Read lumasaaba Khubiimbulilwa 13 Bible Online

Khubiimbulilwa 13 - lumasaaba bible

Khubiimbulilwa 13

¹Lwanyuma ise naabona kuusolo nga kwaama mu nyaantsa kuniina. Kuusolo kuno kwaba ni kimirwe musaafu ni tsintsika liikhumi. Khu ntsika tsakwo khwabakho kamahabi liikhumi. Ni khu buli kumurwe khwabakho lisiina lye khukhomyaasa isi Wele.

²Kuusolo kweesi nabona abe kufwaana nga ingwe. Ni bikyele byakwo abe bifwaana nga bye liiŋu. Kumunwa kwe isolo iyo abe kufwaana nga kwe italanyi. Kuuremu kwatsana kwawaamba kwawa kuusolo ukwo bukhulu ni shitsoloŋo byakwo, ni bunyala bukali naabi.

³Kumurwe mutweela khu mirwe kye kuusolo kuno kwafwaana nga kukwapibwa likuma liboofu naabi. Ne likuma lyeene ilyo abe lyawona. Shiibala shalondelela kuusolo tsana ni khukhwiyaanga khukali.

⁴Babaandu besaaya kuuremu khulwekhuuba kwaba kwaweele kuusolo ukwo bunyala bwakwo. Naluundi besaaya kuusolo nga bareeba bari, “Ufwaana nga kuusolo kuno ali ena? Naanu unyala khusoolanisa kuusolo kuno?”

⁵Kuusolo kwaweebwa bunyala mukhanwa mwakwo khuloma bilomo bye khukhwiyiinga ni khukhomyaasa Wele. Bafukiilila kuusolo ukwo khuuba ni bunyala khumala kimyeesi kamakhumi kane na kibili.

⁶Lwanyuma kuusolo kwatsana kwenyusa mukhanwa mwakwo khukhomyaasa Wele, ni khukhoma lisiina lya Wele, ni shiifwo sheesi Wele amenyamo, ni khukhomyaasa ni naabo babamenya mwikulu.

⁷Lwanyuma baafukiilila kuusolo khukhwibwakala bakhosefu ba Wele bari nio kube umuwuli waabwe. Naluundi kwaweebwa bunyala khu buli bikuuka byoosi, ni babaandu boosi, ni tsinimi tsoosi, ni buli linaambo lyoosi.

⁸Babaandu boosi babaamenya khu shiibala nyaanga balisaaya kuusolo kuno. Akhali abo beesi baamala khuurona kamasina kaabwe nga shibala shishiili khubuumbibwa ta, mu burone bwe babaali baalamu. Buurone buno buli bwe Khasheese kheesi beera.

⁹Umuundu yeesi uli ni kamaru kakarekeeresa, n'arekeerese.

¹⁰Noola iliwo umuundu uwakhila khuyiliwa mu bubowe, aliyilibwa mu bubowe. Noola ali uwe khukhwiribwa ni lurima, aliiribwa ni lurima. Khuno nikhwo khunyindaalila ni bubwiyikinwa khu lubeka lwe babaandu ba Wele bakhosefu.

¹¹Lwanyuma nabona kuusolo kukuundi nga kurura khukhwaama mwiloba. Kuusolo kuno kwaba kuli ni tsintsika nga tsye lisheese, ne nga kukanikha nga kuuremu.

¹²Kuusolo ukwo yaba kuraambisa bunyala bwoosi bwe kuusolo kukwanyoowa mu moni tsakwo. Kusolo ukwo kwakalusa shiibala ni babaandu boosi babaashiilimo khukhwisaaya kuusolo kukwanyoowa, ukwo kukwaba ni imbala iye likuma.

¹³Kusolo ukwo nga kukhola ni bibiyaangisa bikali. Kukhola ni kumulilo kweekha aasi nga kwama mu ngaaki, nga babaandu boosi baboone.

¹⁴Kuusolo kuno kwawombesa babaandu babaaba mu shiibala khulwe bye kamakaanga byeesi kwanyalisa khukhola, khulwe kuusolo kukwanyoowa. Kuusolo ukwo kwakila babaandu boosi be mu shiibala bombekha shifwaani she kuusolo isi bawuna lurima, ne nga kwalekha khufwa ta.

¹⁵Kuusolo kuno kwe khaabili kwaweebwa bunyala khuheela kumuukha kukureera buulamu mu shifwaani she kuusolo kukwanyoowa, nio akile shifwaani isho shinyale khukanikha, ni khukhwiira abo babaloba khukhwisaaya shifwaani she kuusolo ukwo.

¹⁶Luundi kwahanyiinya babaandu boosi, bakyeekhe ni bakhulu, bayindifu ni bataambi, be lukoosi, balekhuule ni bakulwa, khurebwakho khabonelo khu mukhono kumulayi, namwe mu bweni.

¹⁷Shino shikholikha ari nio manya ilekhe khubawo umuundu ufukiilisibwa khukula namwe khukulisa, khurusakho nga ali ni khabonelo akho. Ilyo nilyo lisiina lye kuusolo ukwo, namwe inaamba iye lisiina lyakwo.

¹⁸Ano ukanibwa khuuba ni kamakyesi. Uuli ni kamakyesi n'afumbule kamakhulu ke inaamba iye kuusolo, khulwekhuuba inaamba yino, niyo ili inaamba iy'omuundu. Inaamba yino niyo 666.