Read lumasaaba Khubiimbulilwa 11 Bible Online

Khubiimbulilwa 11 - lumasaaba bible

Khubiimbulilwa 11

¹Lwanyuma malayika waamba shishipiima shishifwaanana nga imiimbo. Waanomela ari: “Ni winyukhe upiime Lisaayilo Likhulu lya Wele, ni shisheeso, ubale ni naabo boosi babaalisaayilamo.

²Ne ukhapiima lulwaanyi luluuli ibulafu we Lisaayilo Likhulu ta, lekha lube. Khulwekhuuba baaluwa Banaambo, ni babeene abo balisambakilila shiriimba shikhosefu khuumala kimyeesi kamakhumi kane na kibili.

³Ni nase indiwa bajulisi baase babili kamaani ke khuukhola buŋoosi, khuumala bifukhu shikana shitweeela, ni bitoondo bibili, ni kamakhumi kasesaba (1,260). Balikhola shino nga bakwaarire bitsina, khukhwokesana khukhwibiiyisa.”

⁴Bajulisi babili bano nibo kimisaala kimisabibu kibili naluundi nibo kimisiindi kibili kye tsitaala kikiili mu moni ts'Omukasya, umuwuli uwe shiibala.

⁵Ne umuundu yeesi n'aloma ari atsikholekho buubi, kumulilo kwama mukhanwa mwatso kwonakisa umusiku uyo. Uyo yeesi abe uwaambaasa ari anyala watsikholakho buubi, uyo amanya busa ari kane eribwe.

⁶Bali ni bunyala bwe khukhwikalawo likulu, nio ifula ilekhe khukhupa ta, mu bifukhu byeesi bakhaabe nga bakhola buŋoosi bwaabwe. Bali ni bunyala khu meetsi, bwe khukakalusa kekyelamo kamafuki, ni bunyala bwe khukhwonakisa shiibala, nga baraambisa luufu lwa buli shikuuka shoosi ni kimiluundi kyeesi bakana.

⁷Ne ni baliba baamalile khuuwa bujulisi bubuwaamba khu Wele, isolo iyaama mwilowo imakoombe, ilibebwakala, ibasoolanise, ibafuure mu busoolo, naluundi ibeere.

⁸Ni kimilaambo kyaabwe kiliba mu mikhoosi kye shiriimba shikhulu, shishilaangibwa musaambo iye tsisimo bari Sodoma namwe Misiri. Ibweene iyo niyo isi batsaangilila Umukasya waabwe khu musalaba.

⁹Babaandu khukhwaama mu bikuuka bibiikhali bitweela ta, ni khukhwaama mu nimi tsitsikhali indweela ta, ni kamanaambo kakaakhali matweela ta, balilolelela kimilaambo ikyo khuumala bifukhu bitaru ni shisiintsa. Sibalifukiilisa kimilaambo ikyo kisiikhibwe mu ŋani ta.

¹⁰Babaandu babaamenya khu shiibala baliikhoya khulwe khufwa khwe baŋoosi abo, basangaale nga bahaana biwaanwa. Khulwekhuuba baŋoosi babili abo abe bekiitsa babaandu babaali khu shiibala khulwe bikholwa byaabwe.

¹¹Ne lwanyuma lwe bifukhu bitaru ni shisiintsa, kumuukha kukuureera buulamu, kwaama isi Wele kulingila mu milaambo tsana. Kilinyukha kimikhe khu ngaaki, ni naabo babaalikibona baliba ni khuurya khukali.

¹²Lwanyuma baawulila likono khukhwaama mwikulu nga libaloma liri, “Ni mwinyukhe mwiitse ino.” Ni abweene awo nga basiku baabwe balolelele, baniina mu ngaaki nga bali mu lifuumbi.

¹³Ni mu nyaanga nyene iyo, alibawo khunikina khwe shiibala khwe kamaani. Shisiintsa shitweela she liikhumi she shiriimba shilikwa aasi. Babaandu baboola bikana musaafu bafwiila mu khunikina khwe shiibala ukhwo. Babaandu babaramile baarya naabi, kila babuyila Wele uwe mwikulu.

¹⁴Ingunyi ikhola khabili yaweele; ne ingunyi ikhola khataru ili aambi, ilikho yiitsa.

¹⁵Lwanyuma malayika ukhola musaafu wafuura ikhoombi yeewe. Aabawo kamakono ke angaaki mwikulu, nga kaloma kari, “Buyiinga bwe mu shiibala ari bwekyelile buyiinga bw'Omukasya weefwe atweela ni Kristo weewe. Umukasya weefwe aliba umuwuli khuumala biilo ni biilo.”

¹⁶Abweene awo, basakhulu kamakhumi kabili na bane babekhala khu bitsoloŋo byaabwe mu moni tsa Wele, beyalisa aasi mafumala, besaaya Wele.

¹⁷Besaaya nga baloma bari, “Khukhusiima iwe Wele, Umukasya Umunyali wa byoosi, uliwo naluundi uwabawo. Khulwekhuuba iwe wekoboseele buyiinga bwoowo bwe kamaani, naluundi waarakikhile khuuba umuwuli.

¹⁸Kamanaambo nga ni kokesanisa lirima, ni nawe wokesanisa lirima lyoowo. Ni imbuka iye khukhalilakho babafwa kimisaango, nga uwa babakaanisi boowo baŋoosi ni bakhosefu boowo biwaanwa yoolile, bakhaba nga bali basaambo shiina. Ari iyi niyo imbuka ye khuuhesa shiibala.”

¹⁹Lwanyuma bekulawo Lisaayilo lya Wele Likhulu, liliili mwikulu. N'isanduukhu iye Ndakaano yaabonekha nga ili mu Lisaayilo Likhulu ilyo. Aabawo khuumulikha khwe tsimbeni, ni liyoombo, ni khuukuula, ni khuunikina khwe shiibala, ni kamararara kamakali kameene.