Read lumasaaba Yuda 1 Bible Online

Yuda 1 - lumasaaba bible

Yuda 1

¹Buurume buno bwaama isi ise Yuda, umwakaanisi uwa Yesu Kristo, naluundi nga ndi wandaaye uwa Yakobo. Imburonela abo beesi Wele alaanga, babaamenya mu khukana khwa Wele Paapa, ate nga babaaliindibwa khulwa Yesu Kristo.

²Imbakanisa ndi khali shiisa, ni lukoosi, ni khuukana bibabelekho mweesi mu bwitsufu.

³Bakanwa baase, abe ise ishikhakakho naabi khuubaronela inywe biwaamba khu buwonesi bweesi fweesi khukabananakho, ne nashiboone nga shaakha khubaronela khaangu. Ikhola shino nga imbakhupilisa ndi musoolanile naabi khuufukiilila ukhwo khukhwawaambisibwa bakhosefu ba Wele, kumuluundi mutweela kwonyene nga khuli ni khuumala biilo ni biilo.

⁴Khulwekhuuba iliwo babaandu babaabetubaasilemo mu mbola busa nga inywe simumanya ta. Bibiwaamba khu baandu bano mwafuna khuubareewula makiboole, khuubirira mu burone, nga ni baabakhalila nibo kumusaango. Khulwekhuuba si barya Wele ta, naluundi bashuusaŋana bubweela bwa Wele weefwe, baabwikyesamo intsibirisa imbi. Naluundi bekaana Umuleekeli weefwe yenyene ate nga niye Umukasya weefwe, Yesu Kristo.

⁵Ne akhaba nga bibiindu bino mwaabimanya, ne ngana khuubashebusa nga Umukasya khaale akho n'amusa babaandu ba Isiraeli khukhwaama mu liloba lye ba Misiri. Ne shitweela busa lwanyuma lwayo woonakisa abo abe babaakhamufukiilisamo ta.

⁶Shishiilakho khayo imbashebuse khu bamalayika babaaba ni buunyala bwe angaaki naabi ne baalekha khuliinda bukhulu bwaabwe ta, nga barura mu bifwo byaabwe. Shino shakila Wele waababowela nibo mu shilima she makoombe, nga baabowe ni kiminyololo kikikhakhalikha ta biilo ni biilo, khukhwoolisa shifukhu shikhulu she khuukhalilakho kimisaango ni shilyoola.

⁷Isho shili busa nga babaandu be mu Sodoma ni mu Gomora, ni be mu biriimba bibibebotokheleele ni baakhola. Nabo beebirisa nga bamalayika abo, baakhola bibiindu bye buyeyani naluundi bewaambila mu bikholwa bibiikhali bya busheele ta. Babaandu bano bali mu shitaambiso she mu mulilo kukuukhasima ta, nga she khuubonelakho isi ifwe babaaramile.

⁸Ni babaandu beesi inganishilekho nabo boosi bali shitweela busa baryo. Khulwekhuuba babaandu bano nga babirira mu byambaaso byaabwe, bakhola bibiindu bye bubwoonaki isi kimibili kyaabwe, bafwotsola buwuli bwa Wele naluundi bakhomyaasa bakhosefu babaali mu ngaaki.

⁹Akhaba ni malayika umukhulu ulaangibwa Mikayili, s'aakhola shino ta. Nga bakhaandisana ni Sitaani bari oba naanu ukane ayile kumulaambo kwa Musa, Mikayili s'araambisa lulimi lulukhomyaasa Sitaani ta. Ne aloma busa ari: “Khali Umukasya akhwikiitsile.”

¹⁰Ne babaandu bano bakhomyaasa busa buli sheesi bakhamanyile ta. Ne bibiindu byeesi bamanya mu busaalikhana bwaabwe, nga tsisolo tsye mwiirome, nibyo bibyeene ibyo bibiikila bahela.

¹¹Nga shili she kumutaambo isi bali! Khulwekhuuba baloondelela intsibirisa ya Kayini. Khu lwe kumuluungo kwe kamapeesa, benyoola bari baakholile kumusaango nikwo mutweela kwe khukoraana nga Balamu n'akoraana. Nabo baminyaala nga Kora n'aminyaala, nabo baryo bahela.

¹²Babaandu bano babataambamo khuuswaala muntsibirisa yaabwe ni beetsa khu mayiiya ke buhatweela bweenywe baaliila atweela ni nanywe, ate nga bamenya bonyene, bali busa nga kamasaanda. Bali nga namufweeli isi imbewo ikyeendisa ne nga s'areera ifula ta; nga kimisaala kikikhaama bibyaamo mu mbuka yeesi kyashiile khukhwaama ta. Bali busa nga kimisaala kyeesi tsiindi tsimalile khukhuulibwa, nashiryo kyoomela ilala.

¹³Bikholwa byaabwe bili bye tsisoni byaayireka busa nga bunyaalu bweesi khukhwilyebula khwe inyaantsa khureera. Bali busa nga tsinieniesi tsitsiyiiya busa, tseesi Wele abiikhila shifwo she mu shilima she makoombe she biilo ni biilo.

¹⁴Shaba khu lwe babeene abo kila Enoka, uuli umukuuka uwe kumusaafu khukhwaama khu Adamu, aakhola buŋoosi nga aloma ari, “Bona Umukasya aliitsa ni kimikaanda kye bamalayika beewe bakhosefu.

¹⁵Aliitsa khuukhalila buli shoosi shishiili ni bulamu kumusaango, khuukhalila abo boosi kumusaango babaakhola bikholwa bye tsisoni, ni bilomo byoosi byeesi babonaki boosi babaakharya Wele ta, bamukanikhakho.”

¹⁶Babaandu bano buli busheele beŋuluŋuunya naluundi nga bekiitsa bashaabwe. Balondelela bye kameelu kaabwe; bali babeniinisa angaaki naluundi bali babaalomaka kimilomo kimikali nga babuyila babaandi nio banyalise khuufuna kimikhoosi kyaabwe.

¹⁷Bakanwa baase, ne ni mushebulile byeesi baarume b'Omukasya weefwe Yesu Kristo bababoolela khuliindilila.

¹⁸Baababoolela bari: “Nga bifukhu bimaliilisi byoolile, ilibonekhawo babaandu babaali batsekhelela inywe, naluundi ilibawo babaandu babaloondelela bye kameelu kaabwe.”

¹⁹Babaandu bano nibo babaarereera inywe khukhwawukhanamo nga benaanayo khu byeesi kimibili kyaabwe kikana, nga sibali n'Umwoyo ta.

²⁰Ne inywe bakanwa baase, ni mwiyombakhe mwabeene mu khufukiilila khweenywe khuukhosefu naabi, nga muloombatsaka mu maani k'Omwoyo Umukhosefu.

²¹Ne mwiyayisile mwabeene mu khukana khwa Wele; nga muliindiilila shiisa sh'Omukasya weefwe Yesu Kristo shishiiliboolisa inywe khu bulamu bubukhawawo ta.

²²Noola iliwo babaandu babekanakana, ni mubahandalase.

²³Ni babaandi ni mubawonese nga mubayula khurura mu mulilo, ne babaandi ni bokesanise shiisa nga mwitsililisa, nga simwitiila ni khu bikwaaro byaabwe ta, khulwekhuuba bilikho kamasaanda ke bubwoonaki bwe kimibili kyaabwe.

²⁴Ari shiriifwa ni buyiinga, ni bunyala, ni kamaani bibe isi Wele, uyo unyala khuubaliinda inywe mulekhe khukwa mu byoonako ta. Naluundi niye unyala khuubawaanayo inywe akhali likoondo lyoosiitsana ta, isi shiriifwa sheewe ni kumwikhoyo.

²⁵Shiriifwa shibe isi Wele uyo yenyene Umuwonesi weefwe, khuubirira mu Mukasya weefwe Yesu Kristo, bibyeene ibyo byeesi niye aaba ni nabyo khukhwaama mu miboolo kye khaale ni aluno ari, bibe bibyeewe, biilo ni biilo. Amiina.