Read lumasaaba Khubiimbulilwa 16 Bible Online

Khubiimbulilwa 16 - lumasaaba bible

Khubiimbulilwa 16

¹Lwanyuma nawulila likono khuurura mu Lisaayilo Likhulu nga liloma bamalayika musaafu liri, “Ni mwiitse, mutsukhe bibuumba musaafu bye lirima lya Wele khu shiibala.”

²Malayika uwanyoowa waatsya waatsukha shibuumba sheewe khu shiibala. Abonekhawo kamakoontsyo kamakali kakaawunya buubi, khu baandu babaaba ni tsimbaaso tse kuusolo naluundi babesaayatsaka shifwaani shakwo.

³Malayika uwakhola khabili waatsukha shibuumba sheewe khu nyaantsa. Iyo yekyela kamafuki nga k'omuundu ufwiile, ni n'ebyo byoosi bibiili ni buulamu bibyaba mu nyaantsa byaafwa.

⁴Malayika ukhola khataru waatsukha shibuumba sheewe mu ntsitsi ni musebele tsye kameetsi. Natsyo tsashuukha tsekyela kamafuki.

⁵Lwanyuma naawulila Malayika ukhola khu bye kameetsi nga aloma ari, “Iwe uli uwa ŋali, iwe uli umukhosefu, iwe uliwo, luundi uwabawo, khulwekhuuba khuno khwaba khukaya khwoowo.

⁶Khulwekhuuba beera bakhosefu ni baŋoosi, ni nawe wabaweele kamafuki khuunywa nga nishibaakhila.”

⁷Naluundi nawulila shisheeso shisheene nga shiloma shiri, “Ni abweene, Umukasya Wele iwe unyala byoosi, bukayi bwoowo buli bwa ŋali naluundi buli bukwalaafu.”

⁸Malayika ukhola khane waatsukha shibuumba sheewe khu nyaanga. Inyaanga tsana yaawebwa kamaani khukhwoosha babaandu ni kumulilo.

⁹Babaandu bookhebwa naabi ni bukhafu bukali. Kila bakhomyaasa lisiina lya Wele uwaba ni bunyala khu bitaambiso bino. Ne baalekha khukhwibiiyisa namwe khumuwa shiriifwa ta.

¹⁰Malayika ukhola kharaano waatsukha shibuumba sheewe khu shitsoloŋo she buyiinga bwe kuusolo. Abweene awo, buyiinga bwakwo bwekyela shishilima. Ni babaandu belumaka kameeno khulwe butsiina.

¹¹Khulwe butsiina ni kamakoontsyo kaabwe, baryo bakhomyaasa Wele we mwikulu. Ne baalekha khukhwibiiyisa ta khulwe bikholwa byaabwe biibi.

¹²Malayika ukhola khasesaba waatsukha shibuumba sheewe khu luutsi luboofu, lululaangibwa Efulati. Kameetsi ke luluutsi ulwo komelela, khuŋoonaŋoona intsila iye bayiinga babaama Ibwama Nyaanga.

¹³Lwanyuma naabona kimisimu kimibi kitaru, kikifwaana nga tsikhele, nga kirura mukhanwa khe kuuremu, ni mukhanwa mwe kuusolo, ni mukhanwa kh'omuŋoosi uwe bubeeyi.

¹⁴Kino nikyo kimisaambwa kye kimimakoombe babaakholatsaka bye kamakaanga. Naluundi nikyo kikyatsya isi bayiinga be shiibala kyababuusanisa atweela khulwe busoolo, khu shifukhu sha Wele, Umunyali wa byoosi.

¹⁵Umukasya aloma ari, “Ne bona indikho niitsa nga umwiifwi. Umuundu uyo uba meeso, nga aliinda bikwaaro bye bukwalaafu bweewe, aba ali n'ikhabi. Lwekhuuba singene anyoolikhane khuuba bukhuna ta.”

¹⁶Lwanyuma kimisimu kyabuusanisa bayiinga atweela, mu shifwo shishalaangibwa mu lulimi Luheburaniya bari, “Arimagedoni.”

¹⁷Malayika ukhola musaafu waatsukha shibuumba sheewe mu mbewo busa. Ni likono lye angaaki lyarura mu Lisaayilo Likhulu nga lyaama mu shitsoloŋo, nga liloma liri, “Shakholikhile.”

¹⁸Lwanyuma abonekhawo khumulikha khwe tsimbeni, ni khukuula, ni khunikina khwe shiibala khwabawo khukali naabi, khukhukhabatsakawo khukhwaama nga shiibala ni shibawo ta.

¹⁹Shiriimba shikhulu bashikhalamo bisiintsa bitaru, ni biriimba bye kamanaambo byoonakisibwa. Wele washebulila Babulooni shiboofu, aryo washimalilakho lirima lyeewe.

²⁰Buli shikelemeesi shaatima shaakooranawo. Ni tsinjiinji natso tsakoraanawo.

²¹Kamararara ke kamaani, kakaaba busa nga kamabaale kamaboofu kaakwa khu baandu, nga kaama mu ngaaki. Khulwe shitaambiso shino shishaba shishiriisa naabi, babaandu bakhomyaasa Wele.