Read lumasaaba Khubiimbulilwa 12 Bible Online

Khubiimbulilwa 12 - lumasaaba bible

Khubiimbulilwa 12

¹Lwanyuma abonekhawo khabonelo khaboofu mwikulu: Umukhasi nga wakwaarire inyaanga, ni kumweesi nga kuli aasi e bikele byeewe, ni lihabi lye tsinieniesi liikhumi na tsibili nga lili khu murwe kweewe.

²Umukhasi yuno aaba ali shisoombo. Waalilila angaaki naabi mu butsiina, khulwekhuuba abe ali aambi khusaala.

³Lwanyuma abonekhawo khaabonelo khakhaandi mwikulu. Bona kuuremu kuubesemu, kukwaba ni kimirwe musaafu, ni tsiintsika liikhumi, ni kamahabi musaafu nga kali khu mirwe kyakwo.

⁴Kumushiinga kwe kuuremu ukwo kweeya shisiintsa shitweela she khataru she tsinieniesi tse mwikulu, kwaatsikwiisa aasi khu shiibala. Lwanyuma kuuremu tsana kweema mu moni tsy'omukhasi uwaba ali aambi khusaala, nga kukana kwiire umwaana, khaangu akho, lwanyuma lwe khusaalikha khweewe.

⁵Aryo umukhasi wasaala umwaana umusiinde, umwaana uwaba atsya khuwula kamanaambo koosi, nga araambisa imiimbo iye shiibya. Umwaana uyo bamuwutula baamuyila isi Wele, ni isi shitsoloŋo sha Wele.

⁶N'umukhasi welukhila mu mubiimbi, iyabayo shiifwo sheewe sheesi abe Wele aamurekekhela. Waaba ibweene iyo nga bamuliinda khuumala bifukhu shikana shitweela, bitoondo bibili, ni kamakhumi kasesaba (1,260).

⁷Lwanyuma aabawo busoolo mwikulu. Mikayili ni bamalayika beewe baasoolanisa kuuremu. Kuuremu nakwo ni bamalayika baakwo baasoolanisa Mikayili ni liiye lyeewe.

⁸Ne Mikayili ni bamalayika beewe ni baafuura busoolo, baatimisa kuuremu ni bamalayika baakwo khukhwaama mwikulu.

⁹Kuuremu kukwabawo khukhwaama khaale ukwo, kukulaangibwa kuri Sitaani namwe Umusiku, Umuwombesi uwe shiibala shoosi, baakutuuma aasi. Kuryo kwaatuumibwa aasi khu shiibala, ni bamalayika baakwo nabo baatumibwa aasi ni nakwo.

¹⁰Lwanyuma ise nawulila likono lye angaaki nga lyaama mwikulu, nga liloma liri, “Ari buwonesi, ni kamaani, ni Buyiinga bwa Wele weefwe, ni bunyala bwa Kristo weewe byetsile. Khulwekhuuba abe uyo uwaabila be buulebe beefwe, nga niye ubawaabila kumuusi ni shiilo, waatuumibwile aasi.

¹¹“Baafuura Sitaani mu busoolo khulwe kamafuki ke Khasheese, ni ilomo iye bujulisi bwaabwe. Khulwekhuuba ikhaba nga baakana buulamu bwaabwe, ne nga khuufwa khwoolile baabuwaanayo.

¹²Nashiryo ni wikhoye iwe likulu ni babaalimenyamo. Ne she kumutaambo isi inywe shiibala ni inyaantsa. Khulwekhuuba Sitaani wekhile aasi isi inywe muli, nga ali ni lirima likali. Sitaani waamanyile ari imbuka yeewe ili inyiimbi.”

¹³Lwanyuma kuuremu kuukali tsana ukwo ni kwabona kuri baakutuumile aasi khu shiibala, kweloosela khuutaambisa umukhasi uwasaala umwaana umusiinde.

¹⁴Ne umukhasi waaweebwa tsindaha tsibili tsy'ekhosi imboofu, nio bari apururukhe atsye mu shifwo sheewe, sheesi bamuŋoonela. Shiifwo shino shili mu mubiimbi, esi aba atsya khulisiwila khumala imbuka iye kimiiko kitaru ni shisiintsa. Nga ibweene iyo kuuremu sikunyala khukhwoolayo ta.

¹⁵Ne kuuremu kwatsana kwahaanya kameetsi katima nga luluutsi kaloonda khu mukhasi, nio bari kamumile kamwiikhise.

¹⁶Ne shiibala shaatimilila khuuyeeta umukhasi. Shaasama mukhanwa mwasho, shaamila luluutsi lweesi kuuremu kuukali kwahaanya khukhwaama mukhanwa mwakwo.

¹⁷Khulwashino, kuuremu kwakhalalila naabi umukhasi uyo. Kwaatsya khuusoolanisa babaandu babaaba b'omukhasi uyo babaaramawo, nga nibo babaaliinda kamakaambila ka Wele, naluundi nibo babaaba ni bujulisi bwaweebwa ni Yesu.

¹⁸Kuuremu kwatsana kwemikha khu muyekhe, khu ndulo khwe inyaantsa.