Read lumasaaba Khubiimbulilwa 18 Bible Online

Khubiimbulilwa 18 - lumasaaba bible

Khubiimbulilwa 18

¹Lwanyuma lwa bino, nabona malayika ukuundi nga n'ekha khukhwaama mwikulu. Abe ali ni bunyala bukali, naluundi khulwe shiriifwa sheewe, waamulikha shiibala shoosi shaakhosa.

²Malayika uyo waalomela angaaki ni likono likali ari, “Shiriimba Babulooni shaakwiile! Shaakwiile! Shaakwiile! Shaakalukhile khuuba shishaalo shishimenyamo kimisaambwa, luundi shekyelile bumenyo bwa buli shisimu shoosi shiibi, na buli khanywinywi khoosi khakhekyelile khaabiyile.

³Lwekhuuba kamanaambo koosi kaanyweele khu viini iye buyeyani bwa Babulooni. Bayiinga boosi be shiibala bakholile buyeyani ni naye, ni babakulisa boosi be mu shiibala bafuna buyiindifu khulwe kamaani ke lukhobe lweewe.”

⁴Lwanyuma nawulila likono liliindi nga lyaama mwikulu nga liloma liri, “Inywe babaandu baase, ni murure mu Babulooni, ni mulekhe khutsiila atweela ni naye mu byoonako byeewe ta. Naluundi nio mulekhe khunyoola kumutaambo mu shitaambiso sheewe ta.

⁵“Khulwekhuuba bibyoonako byeewe bili bikali, byetsuule khukhwoola mwikulu, ni Wele ashebulila isaambo yeesi afuniaakamo kamakaambila.

⁶“Ni mumuliyile niye nga naye n'abaliyila inywe. Ni mumuliyile kimiluundi kibili muminyisekho isho sheesi niye umweene aakhola. Inywe ni mumwitsusilemo niye kimiluundi kibili she khuunywa, mu shikopo sheewe shisheene mweesi niye abetsusilamo inywe lutweela.

⁷“Nga n'ebuyila, nga etikitya, ni nanywe muryo ni mumuwe shitaambiso ni kumutaambo mu bukali. Lwekhuuba niye umweene elomela mu mwoyo kweewe ari, ‘Ise nikhala nga Umuyiinga Umukhasi. Ise s'indi namulekhwa ta, namwe s'indibonakho kumutaambo kwoosi ta.’

⁸“Nashiryo mu shifukhu shitweela bitaambiso byeewe biliitsa. Khuufwa, tsindwaale, kimitaambo, ni intsala. Ni naye alyokhebwa ni kumulilo, khulwekhuuba Umukasya Wele Umweene uwe bunyala, niye umukhaliile kumusaango, naluundi kwamufuura.”

⁹Bayiinga be mu shiibala babayeyanatsaka ni naye, bekhala atweela ni naye mu mwikhoyo, babeene abo baliilila, bantsuwe khulweewe, ni balibona lisuusi lilyaama khu mulilo kukumwoosha, nga lituukha.

¹⁰Baliimikha aleeyi khulwe shiriiso she khukhwokhebwa khweewe, beyaange nga baloma bari, “Woowe, woowe! Babulooni shiriimba shiboofu, Babulooni shiriimba she kamaani! Itaambayo isaawa indweela yonyene iwe bakhukhalile kumusaango.”

¹¹Ni babaandu be khu shiibala babaakhola bye khuukulisa, baliilila, bewunamile khulweewe. Khulwekhuuba s'ilibawo umuundu na mutweela ukula bibiindu byaabwe ta.

¹²Bibiindu bibiili bye izaabu, ni bye ifeeza, ni kamabaale ke bukusi bwe angaaki, ni tsingubo tsimiliwu naabi, ni tsingubo tsiwaanga, ni tsinandaafu, ni tsimbaawo tse bukusi bwe angaaki, ni bibiindu byoosi bibyakholebwa mu masaanga ke intsofu, ni biibya bye kumukaso, ni kamabaati, ni kamabaale kamalayi mbaawo ulibikula ta.

¹³Naluundi mbaawo ulikula bibiwunya bulayi, ni bibiŋaayisa tsinyenyi, ni bubaani, ni bye khukhwiyakha bibiwunya bulayi, ni iviini, ni kamafura, ni buufu, ni iŋaano, tsikhaafu, kamasheese, tsiŋwaaŋwa ni kamakaali kaatso, ni bulamu bwe babaandu, nga bano nibo babaali bakulwa.

¹⁴Babaakulisa bano baliloma bari, “Bibyaano byeesi kumwoyo kwoowo kwewuumatsaka byaakhururirekho. Ni nebyo bye buyiindifu bwoowo, ni bibiindu byoosi bye angaaki byaweelewo. S'ulibinyoola luundi ta.”

¹⁵Ni babaakulisa bibiindu bino, babaafuna buyiindifu khulweewe, baliimikha aleeyi khulwe shiriisa she khutaambisibwa khweewe. Baliilila, bewunamile.

¹⁶Baliilomela angaaki bari, “Woowe, woowe! Shiriimba shikhulu shishakwaarisibwatsaka tsingubo tsimiliwu naabi, ni tsinandaafu, ni tsimbesemu, naluundi shakwaarisibwa ni bibiindu bye izaabu, ni kamabaale ke bukusi bwe angaaki, ni tsilulu!

¹⁷Musaawa indweela yonyene buyiindifu buno bwoosi bwoonakisibwa!” Nio bakhulu be tsimeeli boosi, ni naabo babakyeendela khu meetsi boosi, ni naabo boosi abe babaakhola bye bukusi nga bakyeendela khu meeri, bemikha aleeyi.

¹⁸Ni babona lisuusi lilituukha khukhwaama khu mulilo kukwoosha shiriimba, bakuukuulila angaaki nga baloma bari, “Shiriimba shiina shishinyala shalekhaasibwa khu shiriimba shikhulu shino?”

¹⁹Kila behanyakila lifukhuulu mu mirwe kyaabwe, nga balila. Beewunamila nga baloma bari, “Woowe, woowe! Shiriimba shikhulu mweesi abo boosi babaaba ni tsimeeri khu nyaantsa nga nimwo mweesi baamisa buyiindifu, khulwe buyiindifu bubwaba mu shiriimba isho, mu saawa indweela yonyene shonakisibwa!

²⁰Iwe likulu ni wikhoye, khulwe khukhwonakisibwa khwasho. Akhaba inywe bakhosefu ni baarume beewe, ni baŋoosi, ni mwikhoye. Khulwekhuuba Wele wakhaliile shiriimba isho kumusaango khulweesho sheesi shabakhola inywe.”

²¹Lwanyuma malayika uwe kamaani wabukula libaale liboofu lilifwaana nga lusisi luboofu, walituuma mu nyaantsa nga aloma ari, “Babulooni shiriimba shikhulu shilituumibwa aasi ni kamaani kakafwaana karyo. Sishilibonekhakho luundi na khari ta.

²² Ni kamakono ke babaakhupa kamatuungu ni babeemba, ni babaakhupa kimilele, ni babafuura tsikhoombi, sikaliiwulilikhanakho luundi mus'iiwe ta! Mbaawo babaakhola bye bukusi babalibonekhakho mu shiriimba isho ta, naluundi silibawo likono lye lusisi lililiwulilikhakho mus'iiwe ta.

²³Shilibonekhawo luundi buwaanga bwe itaala iyaburukha mus'iiwe ta! Imbaawo kamakono ke kamayiiya ke bukhwaale kakaaliwulilikhana mus'iiwe luundi ta! Lwekhuuba abe ukholakana ni babaandu bakhulu naabi mu shiibala muno, ni kamanaambo koosi kawombesebwa khulwe liloko lyoowo.

²⁴Mu shiriimba shino Babulooni, mwanyoolekhanamo kamafuki ke baŋoosi ni bakhosefu, ni naabo boosi be khu shiibala babaaba nga bayiribwa.”