwa kumulilo,

⁵³umukhasi mutweela waatuuma libaale liboofu lilyeene, lyaakwa khu murwe kwa Abimeleki, lyaaraaka kumurwe.

⁵⁴Kila Abimeleki alomela umuselikhale umuyeeti weewe uwamuba aambi ari, “Sowoolayo lurima lwoowo, iwe umbune ise ifwe. Singana babaandu beetsa khuloma bari umukhasi niye uwuntsirire ta.” Aryo kila umuselikhale uyo amuwuna lurima, waafwa.

⁵⁵Baselikhale ba Isiraeli ni baabona bari umuraangilisi waabwe waafwiile, beelakayo ingo waabwe.

⁵⁶Aryo Wele waasasula Abimeleki lwe buubi bwoosi bweesi aakhola isi paapawe, nga ni eera babandaaye kamakhumi musaafu.

⁵⁷Ni babaandu be mu Shekemu nabo Wele waabawa shitaambiso lwe buubi bwaabwe bwoosi. Shiryo shitsubo sha Yosamu umwaana wa Gidiyoni sheesi aakhola shoolelela.