Read lumasaaba Khubiimbulilwa 15 Bible Online

Khubiimbulilwa 15 - lumasaaba bible

Khubiimbulilwa 15

¹Lwanyuma ise nabona khaabonelo khakhaandi mwikulu, nga khaakali luundi nga khakheyangisa. Naabona bamalayika musaafu nga bali ni bitaambiso musaafu, nga nibyo bibyaba biimaliilisi, naluundi nga bibyeene ibyo nibyo bibiireera intsakamo iye lirima lya Wele.

²Lwanyuma nabona shishafwaana nga inyaantsa iye indolelo nga baakitubaasilemo ni kumulilo. Abo babasoolanisa kuusolo, ni shifwaani shakwo, ni inaamba iye lisiina lyakwo, baaba beemikhile khu ndulo khwe inyaantsa iyo. Baaba bawaambile kamatuungu keesi Wele aabawa, mu makhono kaabwe.

³Beemba kumweenya kwa Musa, uwaba umwakaanisi uwa Wele, ni kumweenya kwe Khasheese, nga baloma bari, “Umukasya Wele Umunyali wa byoosi, nga bikholwa byoowo bikhulu, naluundi nga biyaangisa. Iwe Umuyiinga uwe kamanaambo, nga tsintsila tsoowo tsingwalaafu, naluundi nga tsili tsya ŋali.

⁴“Umukasya, naanu ukane alekhe khukhurya iwe, ni khukhwisamo lisiina lyoowo lukoosi? Khulwekhuuba iwe wenyene niye Umukhosefu. Kamanaambo koosi kaliitsa khukhwisaaya iwe mu moni tsoowo, khulwekhuuba iwe wokesanisile bikholwa byoowo bikwalaafu.”

⁵Lwanyuma lwa bino, ise nabona Lisaayilo Likhulu, nga niyo iweema iye bujulisi mwikulu, nga intsikule.

⁶Ni mu Lisaayilo Likhulu tsana mwaamamo bamalayika musaafu, nga bali ni bitaambiso musaafu. Baaba bakwaarire tsingubo tsiwaanga tselelele, naluundi nga tsikhoba tseesi baboyile mu bifuba byaabwe tsili tsye zaabu.

⁷Shitweela khu bisolo bine shakaanisa bamalayika musaafu abo bibuumba musaafu bye zaabu, nga byetsuulemo lirima lya Wele, ubawo biilo ni biilo.

⁸Lisaayilo Likhulu lyetsula lisuusi lilyaama mu shiriifwa sha Wele ni kamaani keewe. Naluundi alekha khubawo umuundu yeesi uwanyala khukhwinjila mu Lisaayilo Likhulu ta, khukhwoolisa nga bitaambiso musaafu bibyareerebwa ni bamalayika ni byamala khukhwoolelesebwa.