Read lumasaaba 3 Yokana 1 Bible Online

3 Yokana 1 - lumasaaba bible

3 Yokana 1

¹Ibaluwa yino yaama isi ise Umusakhulu, nga injironela Gayo, isi ise ingana mu ŋali.

²Umukanwa wase, ise inoomba ndi khali bibiindu byoosi bikhutsiliile iwe bulayi, naluundi ndi ube ni bulamu bulayi. Naamanyile ndi mu mwoyo uli bulayi.

³Naba ni kumwikhoyo kumukali nga bafukiilisi batweela ni beetsa bamboolela nga n'uli umwiyikinwa mu bya ŋali, naluundi n'ulondelela bya ŋali mu bulamu bwoowo.

⁴Imbaawo shishisangaasa ise khuminyisa ni mbulila bari babaana baase bamenya mu ŋali ta.

⁵Umukanwa wase, uli umwiyikinwa mu buraambi bweesi ukholela bafukiilisi, akhaba nga lukana bali beesi iwe ukhabonatsakakho ta.

⁶Babaandu bano baamala khuboolela bafukiilisi babaali ino, khu biindu bibiwaamba khu khukana khwoowo. Ikhuloomba ndi wiloosele khubayeeta beloosele khumenya mu mikhoosi kikikhoyesa Wele.

⁷Khulwekhuuba baasimama lukyeendo lwaabwe lwe khukhwakaanisa Kristo nga sibafunakho buyeeti bwoosi khukhwaama isi abo babaakhali bafukiilisi ta.

⁸Nashiryo ifwe babaamala khaale khufukiilila mu Kristo khuli ni khuyeeta babaandu bano, nio banyalise khukabanana khu buraambi bwe khuleekela bya ŋali.

⁹Ise namala khaale khuronela bafukiilisi mu Kristo buurume bubuumbi buri. Ne naamanyile ndi Diotelefe ukana naabi khuuba nga umuraangilisi waabwe, singane enaaneyo ibyo byeesi inoma ta.

¹⁰Nashiryo nga neetsile khwiitsa iyo, indiruumbula bibiindu byoosi byeesi akhola, nga ni bili bye bunyaalu byeesi akhukanikha khusi ifwe, ni bye bubeeyi byeesi akanikha. Sishili isho shonyene ta, ne s'akana waakanila bafukiilisi basheefwe ta, naluundi akhakakho khushinjilila abo babakana khuubakaanila ate ndi wabatimisa khukhwaama mu Lisaayilo.

¹¹Umukanwa wase, ukhalondelela bibiindu biibi byeesi babaandi bakhola ta. Londelela bibiindu bibiili biilayi. Buli mutweela yeesi ukhola bibiindu bilayi aba alondelela Wele; ne uyo yeesi ukhola bibiindu biibi aba siwamanya Wele ta.

¹²Demeturiyo, buli mutweela amukanikhakho bulayi; ni khukhwamila mu bya ŋali byeesi akanikha. Akhaba ni nase imukanikhakho indi ali umulayi. Ne nga n'umanyile, bujulisi buli bwa ŋali.

¹³Imbeele ni bibiindu bikali byeesi inganile ikhukanikhile, ne shinyala nabirona busa ta.

¹⁴Khukhwaama nga ni nambaasa khukhwakaanana iwe mu mbuka ikhali iye aleeyi ta, khukhabikanikhekho nga khuli atweela.

¹⁵Lukoosi lube ni nawe. Basaale boowo babaali ino boosi bakhusheesele. N'usheesele buli mutweela khu basaale beefwe.