Read lumasaaba Khubiimbulilwa 1 Bible Online

Khubiimbulilwa 1 - lumasaaba bible

Khubiimbulilwa 1

¹Buurume buno nibwo khubiimbulilwa khweesi Wele aawa Yesu Kristo, khuububoolela babakaanisi beewe. Buurume buno buwaamba khu biindu bibiitsya khubawo mu mbuka ikhali iye aleeyi ta. Kristo naye aarumana malayika weewe khuuboolela buurume tsana isi umwakaanisi, ulaangibwa Yokana.

²Yokana naye waaboola bibiindu byoosi byeesi aabona, naluundi waakanikha lubuula bibiwaamba khu burume bwa Wele ni khu bujulisi bwa Yesu Kristo.

³Umuundu yeesi usoma bibiindu bye buŋoosi buno, aba ali ni khabi. Ni naabo boosi babaarekeeresa naluundi bawaamba bulayi bilomo bye buŋoosi buno, bali ni khabi. Lwekhuuba imbuka isi bibiindu bino binakholikhilamo, ili aambi khukhwoola.

⁴Buurume buno bwaama isi ise Yokana, nga imburonela Tsikanisa musaafu, tsitsiili mu Asiya. Bubweela ni lukoosi bibyaama isi Wele uyo uliwo, uwabawo, naluundi ulibawo, ni bubweela khukhwaama isi ba mwoyo musaafu babaali iburaangisi we shitsoloŋo sha Wele, bibe ni nanywe mweesi.

⁵Naluundi bubweela ni lukoosi khukhwaama isi Yesu Kristo, uli umwiyikinwa mu bujulisi, bibe ni nanywe mweesi. Uyo niye uwanyoowa khuulamusibwa khukhwaama mu bafu, naluundi ali umuwuli uwe bayiinga be mu shiibala shoosi. Kristo uyo aakhukana ifwe, naluundi niye uwewaanayo khuufwa nga atsukha kamafuki keewe, nio akile akhukangulule ifwe khukhwaama mu byoonako byeefwe.

⁶Shino shakila Kristo waakhukalusa ifwe khuuba buyiinga, bubuuli lituuli lye basaayi babakaanisa Wele weewe, naluundi uuli niye Paapa weewe. Shiriifwa ni bunyala bibe isi Yesu Kristo, biilo ni biilo. Amiina.

⁷Bona uyoshiina alikho etsila mu mafuumbi. Buli muundu yeesi akhaamubone. Akhaba ni nabo babaamuwuna lifumo, nabo bakhaamubone. Ni kamanaambo koosi kakaali mu shiibala nako kaliilila khulweewe. Ilala shikhaabe shiryo. Amiina.

⁸Umukasya Wele umunyali wa byoosi, aloma ari, “Ise niye Alufa, naluundi niye Omega. Ise niye Uliwo, naluundi niye Uwabawo, naluundi niye Ulibawo.”

⁹Ise ndi Yokana yaaya weenywe, naluundi ndi ufukiilila mu Kristo. Ise ingabananila atweela ni nanywe khukhwikhalilikha mu khutaambisibwa khweesi abo babaali mu Buyiinga bwa Wele, balimo. Ise naba nga ndi umubowe khu shikelemeesi sheesi balaanga bari Patimosi. Baambowa bari lwekhuuba naboolela Ilomo ya Wele, naluundi nokesana nga ndi ufukiilila mu Yesu.

¹⁰Ni naba nga ndi ibweene iyo, ni lwoola khu shifukhu she khukhwisaayilamo Umukasya, Umwoyo Umukhosefu wantsikhakho. Kila imbulila likono likali nga lili nga lye khoombi, nga lyamila inyuma wase.

¹¹Nga likono liloma liri, “Byeesi ubona, birone mu burone, ushakaanise kamatuuli ke babafukiilila mu Wele, kakaali mu bifwo musaafu. Nga bano nibo babaali i Efeso, ni babaali i Simurina, ni babaali i Pelugamumu, ni babaali i Siyatila, ni babaali i Sarudi, ni babaali i Filadelifiya, ni babaali i Lawodikiya.”

¹²Ni neshebukha khuubona naanu uwaba nga ali khukhunganikhayo, nabona kimisiindi musaafu nga kili kye zaabu, nga buli kusiindi kulikho itaala.

¹³Akari e kimisiindi kye tsitaala kino, aabawo ufwaana nga Umwaana w'Omuundu. Aaba wakwaarire shikwaaro shileeyi, shisholela ilala aasi e bikhaandakilo byeewe, nga webowele lukhoba lwe zaabu mu shifuba.

¹⁴Litsuune lye khu murwe kweewe abe lili liwaanga tselelele, nga fwaamba, namwe nga kamabeele. Tsimoni tseewe nga tsifwaana nga kumulilo kukuuli khukhwaburukha.

¹⁵Bikyele byeewe abe bimulikha nga shiibya sheesi basiimuulile baamiliisa. Ni likono lyeewe abe lili busa nga luluutsi lulwitsuule ni luwoloola.

¹⁶Mu mukhono kweewe kumulayi abe wawaambile tsinieniesi musaafu. Abe iliwo lurima luluuli lulwooki tsimaande tsoombi, nga lwaama mukhanwa mweewe. Mu moni mweewe abe mulikho mwaburukha nga inyaanga ni yaburukha mwihaangilwe.

¹⁷Ni namubona, ise nakwa aasi, mu bikele byeewe, nafwaana busa nga ufwiile. Ne niye waareera kumukhono kweewe kumulayi, wamaambakho, waanoma ari: “Ukharya ta. Ise niye umukiboole, naluundi ise niye umumalilisi.

¹⁸Ise niye uuli umulamu. Ise abe naafwa, ne bona ari ndi umulamu biilo ni biilo. Ise niye uuli umuwuli uwe khuufwa, naluundi umuwuli uwe'makoombe.

¹⁹Nashiryo rona byoosi byeesi ubona, bibiiliwo ana ari, ni neebyo bibiitsya khubawo lwanyuma.

²⁰Tsinieniesi musaafu ni kimisiindi musaafu kye zaabu nga kilikho tsitaala bimanyisa shino: tsinieniesi musaafu nibo bamalayika musaafu be tsikanisa musaafu. Ne kimisiindi musaafu kye zaabu nga kilikho tsitaala kyeesi uboone nitso tsikanisa musaafu.”