Read lumasaaba Khubiimbulilwa 14 Bible Online

Khubiimbulilwa 14 - lumasaaba bible

Khubiimbulilwa 14

¹Lwanyuma nesheenga iburaangisi wase nabona Khasheese nga kheemikhile khu lukiingi Sayuuni. Abe khali ni babaandu baboola kumweeka mutweela, ni kimikaanda kine ni bikana bine (144,000). Bano nibo babaaba ni lisiina lyeewe, luundi nga bali ni lisiina lya Paapa weewe, byoosi nga byaaronebwa mu bweeni bwaabwe.

²Ise nawulila likono nga lyaama mwikulu nga liwulilikha nga khuuyilila khwe kameetsi kamakali, ate luundi nga khukuula khuukali. Likono lyeesi nawulila lyafwaana nga lye babaakhupa kamatuungu kaabwe.

³Baaba beemba kumweenya kumuyaakha mu moni tsye shitsoloŋo ni mu moni tsye tsisolo tsine, ni mu moni tsye basakhulu. Imbaawo umuundu na mutweela uwanyala khukhwiyika khukhwiimba kumweenya ukwo ta. Khurusakho abo kumweeka mutweela, kimikaanda kine, ni biikana bine (144,000), babaamala khaale khukulibwa ni bukusi khukhwaama khu shiibala.

⁴Babeene bano atweela ni babaandu babaakheyonakisa nga betubaasa ni bakhasi ta, nibo babaaba bayiliinda nga bakwalaafu, nibo babaloondelela Khasheese buli osi esi khatsya. Nibo babakulibwa ni bukusi khukhwaama mu baandu be shiibala, luundi bawaanibwayo nga biwaanwa bikiboole isi Wele ni isi Khasheese.

⁵Sibakanikhatsakho bye bubeeyi ta. Abe sibalikho ni likoondo lyoosi ta.

⁶Lwanyuma nabona malayika ukuundi nga alikho apururukha mu ngaaki. Abe ali ni Kamakhuuwa Kamalayi, kakakhawawo ta, nga ali ni khukaboolela abo babekhala khu shiibala. Ali ni khuukaboolela isi kamanaambo koosi, ni bikuuka byoosi, ni tsinimi tsoosi, ni babaandu boosi.

⁷Waaloma ni likono lye angaaki ari, “Ni murye Wele, mumuwe shiriifwa, lwekhuuba imbuka yeewe iye khuukhalilakho kimisaango yoolile. Ni mumwisaaye, uyo uwabuumba likulu ni shiibala, n'inyaantsa, ni tsisebele tse kameetsi.”

⁸Malayika ukuundi ukhola khabili waaloondakho nga aloma ari, “Shakwiile, Babulooni shiriimba shikhulu shaakwiile. Nisho shishakila kamanaambo koosi waakila keyika buyeyani bwasho.”

⁹Malayika ukuundi ukhola khataru, waabaloondakho nga aloma ni likono lye angaaki ari: “Umuundu yeesi n'esaaya kuusolo ukwo ni shifwaani shakwo, naluundi waafukiilila khabonelo khe mu bweeni bweewe, namwe khu mukhono kweewe,

¹⁰umuundu uyo naye kane okesanisibwe lirima lya Wele. Lirima lya Wele lino lili lye kamaani. Umuundu uyo alitaambisibwila mu mulilo kwe bunoro, mu moni tse bamalayika bakhosefu, ni mu moni tsye Khasheese.

¹¹Ni lisuusi lye kumulilo kukuboosha, liliniina mu ngaaki biilo ni biilo. Ni nabo babesaaya kuusolo ni shifwaani shakwo sibalikho ni shiwolelo ta, kumuusi ni shiilo. Akhaba abo babafuna khabonelo khe lisiina lyakwo.”

¹²Ano nio isi khunyindaalila khuli khu lubeka lwe bakhosefu, nga nibo babawulilatsaka kamakaambila ka Wele, luundi nga bali babeyikinwa isi Yesu.

¹³Lwanyuma naawulila likono nga lyaama mwikulu nga liloma liri, “Rona uri: Bali ni tsikhabi baafu babaafwa nga bakhola ibyo byeesi Umukasya akana, khukhwaama shaleelo ni biilo byoosi.” Umwoyo aloma ari, “Ilala, ilala, baliwola khukhwaama khu buraambi bwaabwe lwekhuuba batsya ni buraambi bwaabwe buulayi.”

¹⁴Lwanyuma ni nesheenga, naabona namufweeli umuwaanga. Khu namufweeli khweene ukhwo, abe ufwaanana nga Umwaana w'Omuundu wekhaalekho, nga ali ni lihabi lye zaabu khu murwe kweewe, n'injeso mu mukhono kweewe.

¹⁵Malayika ukuundi waarura mu Lisaayilo Likhulu nga alaanga ni likono lye angaaki, isi uyo uwekhala khu namufweeli. Walaanga nga aloma ari, “Bukula injeso yoowo ukyese. Khulwekhuuba imbuka iye likyesa yoolile, naluundi likyesa lye shiibala lyoleele ilala.”

¹⁶Aryo uyo uwekhala khu namufweeli khu ngaaki, wakalusa injeso yeewe isi shiibala, wakyesa shiibala.

¹⁷Malayika ukuundi waarura khukhwaama mu Lisaayilo Likhulu lye Mwikulu, naye nga ali ni injeso iyamema.

¹⁸Lwanyuma khu mbuka inyene iyo, malayika ukuundi uwaba ni bunyala khu mulilo, waarura khukhwaama khu sheeso, walangilila ni likono lye angaaki isi uyo uwaba ali ni injeso iyamema. Waloma ari, “Bukula injeso yoowo iyamema iyo ukhalake tsifuusi tsye kimisabibu kikiili khu shiibala. Khulwekhuuba kimisabibu kikilikho kyamalile khuroba.”

¹⁹Malayika wakalusa injeso yeewe isi shiibala, wakhalaka tsifuusi tsye bibyaano abe bibiili khu shiibala. Byeesi akhalaka wabitsukutsa mu likhoŋolo lye khusuura iviini iye kimisabibu, nga nilyo lilyaba lirima lya Wele.

²⁰Likhoŋolo lyeesi basuuriramo ilyo baliyila ibulafu we shiriimba balikhaandakilila. Ni kamafuki karura khukhwaama mu likhoŋolo ilyo, khukhwoolisa khu lukhoba luluraambisibwa khu ŋwaaŋwa, ni khukhwoolisa buleeyi nga tsi kilomita bitoondo bitaru.