Read lumasaaba Khubiimbulilwa 10 Bible Online

Khubiimbulilwa 10 - lumasaaba bible

Khubiimbulilwa 10

¹Lwanyuma nabona malayika uwe kamaani nga ekha aasi khukhwaama mwikulu. Abe bamuboweleele mu namufweeli, ne nga khu murwe khweewe abe wakwaarire lufutu. Mu moni mweewe abe mufwaanana nga inyaanga, ni bikyele byeewe abe bili nga bisiindi bye kumulilo.

²Mu mukhono mweewe abe wawaambile khaatabo khawulukuse, ne nga khali khakhekule. Kila asaamba shikyele sheewe shilayi mu nyaantsa, ne shinyeletsi washisaamba khu lwoomu.

³Kila akhookha ni likono lye angaaki naabi, liliili nga italanyi n'ibuutsa. Nga n'akhookha, khukuula khwe kimiluundi musaafu khwawuliilikhana.

⁴Nga khukuula khwe kimiluundi musaafu ukhwo khwaamalile khuuwuliilikhana, abe ise indi aambi khuurona. Ne nawulila likono khukhwaama mwikulu nga liloma liri, “Ukharona byeesi khukuula khulomile ta. N'ubiliinde mu shimoonyo.”

⁵Ari malayika isi nabona nga wemikhile khu nyaantsa ni khu lwoomu, wenyusa kumukhono kweewe kumulayi isi likulu.

⁶Kila etsuba mu lisiina ly'oyo uli umulamu biilo ni biilo, uyo uwabuumba likulu ni bibililimo byoosi, uyo uwabuumba shiibala ni bibishilimo, naluundi uyo uwabuumba inyaantsa ni bibikilimo byoosi, nga aloma ari, ikhabawo khuliindakho luundi ta!

⁷Waloma ari, mu bifukhu byeesi malayika uwe kumusaafu alifuuriramo ikhoombi yeewe, she kamakaanga shishaama isi Wele, nga ni shakuukuulibwa ni babaakaanisi beewe baŋoosi, shili ni khukhwoolelesebwa.

⁸Lwanyuma likono lyeesi abe nanyoowa khuwulila khukhwaama mwikulu, lyanganikhayo luundi nga liloma liri, “N'utsye isi malayika uwimikhile khu nyaantsa ni khu lwoomu, ubukule buurone buwulukuse bubwikule bubuuli mu mukhono kweewe.”

⁹Nase ndyo ni naatsya isi malayika uyo, namulomela indi ambe khaatabo tsana khafwiiti. Waanomela ari, “N'ukhabukule, ukhalye. Mukhanwa mwoowo kane khabe khaatokotile nga bubuushi, ne munda yoowo kane khabe khaluluwile.”

¹⁰Nase nabukula khaatabo khafwiiti khukhwaama mu mukhono kwa malayika, nakhalya. Mukhanwa khaatokota nga bubuushi, ne ni namala khukhamila, muunda mwaluluwa.

¹¹Malayika wanoma ari, “Uli ni khuukanikha bibiindu bibikhaakholikhe khu baandu bakali, ni kamanaambo kamakali, ni tsinimi tsingali, ni bayiinga beene.”