Read lumasaaba Khubiimbulilwa 17 Bible Online

Khubiimbulilwa 17 - lumasaaba bible

Khubiimbulilwa 17

¹Lwanyuma mutweela khu bamalayika musaafu, babaaba bawaambile bibuumba musaafu, wiitsa wanganikhayo. Waloma ari, “Ni wiitse ano. Kane ikhwokese khukhalila malaaya umukhulu uwikhaale aambi ni tsintsitsi kumusaango.

²Bayiinga be shiibala baakhola bye buyeyani ni naye, ni babaandu babamenya khu shiibala bameela ni iviini iye khuyeyana khweewe.”

³Lwanyuma malayika wasutila ise mu Mwoyo, nafwaana busa nga uli mu marooro, waambila iyo, mu mubiimbi. Ibweene iyo nabona umukhasi nga wekhaale khu solo imbesemu. Ni isolo nyene iyo nga yetsuulekho kamasina ke khukhomyaasa, naluundi yaba ili ni kimirwe musaafu, ni tsintsika liikhumi.

⁴Umukhasi yuno aba wakwaarire ingubo inandaafu, n'ikiindi nga imbesemu. Abe umweene wesaayile bibyuuma bye zaabu, bibimulikhamulikha, ni kamabaale ke bukusi bwe angaaki, ni tsilulu. Ni mu mukhono kweewe nga wawaambiilemo shikopo she zaabu, nga shetsuulemo by'embikho ni bunyaalu, ni bye khuyeyana khweewe.

⁵Mu bweeni mweewe mwaba mwaronewilemo lisiina lye shimoonyo lililoma liri: “Ise shiriimba Babulooni shiboofu, Maayi uwe bumoyaani bwoosi, luundi Uwe by'embikho byoosi bye shiibala.”

⁶Nase nabona umukhasi uyo nga waamelile ni kamafuki ke bakhosefu ba Wele, ni kamafuki ke bajulisi ba Yesu. Ni nabona bino, nase neyaanga naabi.

⁷Lwanyuma Malayika wanoma ari, “Khulwashiina wiyaanga? Kane ikhuboolele shimoonyo sh'omukhasi, ni she solo imusutile ili ni kimirwe musaafu ni tsintsika liikhumi.

⁸Isolo yeesi uboone yabakho inamu ne ari s'iliwo ta. Lutweela ilirura mu lilowo khukhwaama imakoombe itsye mu khuhela khwayo. Babaandu babamenya khu shiibala, babaakhali ni kamasina kaabwe nga kaaronebwa mu burone bwe buulamu khukhwaama nga shiibala ni shibuumbibwa ta, baliyaanga ni balibona isolo iyo. Khulwekhuuba lutweela yabawo, ne ari s'iliwo ta, ate nyaanga ilikobola ibewo luundi.

⁹Shino shikanisa umuundu waba ni kumwoyo kwe kamakyesi. Kimirwe musaafu nikyo bukoongo musaafu khweesi umukhasi ekhaalekho. Naluundi shokesanisa bayiinga musaafu.

¹⁰Baraano khu nibo baamala khuukwa khaale. Mutweela ashiiliwo, ne ukuundi ashiili khukhwiitsa ta. Ne ni kane etse, kane abewo khumala imbuka injeekhe.

¹¹Ne isolo iyabawo iyo, ne ari nga s'iliwo ta, niyo umuyiinga uwe shinaane. Ne nga ali mutweela khu bayiinga musaafu abo, naluundi alikhuutsya khwonakisibwa.

¹²Ni tsintsika liikhumi tseesi uboone, nibo bayiinga liikhumi, babaashiili khunanikha khuwula nga bayiinga ta. Ne kane baweebwe buyiinga imbuka ndweela yonyene, atweela n'isolo iyo.

¹³Abo bali ni shitsiilililwa shitweela. Bakana bawe kamaani kaabwe ni bunyala bwaabwe isi isolo iyo.

¹⁴Basoolanisa Khasheese, ne Khasheese khalibafuura mu busoolo. Khulwekhuuba niye Umukasya uwe bakasya, naluundi ali Umuyiinga uwe bayiinga. Ni naabo babaali ni naye balilaangibwa bari barobole, luundi babeyikinwa.”

¹⁵Lwanyuma lwayo, Malayika wanoma ari, “Kameetsi keesi uboone, khweesi malayika ekhala, nibo babaandu, ni kamatuuli, ni kamanaambo, ni tsinimi.

¹⁶Ni tsintsika liikhumi tseesi uboone, n'isolo iyo, bilibiiyila malaaya uyo. Bilimurusakho bibiindu byoosi byeesi ali ni nabyo, bimulekhe bukhuna. Bililya kumubili kweewe, bimuhesele ilala ni kumulilo.

¹⁷Khulwekhuuba Wele wara mu myoyo kyaabwe khukhola sheesi akana, nga shifukiilisibwa khuuwa isolo buwuli bwe buyiinga, khukhwoolisa bilomo bya Wele ni bililyoolelesebwa.

¹⁸N'umukhasi yeesi uboone, nisho shiriimba shiboofu shishiili ni bunyala khu buyiinga bwe mu shiibala.”